Read Kissi Fulaa 19 Bible Online

Fulaa 19 - Kissi bible

Fulaa 19

¹Mɛɛ Israɛlla fula o lɛŋnde Esipte len nin, o paale taselen coo o paangii yàándɔɛi nin o cɔnɔn ndaa Esipte kɔɔli, má tiiya o lɛŋnde veselɛilen Sinai nin.

²Mɛɛ nda faŋan Refidim, má tiiya o lɛŋnde veselɛile len nin, má kila dɔ́ɔ́ngɔ́ ndaa o pembei Sinai hɔl-ndɔ.

³Mí Moise hel o pembii ken coo le bɔŋanndo nda Hala. Mí Mɛlɛka veelu ndu lon o pembei coo, mó dimul ndu aa: «Sɔɛi n bɛnda ma tɛɛngul pulun Yakɔb-on-nde co hee ni, Israɛlla pɛɛn:

⁴‹Niaa pila ce mɛɛ ya tosa a Esiptea yɛ a mɛɛ ya cua niaa o kumbannda kovɛa coo mí hun a niaa o ya lo yɛ.

⁵Lelan sisa, te la bii pɛ sɔɛi nii, mì la manda kpema nuu, la vanin yungu kɛsin teengen le ya-o o vanaa súúla celennda tɛɛn, kani ya nɔ lɛŋnden kpow ni.

⁶Lelan, la vanin vanaa-solia-lasálàá lemasaa a yungu diandaa kɛsin teengen le ya Mɛlɛka-o.› Sɔɔn mun n bɛnda le Israɛlla tɛɛngullo ni.»

⁷Mí Moise muungu o dɔ́ɔ́ngɔ́ɔ̀ nin, mó cuungiaa kaasoŋaa kɔlkalua o Israɛlla tɛɛn, mó tɛɛngul nda sɔɔn Mɛlɛka sɔɔ ndu o sondo-on kpow.

⁸O kon mí nda kpede a yonda diom pilɛ kpé aa: «Ɲɛ-ɲɛ Mɛlɛka dimul naa le tosaa, n co ndu tosa.» Mí Moise muungu, mó kɔ cɔm Mɛlɛka muli yungu kon muli-o.

⁹Mí Mɛlɛka dimul ndu aa: «Tofa vɔ, i co kɔlan o nɔm ndo o kumii bɛndu-bɛnduei nin, haliko lɔ́ɔ́ ya vanin sɔɛi o nɔm ndo-o, mì Israɛlla tuei ya diom, mà laalan nɔm le lɔ́ɔ́-lɔ́ɔ̀.» O kon mí Moise cɔm Mɛlɛka sɔɔn Israɛlla soo-on.

¹⁰Mí Mɛlɛka dimul Moise aa: «Kɔ ma kɔ dimul Israɛlla aa a bɛnda mà dindin kandɔɔ hau háá siɔdii, mà tɔ́ɔ́ vɛlɛ volɔɔla ndala cuɛinanndan.

¹¹A va a bɛɛndiannda le diɛŋ, kani i toalnin ɲinkon o pembei Sinai coo nda kpow o hɔl.

¹²Kɛ a bɛnda ma kilu nda kpélénndan[26] o pembei balɔɔ pindo, ma dimul nda aa: ‹La mandan, la hel o pembei he coo le, la sɔɔnguu bɛɛ ikɛi le, kani vana-vana sɔɔnguu pɛ ndi ikɛi, ndu sɔlanin piɔ́mndo.

¹³Vana-vana tɛɛmbuu pɛ tɔŋndo ho, vana pilannin ndu a ba le, kɛ a lonin ndu viiyo a powtan, te kon te a kɔɔn háá mò vi. O va vanaciee o va cɔlu, vana-vana tɛɛmbuu tɔŋ kon pɛ, o lonin yoomu le. Fɔ mà hɔŋ fɔlɔn lee saa kóndóó malan a pum a hel o pembei coo.›»

¹⁴Mí Moise toal pembei, mó muungu o Israɛlla lo, mó dindi nda Mɛlɛka o hɔl. Má tɔaa vɛlɛ volɔɔla ndala cuɛinanndan.

¹⁵O kon kɔɔli, mó dimul nda aa: «La va a bɛɛndiannda le diɛŋ. Háá ɲinkon, la bɛnda mì la tosa kpelemɔɔsaa niaa laandaa niaa le.»

¹⁶Mɛɛ paale yàándɔle len le tiiya, idiiyo púŋ, mí taŋndan ma kandu deŋio, mí piɔɔ kandu volio iŋuanndi-ŋuanndiei, mí kumii tiŋii bɛndu-bɛnduei kumbu pembii ken mɔku-mɔku. Mí diom bulu bɛndoo soaa, mí siòònde bii vanaa va o dɔ́ɔ́ngɔ́ɔ̀ nin-nda kpow, háá má ɲiiya.

¹⁷O kon, mí Moise soli vanaa va o dɔ́ɔ́ngɔ́ɔ̀ nin-nda kpede le kɔlan Hala bɔŋaa. Mí nda kpow a kɔ sim o pembii ken bɛngu.

¹⁸Mí kumnde mial pembei Sinai, kani Mɛlɛka ndóò tol lon o yinnde bɛndulen nin. Mí kumnde va helɔɔ mɛɛ i fula o tóndó bɛndu leyinndo nin nuaa yɛ. Mí pembei kpow i hiilun voku-voku.

¹⁹Diom buloo va hiovɔɔ laci a deŋio tuŋ-tuŋ. Moise va sɔɛi, mí Hala va ndu mulullo a diomndo maa diom letaŋ.

²⁰Mɛlɛka ndóò tol o pembei Sinai bollen di-di, lon o veelu Moise ni, mí Moise hel.

²¹Mí Mɛlɛka dimul ndu aa: «Tol mà kɔ kanalan vannda ha, yɔŋii nda hiow pɛɛngulan a kiltan le hunɔɔ nɛɛ ya Mɛlɛka co-a le ya cɔu, yɔŋii vannda taw a sɔla piɔ́mndo.

²²Hali vanaa-solia-lasálàá co ya sɔɔnguuo ikɛi-ya, a bɛnda fɔlɔn mà dindin malan nda hun, yɔŋii ya tɛɛmbuu nda.»

²³Mí Moise mulul Mɛlɛka aa: «Vanaa kan a helnin o pembei he coo le, kani nɔm pila dimul naa ni aa naa n kilu nda kpélénndan o pembei balɔɔ pindo, mì n dimul nda maa o diandaa fonda kon co nɔm o hɔl ni.»

²⁴Mí Mɛlɛka dimul vɛlɛ ndu Moise aa: «Tol. Kɔ mà kɔ hun a Aarɔn. Kɛ vanaa-solia-lasálàá a vanaa tɔ̀a nda keleŋa vɔ helɔɔ a kiltan nɛɛ ya co-a le, yɔŋii ya tɛɛmbuu nda.»

²⁵Mí Moise toal, mó kɔ tɛɛngul vannda sɔɔn Mɛlɛka sɔɔ ndu o sondo le nda-on.