Read Kissi Fulaa 37 Bible Online

Fulaa 37 - Kissi bible

Fulaa 37

¹Mí Bɛtsalɛl sial kesu kpemaa a pɛngɛn akasia, bandei dunndo lediin a tálá, buo dunndo lepilɛ a tálá, simndan dunndo lepilɛ a tálá.

²Mó yikpa ndu a sianin diandan lenin a o kɔɔ, mó hol sianion o cɔcɔn ndɔn balɔɔ sɔ́.

³Mó cɔaw kelan mún hiɔɔlu a sianion, mó lɛɛnduu mun o pelun hiɔɔlun kesu kpema kon: kpengei pilɛ kelan n'sianion n'miun, kpengei pilɛi vɛlɛ n'miun.

⁴Mó sial yɔmii cuaa ndu-e a pɛngɛn akasia, mó yikpa ndi a sianion.

⁵Mó sɔaa yɔmii ken o kelan n'sianin mun nin o kpengun kesu kon, haliko mi vana nɔla ndu cuaa a ndi.

⁶Mó toosiaa kumbu kesu kpema kon a sianin diandan, bandei dunndo lediin a tálá, buo dunndo lepilɛ a tálá.

⁷Mó cua sianin fɛtufɛton, mó cɔaw mɛlɛkaa kanda ɲɛm Hala-on-nda nda ŋiɔn a mun, mó hol nda o kpengun mɛɛlan kumbu kesu kon coo.

⁸Mɛlɛkaa kan va a baalannda a kumbu kesoo latulu.

⁹Kumbannda ndalan la va lapɛɛngaalan coocoo fɛɛyɛlɛɛ le kumbu kesu kon kumbɔɔ, má mululan hɔlla vellaa-velle, má va tofaa o kumbu kesoo coo.

¹⁰Mí Bɛtsalɛl toosiaa tabalio a pɛngɛn akasia, bandei dunndo lediin, buo dunndo lepilɛ, simndan dunndo lepilɛ a tálá.

¹¹Mó yikpa ndu a sianin diandan, mó balu sianion holɔɔ o cɔcɔn ndɔn pindo.

¹²Mó tosa pɛngɔn bandei baa piasaa lepilɛ, mó balu sianion holio o cɔcɔn ndɔn pindo.

¹³Mó cɔaw kelan mún hiɔɔlu a sianion, mó lɛɛnduu mun o sɔngila hiɔɔlula ndɔlan nɛɛ pelun tabali kalaa hun ciiŋian a tabalio-a.

¹⁴O kelan co mun o pɛngɛn biyan ikɛi-yon nin ndáà bɛnda le yɔmii co le tabalio cuaa-e sɔɔ ni.

¹⁵Mó tosa yɔmii co le ndu cuaa-e a pɛngɛn akasia, mó yikpa ndi a sianion. Ndi va le tabali kalaa cuaa ni.

¹⁶Mó cɔaw ɲɛm-laandun va le kɛsio o tabali kon coo-on a sianin diandan, ɲɛm-laandun mun va mun ni: sɛtilan, taalala kólaalan, hɛngɛilan a fɛngɛla va le sálàla mamɔilan solio lan.

¹⁷Mó cɔaw ɲɛ kɛsiaa lafitinaa a sianin diandan fɛtufɛton, mó toosiaa ndu o baalanndo a tum ndɔɔ, a lɔɔla ndɔlan, a boondun ndɔn a á bonyun ndɔn latulu.

¹⁸Lɔɔlan la va laŋɔmpum: kpengei pilɛ layàá, kpengei pille layàá.

¹⁹Lɔɔ oo lɔɔ ndóò nɔ boondon mún yáá a kpufɔlan a ɲɛlan maa peengela yɔm amanndiee. Lende lɔɔla ŋɔmpumnda ɲɛ kɛsiaa lafitina kon la va ni.

²⁰Boondon va mún hiɔɔlu o sungbule ndɔle va tɛɛn-nden a kpufɔlan a ɲɛlan maa peengela yɔm amanndiee.

²¹Kpukpun kɛcanndon va o fondala lɔɔlan la hun bɔŋa latiɔn tiɔn-ndan o sungbule ɲɛ kɛsiaa lafitinaa-o.

²²Kpukpun kɛcan mun a lɔɔla lan kpede la va labaalanndan o ɲɛ kɛsiaa lafitinaa latulu. Lan kpow, a sianin diandan fɛtufɛton la cɔwnun ni.

²³Mó cua sianin diandan, mó cɔaw vɛlɛ fitinalan laŋɔmmɛw, a kpaɲala ndɔlan a bombola kɔandaa lapulta ndɔlan a mun.

²⁴Sianin diandan nda cɔw ɲɛ kɛsiaa lafitinaa a ɲɛm ndɔn laandon-ndon va kilolan beleyaa.

²⁵Mí Bɛtsalɛl tosa fonda loamaa cuɛima cun kɛndɔɔ a pɛngɛn akasia, maa kpakpa o va ni: bandei dunndo lepilɛ, buo dunndo lepilɛ, simnda ndɔlan dunndo lediin. Mó heelu kpɛɔn mún hiɔɔlu o sɔngila hiɔɔlulan, kpɛ̀ɛ́n mun va n'baalanndon a ndu pila.

²⁶Mó yikpa ndu lecoo, o kpengon a o kpɛɔn a sianin diandan, mó balu ndu sianion holɔɔ o cɔcɔn pindo.

²⁷Mó cɔaw kelan mún miun a sianion, mó hol mun o cɔcɔn lebɛngon coo o kpengun miunndon le yɔmii co le fonda loamaa macuɛi kon cuaa-e lueiyo lenin.

²⁸Mó tosa yɔmii ken a pɛngɛn akasia, mó yikpa ndi a sianion.

²⁹Mí vana caa cuɛiyan toosiaa-o bɛɛndiaa cuɛiyan le pɔlaa, mí vana caa ɲɛm cun kɛndɔn toosiaa-o toosiaa ansan cun kɛndɔɔ.