Read Kissi Fulaa 17 Bible Online

Fulaa 17 - Kissi bible

Fulaa 17

¹Mí Israɛlla kpow a faŋan o lɛŋnde veselɛilen Sin nin, má va kɔlan o pɔm-pɔmbɔ mɛɛ Mɛlɛka pila va nda nɛilan cɔmndo yɛ. Má kɔ kila dɔ́ɔ́ngɔ́ɔ̀ Refidim, kɛ a sɔla mɛmma kolaa lon te.

²Mí nda kpow a sɔngɔlan Moise, má dimul ndu aa: «La ke naa mɛnndan mì n kol.» Mí Moise ɲuna nda aa: «Le yɛɛ niaa co yɛ ya sɔngɔlanndo? Le yɛɛ niaa co yɛ vɛlɛ Mɛlɛka tiŋɔɔ?»

³Mɛɛ kolɔɔ bii nda tei, má koŋul a Moise o sondo, má dimi aa: «Le kɔlɔ yɛɛ nɛ n faŋa yɛ naa o lɛŋnde Esipte len nin? Bàà a yeema mì n cuu vu nanu a bolola vesɛilan naa cuavaa naa a cɔlua naa kpow?»

⁴Mí Moise koŋul o Mɛlɛka lo, mó dimi aa: «Yɛɛ ya tosá yɛ́ mì vannda ha ɲulul kɔl? O lo cɔɔlu cobe mà vii ya a powtan, mà dii ya.»

⁵Mí Mɛlɛka mulul ndu aa: «Sim nda laci ma cua vannda pum o kaasoŋaa kɔlkalua Israɛlla tɛɛn, ma kɔɛ a nda. Cua tinda nɔmndo o ba, o n lɔɔ mɛmma pee bɛndoo Nil-lo pɛɛn, mì la kɔɛ.

⁶Ya Mɛlɛka yɛ, i co va isisi nɔm laci o pow kpovaa coo o pembei Horɛb. A tiiya pɛ lon, a lɔɔ pow kpova kon a tindaa. O kon, mɛnndan ma fulanin ndon, mì Israɛlla kpow a kol man.» Mí Moise tosa lende kaasoŋaa kɔlkalua Israɛlla o hɔl.

⁷Má ke fonda kon diolan aa Masa a Meriba (kon co dimio ni aa «Tɔɔndanndo a Sɔngɔlanndo»), le sɔngɔlan Israɛlla sɔngɔlan Moise-o a le tɔɔndan nda tɔɔndan Mɛlɛka-o. Kani má dimi aa: «Mɛlɛka co pá naa tɛɛn bàà o co naa tɛɛn te?»

⁸Mí Amalɛkea[23] hun del Israɛlla coo a cɔwvo telen nda va kon Refidim-ndo.

⁹O kon mí Moise dimul Yosue aa: «Hɛlul naa kuubaa caa cɔwvo-a, mì la kuel Amalɛkea a cɔwvo. Siɔdii, ya pila vanin isisi o pembei bollen a tinda Hala-o o ba.»

¹⁰Mí Yosue tosa mɛɛ Moise dimul ndu yɛ. O kon, mó kɔa a vannda le Amalɛkea cɔlɔbaa. Telen nda kɔɛ-o, mí Moise, Aarɔn a Hur a hel o pembei bollen.

¹¹Tuma nda va kon cɔwvo-o, te Moise ndóò heelu pɛ balan coocoo, Israɛlla ndáà hiow Amalɛkea yoomuan o cɔwvo nin, kɛ te ndóò tuisi pɛ balan, Amalɛkea ndáà hiow Israɛlla yoomuan.

¹²Mɛɛ bala Moise lan la sanga, mí Aarɔn nda Hur a cua powvo, má kɛsi ndu lecoo, má saa ndu balan yɔŋii láà tol, mí o pilɛ saa ndu ba kɛndɔɔ, o pilɔɔ ba mɛllo. Mí bala ndɔlan la lo laheelaa coocoo lende háá mí paalen le del.

¹³O kon mí Yosue diw Amalɛkea diwvo pila a mɔɔn cɔwvon.

¹⁴Mí Mɛlɛka dimul Moise aa: «Sɛva dɛnɔɔ ho kpow o sɛbɔɔ nin le loonɔnndo, ma dimul Yosue aa i ɲuminin Amalɛkea o ceendo coo, mì vanndacieea pɔɛɛnun a dɛnɛ ndaa o lɛŋnden coo.»

¹⁵O kon mí Moise cɔaw fonda-loamaa-lasálàá, mó ke ndu diolan aa Adonai Nisi (kon co dimio ni aa «Mɛlɛka co lɛfɛ nuu ni.»)

¹⁶Mó cɔɔlu vɛlɛ dimi aa: «Le tùú Amalɛkea hin le kpɛŋɛ lemasa Mɛlɛka-o tɛɛmbuuo-o[24], Mɛlɛka bɛɛ vanin nda cɔlɔbaa le fɛɛn-fɛɛn.»