Read Kissi Fulaa 2 Bible Online

Fulaa 2 - Kissi bible

Fulaa 2

¹Langbanɔ pilɛ va, fulaa o polale Levii len nin, mó yil lanɔɔ o polale pilɛle len nin.

²Mí laa ndɔ kon cua folio, mó vialu hɔ́ɔ́ piaandoo. Mó ca maa cɛlɛkpɛ piaandu kalaa naŋ hɔlla, mó lo ndu vionɔɔ háá paangon mún yáá.

³Mɛɛ o sina maa o nɔla lɛ vionnɔnndo a ndu le, mó lɔa kambɛiyo a taan[2], mó yikpa ndu a dukpaa, mó holiholi sɛ̀llo. Mɛɛ o cii toosiaa lende, mó yambu cɛlɛkpɛ kalaa o kambɛi kon nin, mó kɔ kɛsi ndu o cɔ́ɔ́cɔ́ɔ̀an nin o pee bɛndoo Nil kɔngɔ.

⁴Mí yemaa cɛlɛkpɛ kalaa kɔ sim lándán le sinaa ɲɛ óò yɔŋnunin yema ndɔ-o.

⁵Paale pum, mí cua Faraɔnnɔɔ toal o pee bɛndu kon le pulɔnndo, mí buɛyaa ndɔa laandua nda va kelaa o peo kɔngɔ. Mí cua masa kon ca kambɛiyo o cɔ́ɔ́cɔ́ɔ̀an nin, mó viam buɛi ndɔ laandoo pum le kɔlan kambɛi kalaa cuaa.

⁶Mɛɛ o kumbi ndu, mó ca cɛlɛkpɛ piaandoo lenin, o va caŋndo. Mí ɲííye bii ndu, mó dimi aa: «Cɛlɛkpɔɔ ho, violɔɔ Hebreenɔɔ o co ni.»

⁷Mí yemaa cɛlɛkpɛ kalaa ɲuna cua Faraɔnnɔ kon aa: «A yeema mì kɔ nuwviaa komsaa pum o vanlaandua Hebreea tɛɛn, mì veelu ndu, mò hun vɔɛsil nɔm hɔ́ɔ́ ho?»

⁸Mí cua Faraɔnnɔɔ mulul ndu aa: «Oi, kɔ.» Mí cuaambɔɔ kɔ veelu kalaa cɛlɛkpɛ kon kpeekpei.

⁹Mí cua Faraɔnnɔɔ dimul cua kon aa: «Kɔ a cɛlɛkpɔɔ ho, mà kɔ vɔɛsil-la ndu. I co nɔm va salaa lelan.» Mí cua kalaa kɔa dɔ́ɔ́ a cɛlɛkpɔɔ, mó kɔ va ndu vɔɛsio.

¹⁰Mɛɛ poombɔɔ sul, mí kala ndɔ yoo cua Faraɔnnɔɔ ndu. Mí cua masa kon bii ndu maa hɔ́ɔ́ ndɔ o solin o ipulu-o. Mó ke poombɔ kalaa diolan aa Moise, mó dimi aa: «Kani o mɛnndan nin ya soli ndu ni.»

¹¹Mɛɛ Moise sul kaasonɔɔ, mó kɔa paale pum o puapilɛa[3] ndɔa lo, mó ca baala lepɔtɔl nda va tosaa-o. Mó ca langbanɔ Esiptenɔɔ pum Hebreenɔɔ pum lɔɔ.

¹²Mí Moise mɛɛndian sɔ́, o ci vana-vana celen te. Mó bii langbanɔ Esiptenɔ kon, mó dii ndu, mó kumbu ndu o sióónndon nin.

¹³Diimandɔɔ pilɔɔ vɛlɛ, mó muungu o fonda kon, mó komal Hebreea nda ŋiɔn cɔlɔbaa. Mó ɲuna vana nɔ dí loo aa: «Le yɛɛ n co yɛ puapilɛ[4] nɔmndo lɔɔ?»

¹⁴Mí langbanɔ kon mulul ndu aa: «Nɛ̀ɛ́-nɛ̀ siinguu yɛ nɔm simlacinɔɔ a yamanɔɔ naa coo? Bàà a yeema ma dii ya mɛɛ n dii ciɛi Esiptenɔɔ yɛ?» Mɛɛ Moise ce maa vannda sina sɔɛi ken, mí siòònde bii ndu.

¹⁵Mí Faraɔnnɔɔ pila bɛɛ tuɛi sɔɛi ken, mó can Moise nuwviaa le ndu diyɔɔ. Le hee, mí Moise sɔndan, mó kɔ viannun o lɛŋnde Madian-nden nin. Mɛɛ o tiiya lon, mó kɔ cal o soon kólaa pum ikɛi.

¹⁶Vana-solia-lasálàá pum va o lɛŋnde Madian-nden nin, ndóò nɔ cuavaa laandua nda ŋɔmmɛw. Mí cuavaa ndɔa kan hun mɛnndan kɔndɔɔ lon le ɲɛla cɔlua kol nin-ndan peiyo le cɔlua fuɲa nda-a koesio.

¹⁷Kɛ mí vanaa mandaa n'cɔlua pum tiiya lon, má toaw vanlaandua kan. O kon, mí Moise lɔaanun ibuŋ le nda, mó koesi cɔlua fuɲa nda-a kan.

¹⁸Mɛɛ nda muungu o Reuɛl[5] fuɲa nda lo, mó ɲuna nda aa: «La vɛ dɔ́ɔ́ hau keleŋaa hunɔɔ nuaa cɔ́-cɔ́?»

¹⁹Má mulul ndu aa: «Langbanɔ pilɛ fula Esipte ni, ndu lɔɔnun hau ibuŋ le naa ni, mó baŋa naa vanaa mandaa n'cɔlua o ba. Mó kondul naa bɛɛ mɛnndan, mó koesi cɔlua naa.»

²⁰Mí fuɲa nda ɲuna nda aa: «Kuɛɛ nɛ o co yɛ? Le yɛɛ niaa mɛi yɛ ndu lon? La kɔ veelu ndu mò hun dio ɲɛdiaa.»

²¹Mí Moise cɛl le lou o langbanɔ kon ndo le calle nda ndu. Mí langbanɔ kon yɔngu Moise lanɔɔ, cua ndɔ óò nɔ diolan aa Sefora-o pɛɛn.

²²Mí Sefora kon vialu hɔ́ɔ́ piaandoo, mí Moise ke ndu diolan aa Kɛrsɔm (kon co dimio ni aa «Miallo»). Kani mó dimi aa: «Vana viannanndo ya co o lɛŋnde isumialten nin ni.»

²³Mɛɛ ɲɔɔ viow tei, mí masa va kon Esipte-o vu. Israɛlla va o cɛle len nin tuŋ, a va kuŋndan a koŋullo. Mí Hala tuɛi somisomin ndaa.

²⁴Mɛɛ o tuei nda cɛɛŋɔnndo, mó loonun a kpema o yiilu Abraham, Isaak a Yakɔb-o.

²⁵Hala tofaa nda, mó sina mɔnɛi nda va nin-nde.