Read Kissi Fulaa 21 Bible Online

Fulaa 21 - Kissi bible

Fulaa 21

¹Mí Mɛlɛka dimul Moise aa: «Má cè tɔŋndan le lan Israɛlla tɛɛngullo:

²Te la pendu pɛ cɛɔ, mì cɛ kon va Hebreenɔɔ, o bɛnda mò tosal vana pendu ndu-o baalaa o vɔsilan laŋɔmpum bɛngu. Kɛ o vɔsi ŋɔmmɛwndɔɔ, o sɔla hɔ́ɔ́yɛi ndɔɛi, o kɔɛnnun. O bɛnda mò sala ɲɛ-ɲɛ le baŋan ndɔ kon te.

³Te yemboo o va telen nda va ndu piondɔɔ-o ni, o va pɛ kɔlan, o kɔɛnnun ndu pilɛ. Te a lanɔɔ o ba o siŋnun cɛɔ ni, o va pɛ kɔlan, o kɔɛnnun a laa ndɔ.

⁴Te vana ndɔ bɛndoo[32] ke pɛ ndu lanɔɔ, mò velu cuawva a lanɔ kon, lanɔ kon a cuavaa kan a bɛnda mà lo le vana ndɔ bɛndoo, mì cɛ kon ndu sɔla hɔ́ɔ́yɛi ndɔɛi, mò kɔɛnnun ndu pilɛ.

⁵Kɛ te cɛ kon dimi pɛ aa: ‹I yeema vana ni bɛndoo, laa nuu a cuavaa nia, i yeema mì mɛi nda mì sɔla ihɔɔya le›,

⁶o kon, vana ndɔ bɛndoo sɔɔnguu a ndu Hala o hɔl, o kɔɛ a ndu o koŋndo ikɛi, te kon te o kèédei coo, o buli ndu nilen a yɔɛi buliaa laniei. O tosa pɛ lende, langbanɔ kon siŋnun cɛ ndɔɔ le fɛɛn a fɛɛn.

⁷Te vanndo pisi pɛ cua ndɔ laandoo le siŋnɔnndo cɛɔ, ndu sɔlanin baŋaa mɛɛ cɛa tɔ̀a sɔ̀là baŋaa yɛ le.

⁸Te o hɛnan vana ndɔ bɛndoo le vaa laa ndɔ le, vanaa velu ndu-a baŋa ndu. Kɛ te vana ndɔ bɛndoo cii pɛ ndu dúmbú yii[33], o nɔ lɛ di mò pisi ndu vanaa-mangalaa-isɔaa celen o ba le.

⁹Te le po ndɔɔ yɔngoo o pendu ndu ni, o bɛnda mò bii ndu mɛɛ vana bii hɔ́ɔ́ laandu n velu-o yɛ.

¹⁰Te vana ndɔ bɛndoo cii nin pɛ ndu cua maa laa ndɔ, mò yil vɛlɛ lanɔ celen o ndu kɔɔli, vana ndɔ bɛndu kon bɛnda mò dɔɔnial ndu ɲɛ-ɲɛ hiovɔɔ lanɔ kon coo le, o va o ɲɛdiaa nin, o va o ɲɛ cuɛinan nin, o va o kpelemɔɔsaa nin.

¹¹Te o nɛŋi ndu kɔl o sɔɔn yaan mún nin te, cɛ kon nɔla mò sɔla hɔ́ɔ́yɛi ndɔɛi, mò kɔɛnnun. O bɛnda mò yɔngu n'voli le baŋan ndɔ kon te.»

¹²«Te vanndo lɔɔ pɛ vanacieo mì vanaciee kon vi, vana lɔɔ ndu kon-ndo bɛnda mò sɔla piɔ́mndo kangalan.

¹³Kɛ te o ve mɛngɛla le o mɛngɛla ndu mó dii ndu le, o va pɛ maa Hala tosa ni mí sulalle fula vana kon o ba, Hala toosiaanin fondaa mì vana kon kɔ vionnun[34].

¹⁴Kɛ te vanndo tisa pɛ vanacieo coo, mò dii ndu a kɔlvesɛiyo, hali vana kon kɔ vionnun bɛɛ o fonda-loamaa-lasálà Hala-o ikɛi, la bɛnda mì la kɔ nan ndu lon, mì la hin a ndu, mì ndu bɛɛ sɔla piɔ́mndo.

¹⁵Te vanndo lɔɔ pɛ fuɲa ndɔ, te kon te kala ndɔ, vana kon bɛnda mò sɔla piɔ́mndo.

¹⁶Te vanndo ciimbuu pɛ vanacieo, o bɛnda mò sɔla piɔ́mndo. Hali o pisi bɛɛ vanaciee o ciimbuu kon-ndo maa cɛ, te kon te a saalun bɛɛ vanaciee kalaa ndu o ba, vana ciimbuu ndu kon-ndo bɛnda mò sɔla piɔ́mndo kangalan.

¹⁷Te vanndo mɛna pɛ fuɲa ndɔ, te kon te kala ndɔ, vana mɛna kon-ndo bɛnda mò sɔla piɔ́mndo[35].»

¹⁸«Te vannda cɔlɔba pɛ, mì o pilɛ lɔɔ o pilɔɔ a bɔtáà[36], te kon te a powvo, te vana nda lɔɔ-o vi le, kɛ mò hini a sanga kon,

¹⁹te o cɛn pɛ mò nɔla vɛlɛ kelaa o bɛ́ɛ̀ a tindáá, a bɛnda mà yɔŋ vana lɔɔ ndu-o ɲɛ-ɲɛ le. Kɛ o bɛnda mò sala caando le palɛi o tosa ihini o ve vali tosa le-e. O bɛnda vɛlɛ mo cɛw ndu háá mo sengu.

²⁰Te vanndo lɔɔ pɛ cɛ ndɔ piaandoo, te kon te cɛ ndɔ laandoo a yɔmndo, mò dii ndu o foofo, cɛ kon bɛnda mò sɔla màá mingullo o vana kon ndo.

²¹Kɛ nduyɛ, te cɛ nda lɔɔ kon-ndo tosa vɔ pɛ yoomu paale pilɛ, te kon te palɛi ŋiin, vana mingi lɛ màá ndɔ o vana ndɔ bɛndu lɔɔ ndu-o lo le, kani a volin ndɔn o pendu ndu ni.

²²Te vannda lo pɛ cɔlɔbaa, mà kundu vana folio, mì telen ndɔ vialaa tiiya le, kɛ mo velu le kundɔɔ nda kundu ndu kon-ndo, te dɛnɛ palaa celen tosan o kon kɔɔli le, vana kundu ndu-o luɛi bɔnɔɔ yamaa o hɔl mɛɛ pɔnɔɔ vana foli kon kialunin yɛ.

²³Kɛ te sulalle fula pɛ lenin, la tosa mɛɛ o dimin yɛ: vana dii pɛ vanacieo, a dii vana kon.

²⁴Vana pɛl pɛ vanndo hɔlten, ndu bɛɛ a piɔl ndu hɔlten. Vana bɛŋi pɛ vanndo ciŋnde, ndu bɛɛ a bɛŋi ndu ciŋnde. Vana yem pɛ vanndo baa, ndu bɛɛ a yem ndu baa. Vana yem pɛ vanndo pelei, ndu bɛɛ a yem ndu pelei.

²⁵Vana lom pɛ vanndo, ndu bɛɛ a lom ndu. Vana boli pɛ vanndo, ndu bɛɛ a boli ndu. Vana soli pɛ vanndo bulunndan, ndu bɛɛ a soli ndu bulunndan.

²⁶Te vanndo lɔɔ pɛ cɛ ndɔ piaandoo, te kon te cɛ ndɔ laandoo hɔlten mò pɛl ndu len, o bɛnda mò ke ndu hɔ́ɔ́yɛi ndɔɛi sɔngɔ hɔlte o pɛl ndu len-nden.

²⁷Te o bɛŋi pɛ ndu ciŋnde, o bɛnda mò ke ndu hɔ́ɔ́yɛi ndɔɛi le ciŋii o bɛŋi ndu ken-nde.

²⁸Te nawvo kundu pɛ vanacieo mò dii ndu, o va vanapɔnɔ o va vanalanɔ, a bɛnda mà vii naw kon a powtan háá mà dii ndu. Visin ndɔn bɛnda mì n dennun te. O kon, vana naw kon bɛnda mò sɔla isɔɔ le.

²⁹Kɛ o va bɛɛ lende, te naw kon dema nin pɛ vannda kundɔɔ paandu, mà kanalan vana nawvo, mò saalan le ndu biyɔɔ le, te naw kon kundu nin pɛ vanndo mò dii ndu, a bɛnda mà vii ndu a powtan háá mò vi, mà dii vɛlɛ vana naw kon.

³⁰Taa kilul pɛ vana naw kon ɲɛ pum le yoomu ndɔɔ baŋaa, o bɛnda mò yɔngu ɲɛ nda kilul ndu kon-ndo kpow.

³¹Te poombɔ piaandoo, te kon te cuaambɔ laandoo nawvo kundu ni, naw kon bɛɛ a tosa a ndu mɛɛ tɔŋ pilɛ kon dimi yɛ.

³²Te cɛ piaandoo, te kon te cɛ laandoo nawvo kundu ni, vana nawvo bɛnda mò yɔngu vana nɔ cɛ kon-ndo volin latámán beleyaa. O kon kɔɔli, a vii naw kon a powtan, a dii ndu.

³³Te vanndo faŋa pɛ kumboo o soondo coo, te kon te mò tow soondo, mò mɛi ndu sondoo fondo, mì naw pilaa, te kon te sofɛlɛ pilaa del lenin,

³⁴vana tow soon kon-ndo bɛnda mò dɔw cɔlu pilaa vɔngu mɛɛ cɔlu kon nɔ báà yɛ. O kon, ndu loo cɔlu vílɛ́i kon.

³⁵Te naw vanndo kundu pɛ naw pilaa mò dii ndu, a pisi naw dii kon o pilɔɔ-o, vana naw vi-o a vana naw dii ndu-o a piɔvan volion tɛɛn, a piɔvan vɛlɛ naw vi-o.

³⁶Kɛ te o va pɛ maa naw dii kon o pilɔɔ-o dema nin kundɔɔ lende, mì vana nawvo saalan le ndu biyɔɔ le, o bɛnda mò sala naw kiyɛiyo sɔngɔ naw pila vi-o, mì ndu loo naw vílɛ́i kon.»

³⁷«Te vanndo ciimbuu pɛ nawvo, te kon te saa, mò dii ndu, te kon te mò pisi ndu, o bɛnda mò sala nawva nda ŋuɛɛnu le naw pilɛ o ciimbuu kon-ndo, te kon te saa nda hiɔɔlu le saa pilɛ o ciimbuu kon-ndo.»