Read Kissi Fulaa 31 Bible Online

Fulaa 31 - Kissi bible

Fulaa 31

¹Mí Mɛlɛka soaa o Moise lo, mó dimul ndu aa:

²«Yaŋ nilan, i hɛli Bɛtsalɛl, po Uri-o, po imama Hur-o, fulaa o polale Yuda len coo,

³mí pei ndu a kɔl Hala-o haliko mo kendu kɔl, mò va vana caa baalaa, mò nɔ dɛnɛ sinaa, mò sina baala labaa taw,

⁴mò caa ɲɛm bɔɔ-bɔɔ cɔvɔɔ a sianion, a volin humbon a á daɲan.

⁵Hiovɔɔ o kon coo, mò caa powta báà kàlàlan siɔlɔɔ le lan holio, mò caa vɛlɛ yɔmnde siɔlɔɔ, mò caa baala labaa kpow.

⁶Vana ndɔ malaa co Oholiab ni, po Ahisamak-o, fulaa o polale Dan-nden nin. Handɔɔ o kon coo, i yɔngu vanaa caa baalala labalan-nda kpow dɛnɛ sinaa, haliko ma tiwba le ɲɛm ya dimul nɔm le cɔvɔɔ-on cɔwva.

⁷Ɲɛm mun co mun ni: cɛi-kola-toandaa-labɔɔŋianndo, kesu kpemaa, kumbu kesu kpema kon a ɲɛm co o cɛi-kola-toandaa-labɔɔŋian kon nin-ndon kpow:

⁸tabalio a ɲɛm ndɔn laandon, ɲɛ kɛsiaa lafitinaa cɔwnun a sianin diandan-ndo a ɲɛm ndɔn vallon, fonda loamaa cuɛima cun kɛndɔɔ,

⁹fonda loamaa sálà loamaa a ɲɛm ndɔn vallon kpow, fɛngɛ bɛndu mamɛnndo a fonda ndɔ kɛsiaa tumndo,

¹⁰volɔɔla ifalenndan a volɔɔla solia lasálàla Aarɔn-ndan, volɔɔla solia lasálàla poaa ndɔa, la nda vanin vownɔnndo le vali solia lasálàá tosaa lan,

¹¹cuɛima co le pɔlaa-an a lasikɔlɔ kɛndɛ-kɛndɔɔ le vallo o cɛi-kola-toandaa diandaa nin. Mì vanaa cɔawnin ɲɛm mun mà sɔndu volɔɔla lan-nda bii tɔŋnda ya yɔngu nɔm-ndan kpow le vali kon tosaa.»

¹²Mí Mɛlɛka dimul Moise sɔɔn mun aa:

¹³«Nɔm Moise, soo o Israɛlla lo ma dimul nda aa: ‹La bii palɛi pɛngiɛi a kɔlta niaalan kpow, kani le fɛɛn a fɛɛn, tɔɔmaseloo co kon naa tɛɛn naa niaa ni, le sinaa maa ya Mɛlɛka siinguu niaa vanaa diandaa ni.

¹⁴Lelan, la bii paale pɛngiaalen, kani paale diandaalen paale len le co le niaa ni. Vana-vana nɔɔliaa pɛ paale len, ndu sɔla piɔ́mndo. Kani vana-vana tosa pɛ baalaa lecoo, a solinin ndu Israɛlla tɛɛn po.

¹⁵Palɛi co ndii ŋɔmpum le baalalan kpede tosaa, kɛ paale ŋɔmmɛwndɔlen le co paale pɛngiaale dindin le Mɛlɛka len ni. Vana-vana tosa pɛ baala oo baala paale len, ndu sɔla piɔ́mndo.

¹⁶Israɛlla bɛnda mà bii paale pɛngiaalen, mà tosa mɛɛ tɔŋndo dimi le paale len yɛ. Kpema ya yii a niaa le fɛɛn a fɛɛn-ndo co kon ni.

¹⁷Tɔɔmasele kon vanin naa tɛɛn naa Israɛlla le fɛɛn a fɛɛn ni. Kani ya Mɛlɛka, i cɔw halataalaa a lɛŋnden o palɛi ndii ŋɔmpum bɛngu, o paale ŋɔmmɛwndɔlen coo, mí mal baalaa le pɛngio.›»

¹⁸Mɛɛ Mɛlɛka cii Moise sɔɔn mun dimul o pembei Sinai coo, mó yɔngu ndu powta yɛ́ndɛ́la kpemalan tan tiɔn, powta yɛ́ndɛ́la ndu Hala pila sɛva coo a suei ndɔɛi lan pɛɛn.