Read Kissi Fulaa 22 Bible Online

Fulaa 22 - Kissi bible

Fulaa 22

¹«Taa bii pɛ vuiyo o cɛi pilaa bulio[37] le luɛyɔɔ vuilen, mà lɔɔ ndu mò vi, vana lɔɔ ndu mó vu-o bɛnda mò sɔla isɔɔ le.

²Kɛ te ipala dɛnɛ kon yɔŋnun ni, mà dii ndu, vana dii ndu-o bɛnda mò sɔla sɔɛi le vanaciee o dii-o. Vuiyo ciimbuu pɛ ɲɔɔ, o bɛnda mò luɛi bɔnɔɔ le ɲɛ pilaa salaa. Te o nɔ ɲɛ le, a pisi ndu pila le ɲɛ o ciimbuu-o salaa.»

³«Te cɔloo o ciimbuu ni, o va naw, o va sofɛlɛ, o va saa, taa saalun pɛ cɔlu kon o kiyɛiyo ndu o ba, o sala cɔlua nda ŋiɔn sɔngɔ cɔlu pilɛ o ciimbuu kon-ndo.

⁴Te vanndo yɛɛ pɛ cɔlua ndɔa o ciɛi pílɛi nin, te kon te o nakɔ n'rɛsɛn pilaa nin, mà kɔ dio tɔlɔɔ co lon-ndo, o bɛnda mò salal vana ɲɔɔ ɲɛm kɛndɛ-kɛndɛn o koawnin o ciɛi ndɔɛi nin-ndon, te kon te tɔlɔɔ kɛndɛ-kɛndɛ o kiandunin o nakɔ n'rɛsɛn ndɔɔ nin-ndo sɔ̀ngɔ́ cɔlua ndɔa de o pílaa-o.

⁵Te vanndo mal pɛ yinnden, mì yinnde len le cii bɔɔ yɔmii n'yɔɔ lomɔɔ, mì le hiow, mì le kɔ lom malun pilan nda yii tumbulan-ndon, te kon te malun pilan kuwnun-ndɔ lon, te kon te ciɛi pílɛi, vana yinnde len le hɛlun-ndo bɛnda mò sala ɲɛ píla o lom-ndo.

⁶Te vanndo yɔngu pɛ vanndo ɲɔɔ pum le mandaa, o va n'voli, o va ɲɛ sɔvɛ pum, mì vanndo ciimbuu ɲɛ kon vana nda ke ndu le mandaa-o o ba, taa bii pɛ vui ciimbuu ndu-o, o sala ɲɛ o ciimbuu-o lediin.

⁷Taa bii vui kon te, vana ɲɛ kon lo o ba-o sim Hala o hɔl le sinaa te o co ndu le co ɲɛ pilaa dioo a lakafa le.

⁸Dɛnɛ oo dɛnɛ sɛɛngianndo co pɛ nin, o va dɛnɛ naw, o va dɛnɛ sofɛlɛ, o va dɛnɛ saa, o va dɛnɛ volɔɔla cuɛinan, o va dɛnɛ ɲɛ-ɲɛ lo, te vanaa ŋiɔn va pɛ sɛɛgianndo lecoo, mì vana-vana va dimio aa: ‹Ɲɛ nuu co hoo ni›, vanaa ŋiɔŋaa kan a bɛnda mà kɔɛ a sɔɛi ken Hala o hɔl. Vana Hala yàála pɛ, ndu salal vanndo pilɔɔ ɲɛ kon lediin.

⁹Te vanndo yɔngu pɛ vanndo sofɛlɔɔ, nawvo, saa, te kon te cɔlu súú-súù congɔɔ, te cɔlu kon vi pɛ, te kon te mò yem pelei, te kon te mì vuiya hun del o tàndà kon coo, mà ciimbuu cɔlu kon, te sei ve ikɛi le,

¹⁰sendío bɛnda mò luɛi vanaa ŋiɔŋaa kan tɛɛn o diola Mɛlɛka lan. Vana va cɔlu kon mandaa-o bɛnda mò mɛnan maa o co ndu le co cɔlu pilaa dioo a lakafa le. O kon, vana cɔloo cɛl sendí kon. Vana cɔlu kon va o ba-o bɛnda lɛ le ndu sala le.

¹¹Kɛ te ndu macɛlu nda ciimbuu cɔloo ni, o bɛnda mò sala cɔlu pilaa.

¹²Te visi biyaa dii cɔlu kon ni, mó sɛɛsiaa ndu, o bɛnda mò hin a ɲɛ tɔ̀ visi kon mɛinin-ndo le seilen. O kon, o bɛnda lɛ mo sala cɔlu kon te.

¹³Te vanndo yow pɛ vanndo cɔloo o ba[38], mì cɔlu kon yom pelei, te kon te mò vi vana ɲɔɔ kɔɔli, vana yow ndu-o bɛnda mò sala cɔlu pilaa.

¹⁴Kɛ te vana cɔloo o hɔl sulalii ken fula vana yow ndu-o o ba ni, o bɛnda mò sala ɲɛ-ɲɛ le. Te o salaa coo nda bɛnda telen o va ndu yowvo-o ni, sala o co kon yɔngu-o bɛnda ni mo kumbu sulalii ken.»

¹⁵«Te vanapɔnɔɔ pum hiŋ pɛ cuaambɔ laandu vana fula vɔ kɔɔli le nɔ loo hɔlla, mò va a ndu[39], o bɛnda mò dɔw ndu fulu, mò yil ndu o nɔ̀u nin.

¹⁶Te fuɲaa cua kon kɛɛ pɛ le cua ndɔɔ kɛsio o nɔ̀u ndu o ba, langbanɔ kon luɛi bɔnɔ o volion nin mɛɛ nda dema cuaambɔa laandua hiw-vɔ vanapɔnɔ kɔɔli le-a fulu dɔvɔɔ yɛ.

¹⁷La cɛl mì vanalanɔ mangalaa[40] va yoomu niaa tɛɛn te.

¹⁸Vana-vana hini pɛ a cɔloo, ndu bɛnda mò sɔla piɔ́mndo kangalan.

¹⁹Vana solul pɛ halaa celennda sálàlan, te o co yɛ Mɛlɛka le o solul sálàlan te, ndu bɛnda mò sɔla piɔ́mndo kangalan.

²⁰La sáángiaa mialaa co niaa o bɛngu coo-a le tɔnɔɔ solio nda o n'dial te, la luei nda mɔnɛi le. Kani niaa bɛɛ, mialla niaa yɔŋnun o lɛŋnde Esipte len nin ni.

²¹La luéi vanlaandua piaandaa ndaa vi-a a vííya mɔnɛi le.

²²Te la luei pɛ nda mɔnɛi, mà cɛɛŋun ya Mɛlɛka o lani, í tuei nda diom.

²³O kon, i tuulu kɔl a niaa, i tuisi niaa cɔwvo coo, la cuu vu kpow, haliko mi laandaa niaa bɛɛ nda siŋnun vanlaandua piaandaa ndaa vi-a, mì poaa niaa bɛɛ siŋnun vííya.

²⁴Te la yɔngu pɛ vana pilɛ o yungu nuu tɛɛn[41] volion kueo, vana ikɔɔ co niaa ikɛi-yo pɛɛn, la bɛnda mì la kuel ndu le ndu suukoo le. La tisa ndu vɛlɛ kɔɔli le niaa mun mingullo a tɔnɔ lecoo le.

²⁵Te la bii pɛ vanndo doma ndɔ bɛndoo o ba o landei nin, la bɛnda mì la mingul ndu doma ndɔ kon telen pá mì paalen le del.

²⁶Kani kola kuumbuan ndɔɔ co kon ni. Te la mingul ndu doma bɛndu kon te, o yɛɛ nin o simbulun yɛnin le lɔan? Te la mingul ndu ndu le, o cɛɛŋun pɛ ya o lani, í tuei ndu diom, kani Hala iɲííyo ya co ni.

²⁷La soaa diomnde vɔɔnnden a Hala le, la soaa diomnde vɔɔnnden a vana co simlacinɔɔ yungu niaa coo-o le.

²⁸La tamala le ya Hala ɲɛm tasen niaa kow o ciɛɔn niaan nin-ndon a mɔima niaama tasean yɔngoo le. La bɛnda mì la yɔngu ya poaa niaa tasea.

²⁹La bɛnda vɛlɛ mì la yɔngu ya cɔlua piaandua tasea cɔlua niaa koam-nda: nawva, saa a cuinnda. Te kalaa ndaa kom nda pɛ, a bɛnda mà lo nda ikɛi háá palɛi ndii ŋɔmmɛw. Kɛ o paale ŋɔmaandɔlen coo, la bɛnda mì la yɔngu ya nda.

³⁰La bɛnda mì la va vanaa diandaa le ya Mɛlɛka. Lelan, la dia visin cɔlu visia biyaa sɛɛsiaa-o le, la bɛnda mì la yɔngu tunnda visin mun.»