Read Kissi Fulaa 34 Bible Online

Fulaa 34 - Kissi bible

Fulaa 34

¹Mí Mɛlɛka dimul Moise aa: «Nɔm pila siɔl powta yɛ́ndɛ́lan tan tiɔn maa lataselan, mì sɛva sɔɔn va n'sɛvaa o latasela n pesi lan coo-on lecoo.

²Pena bɛɛndian siɔdii púŋ-púŋ, ɲɔɔ kandu dɔ́ɔ́ pɛ tengaa, a hel o pembei Sinai coo, a sim ya cum o pembei bollen.

³Hèl a vana-vana kɔɔli le, vana celen bɛnda mò va o pembei coo le. Hali cɔlua bɛnda mà va diólan o pembei ikɛi le.»

⁴Mí Moise sial powta yɛ́ndɛ́lan tan tiɔn maa lataselan. Diimandɔɔ idiiyo púŋ, mó hel o pembei Sinai coo mɛɛ Mɛlɛka pila dimul ndu yɛ, powta yɛ́ndɛ́la tiɔnnda o sɛl tan la va ndu o ba.

⁵Mí Mɛlɛka toal o kumii bɛndu-bɛnduei nin, mó sim Moise ikɛi, mó va diola ndɔla ndu pila lan veeloo.

⁶Mó kei Moise o hɔl a dimio aa: «Mɛlɛka! Mɛlɛka! Hala nɔ ɲííye a kɛndɛi taw-vo! I yala kɔl tuulu le, i nɔ kɛndɛi taw, Hala lo o lediom coo-o ya co ni.

⁷I lò dɛnɛ kɛndɔɔ tosaa háá mì lambilan la tiiya vàá pilɛ. I màl vana haki le dɛnɛ vɔɔndo, le tɛɛmbuuo a le hakio. Kɛ vana tɛɛmbuu pɛ tɔŋndo, i ce ndu vana lahakio. Nduyɛ, i lo cuawva soŋɔ̀ɔ́ háá o lambi yàándɔɔ, háá o lambi hiɔɔlundɔɔ bɛɛ, le yɔŋ vɔɔn fuɲaa ndaa mamaa.»

⁸Mɛɛ Moise tuei sɔɔn mun, mó tundun, mó baŋ vulan.

⁹Mó dimi aa: «Éé Maalii, te o va pɛ maa a ce ya ɲia lekɛ́ndɛi, mɛɛ i ɲɔɔlu nɔm, cɛl mì n kɔɛ naa niaa latulu, ma va naa tɛɛn. Ya bɛɛ, i sina nihau maa vanaa lanila kalua vannda ha co ni. Kɛ mal naa haki le tɛɛmbuu naa, le hakila naa n tosa lan. Bii naa mì n va cuavaa nɔmnda.»

¹⁰Mí Hala muli aa: «I co niaa kpemaa yiilu. I co kaamaalan tosa vannda ha kpow o hɔl, kabi bɛɛ kaamaala vaa lende la tosan-ndɔ o ceendo coo le, vanaa-mangalaa-isɔɔ súú-súù a ci vɔ dɛnɛ vaa lende le. I co lan tosa mì vanaa n co icali tɛɛn-nda ce mɛɛ dɛnnda ya Mɛlɛka co tosaa a ba nɔmndo lan la co dɛnnda kɔndɔfili yɛ.

¹¹Lelan, bii sɔɔn ya co nɔm hau dimullo-on kpáŋ. I co Kanannda, Amoriia, Hitiia, Perisiia, Heviia a Yebusiia tovɔɔ niaa laci.

¹²Kɛ la mandan dɛ! La tiiya pɛ o leŋnde niaa co kɔlan nin-nden nin, la yii kpema niaa vanaa niaa co komal lon-nda le, yɔŋii nda siŋnun yaŋɔɔlen le niaa.

¹³Niaa bɛnda ni mì la pesi máánnda ndalan, powta sálàla ndalan, mì la tɛɛmbuu tombun nda sooluu-on.

¹⁴La bàŋ vulan ɲɛ biilaa celen o labɛngunin te, kani ya Mɛlɛka, diola nilan la co ni aa ‹Vana paŋalaa›. Hala paŋalaa ya co ni.

¹⁵Lelan, la yii kpema niaa vanaa niaa co komal o lɛŋnde len nin-nda le. Te la yii pɛ kpemaa a nda, la laasian nda kɔɔli o piɔmaa ndaa sooloo nin, la de ɲɛ nda solul piɔmaa ndaa sálàá-o.

¹⁶Handɔɔ o kon coo, te la yii pɛ kpemaa a nda, la co cuavaa ndaa laandua yilɔɔ o nɔ̀lan le poaa niaa. Nduyɛ, cuavaa ndaa laandua lonin laasianndo o piɔmaa ndaa kan sooloo, mì poaa niaa bɛɛ a del nda kɔɔli a laasian pilɛ kon.

¹⁷La tééngiàà cilinnde mì la cɔw piɔmndo a ndi le.

¹⁸La tosa kafo bulu toosian a lɛvɛn too. O palɛi ŋɔmmɛvii kelun o paangii Abib-e nin-nde bɛngu kpow, la va bulu toosian a lɛvɛn too dioo kínɛí maa mɛɛ ya dimul niaa le tosaa yɛ. Kani o paangii ken nin niaa faŋan Esipte ni.

¹⁹Poaa tasea niaa kpow, le ya Mɛlɛka nda co ni. Te cɔloo kom pɛ kɔmnde taselen, te cuale piaandulen o kom ni, o va naw, o va saa, le ya o co ni.

²⁰Kɛ te sofɛlɔɔ kom cuale piaandulen ni, la baŋa cuale len a saa cuaa. Te la baŋa yɛ ndu le, la yem ndu kɛsei. Poaa niaa tasea nda, la bɛnda mì la baŋa nda. La hún ya o hɔl o Cɛi ni Diandaa nin bala fondo le.

²¹La tosa baalalan kpow o palɛi ndii ŋɔmpum bɛngu, kɛ paale ŋɔmmɛwndɔlen, la mal baalalan mì la pɛngi. O va telen lavayiaa, te kon te telen koavaa, la bɛnda mì la tosa baala o paale ŋɔmmɛwndɔlen coo le.

²²La tosa kafo koavaa telen niaa kandunin ɲɛm niaa vàá o ciɛɔn niaan nin-ndon kovɔɔ-o, ɲɛm tasen niaa koawnin-ndon pɛɛn. O vɔsio mɛɛlulan, la tosa kafo lakùùo.

²³Vanpiaandua kpow a bɛnda mà hin bɛmbɛ leyáá o vɔsio nin ya Maalii o hɔl, ya Mɛlɛka Hala Israɛlla pɛɛn.

²⁴Kani i toawnin vanaa-mangalaa-isɔɔa niaa laci mì cɔɔlu niaa lɛŋnden. Vana-vana yiyannin le lɛŋnde niaalen hiɔlɔɔ niaa kɔɔli telen niaa vanin luɛyɔɔ bɛmbɛ leyáá o vɔsio nin o cɛi-kola-toandaa ni diandaa nin-ndo le.

²⁵La sólùl-la sálàla n'cɔlulan a bulu toosian a lɛvɛnndo-o latulu le. La mándà visin cɔlu kafo-hiavaa-coo háá diimandɔɔ idiiyo le.

²⁶La bɛnda mì la kɔɛ a ɲɛm kɛndɛn tasen niaa koawnin o ciɛɔn niaan nin-ndon o cɛi-kola-toandaa diandaa Mɛlɛka-o nin, ya Hala niaa pɛɛn. La yaw cuin cuaa o mɛɛma kala ndɔan nin te[48].»

²⁷Mí Mɛlɛka dimul vɛlɛ Moise aa: «Sɛva sɔɔn ya soo mun-ndon le nɔm pila. Kani mun co kpema ya yiilu nɔm a Israɛlla-o ni.»

²⁸Mí Moise lo Mɛlɛka ikɛi o pembei coo lon háá palɛi belehiɔɔlu a malɔ belehiɔɔlu. O palɛi ken bɛngu, o di ɲɛdiaa le, o kol vɛlɛ le. Mí Mɛlɛka sɛva sɔɔn kpeman o powta yɛ́ndɛ́la Moise hel o ba lan coo, tɔŋnda tɔ́lan pɛɛn.

²⁹Mí Moise faŋan o pembei Sinai coo, mó toal. Powta yɛ́ndɛ́la tiɔnnda sɔɔn kpeman va n'sɛvaa coo lan la va ndu o ba. O ve sina maa hɔlaa ndɔa co tengaa ŋɛlɛngi-ŋɛlɛngi le suukan o suukan nda Mɛlɛka-o le.

³⁰Mɛɛ Aarɔn nda Israɛlla kpow a tofa ndu, má ca maa hɔlaa ndɔa co tengaa ŋɛlɛngi-ŋɛlɛngi. Má yɔŋ siòònde le sɔɔnguuo ndu ikɛi.

³¹O kon, mí Moise veelu nda. Mí Aarɔn a vanaa va bolii lapangɛi Israɛlla coo-a sɔɔnguu ndu ikɛi, mó downun nda kona.

³²O kon kɔɔli, mí Israɛlla kpow a sɔɔnguu ndu ikɛi, mó tɛɛngul nda tɔŋnda Mɛlɛka yɔngu ndu o pembei Sinai coo lan.

³³Mɛɛ o cii sɔɛi o nda lo, mó kuumbun kolaa o hɔl.

³⁴Te ndóò va pɛ luɛyɔɔ o cɛi-kola-toandaa-labɔɔŋianndo nin le suukanndo nda Mɛlɛka, ndóò faŋan kolaa o hɔl háá mì ndóò fula. Ndóò fula pɛ, ndóò tɛɛngul Israɛlla sɔɔn Mɛlɛka dimul ndu-on.

³⁵Israɛlla ndáà tofa pɛ Moise hɔlla, ndáà ce maa hɔlaa ndɔa co tengaa ŋɛlɛngi-ŋɛlɛngi. O kon, ndóò mingi kolaa kuumbɔn o hɔl, háá mɛɛ mì ndóò muungu le suukanndo a Mɛlɛka malan ndóò faŋa.