Read Kissi Fulaa 38 Bible Online

Fulaa 38 - Kissi bible

Fulaa 38

¹Mí Bɛtsalɛl toosiaa fonda-loamaa-lasálàá le sálà loamaa a pɛngɛn akasia, mó va ɲɛ pilɔɔ: bandei dunndo leŋuɛɛnu, buo dunndo leŋuɛɛnu, simnda ndɔlan dunndo leyàá.

²Mó toosiaa kpɛɔn mún hiɔɔlu o sɔngila hiɔɔlula ndɔlan, kpɛ̀ɛ́n mun va n'baalanndon a ndu pila. Mó yikpa ndu a daɲan.

³Mó cɔaw vɛlɛ ɲɛm-laandun fonda-loamaa-lasálà kon kpow a daɲan: bombola kɔandaa lapultan, peelelan, bonyon le koovan hawvo lenin, cukanila n'ciŋndan a bonyun nda fuusa-on.

⁴Mó lɔfa kpangba n'daɲaa a tɛɛngon le lueiyo o fonda-loamaa-lasálà kon nin, mó luei ndu lenin, mó tuisi ndu tiŋ tɛɛn.

⁵Mó cɔaw kelan mún hiɔɔlu, mó lɛɛnduu mun o sɔngila hiɔɔlula kpangba n'daɲa fonda-loamaa-lasálà kon le yɔmii vana cua ndu-e lueiyo lenin.

⁶Mó toosiaa yɔmii vana cua ndu ken-nde a pɛngɛn akasia, mó yikpa ndi a daɲan.

⁷Mó luei yɔmii ken o kelan o lɛɛnduu o sɔngila fonda-loamaa-lasálà kon-nde nin. Ɲɛ-ɲɛ ve o fonda-loamaa-lasálà kalaa nin te, fondo fúú o va lenin ni.

⁸Mó toosiaa fɛngɛ bɛndu n'daɲaa a ɲɛ fɛngɛ kon kɛsi tumndo nin-ndo. A tofannda vanlaandua vá baala ndaa tosaa o cɛi-kola-toandaa-labɔɔŋianndo sondoo-a o toosiaa ndu ni.

⁹O kon kɔɔli, mó kunga bɛ́ɛ̀ cɛi-kola-toandaa diandaa: kpengii Nekɛv-ve, a ba too pɛɛn, mó tuu fondaa dunndo kɛmɛ, mó kunga fonda kon a kolala keesela kɛndɛ-kɛndɛlan.

¹⁰Sungbuma bidiimma kolala lan láà lɛɛndun-ndan a fondala bidiinnda máà kɛsi tumndan nin-ndan la va lacɔavaalan a daɲan. Bawla va o sungbuma man-ndan a kpɔlɔnnda ndalan la va lacɔavaalan a volin humbon.

¹¹A maluaŋ, mó tuu fondaa dunndo kɛmɛ, mó kunga fonda kon a kolala keesela kɛndɛ-kɛndɛlan. Sungbuma bidiimma kolala lan a fondala bidiinnda máà kɛsi tumndan nin-ndan la va lacɔavaalan a daɲan. Bawla va o sungbuma man-ndan a kpɔlɔnnda ndalan la va lacɔavaalan a volin humbon.

¹²A ba paalen le del-lo, mó tuu fondaa dunndo beleŋuɛɛnu, mó kunga fonda kon a kolalan, mó lɛɛnduu lan o sungbuan tɔ́, máà nɔ tumndan o fondala kɛsiaa latumndan tɔ́ nin. Bawla sungbuma man a kpɔlɔnnda ndɔlan la va lacɔavaalan a volin humbon.

¹³A ba paalen le can-ndo, kuunga bɛɔ va buo dunndo beleŋuɛɛnu.

¹⁴Cɔnɔnndo o sɔngi co o dio kunga bɛɛ kon ikɛi-yo, kɔ tiiya o dio kunga bɛɔ, ɲɔɔ va bandei dunndo tɔ́ a leŋuɛɛnu, mó lɛɛnduu kolalan o sungbuan man yáá, máà nɔ tumndan o fondala kɛsiaa latumndan tan yáá nin.

¹⁵Cɔn vɛlɛ o sɔngi co kpengei pilɛi-yo, kɔ bii o dio kunga bɛɛ kon, ɲɔɔ va vɛlɛ bandei dunndo tɔ́ a leŋuɛɛnu, mó lɛɛnduu vɛlɛ kolalan o sungbuan man yáá, man bɛɛ máà nɔ tumndan o fondala kɛsiaa latumndan tan yáá nin.

¹⁶Kolala ndáà lɛɛnduu o kunga bɛɛ kon-ndan kpow, kolala keesela kɛndɛ-kɛndɛlan la va ni.

¹⁷Fondala sungbuan máà kɛsi tumndan nin-ndan la va lacɔavaalan a daɲan. Kɛ bawla va laholiaalan o sungbuma man-ndan a kpɔlɔnnda tomboliaa lan le simndan yili-an la va lacɔavaalan a volin humbon. Bolii masungbuei ndi, i va iholiaa a volin humbon. Sungbuma bɛɛ kon kpow ma va maciiŋian a kpɔlɔnnda cɔwnun a volin humbon-ndan

¹⁸Kola-landaa va o dio kunga bɛɛ kon-ndo va o lɔa a kɛila nda yin a kaan-ndan, a kɛila siaŋala sɔɔtɔtɔlan a kɛila siaŋala vólotótolan, a kola keese kɛndɛ-kɛndɔɔ. Bandii kola kon va dunndo bidiin, simndan dunndo leŋuɛɛnu maa kolala tɔ̀la kunga bɛɔ.

¹⁹Sungbuma hiɔɔluma va o dio kon-ndan a fondala hiɔɔlula máà kɛsi tumndan nin-ndan la va lacɔavaalan a daɲan. Bawla va laholiaalan o sungbuan-ndan a kpɔlɔnndan la va lacɔavaalan a volin humbon, mí bolii masungbuei ndi va iholiaa a volin humbon.

²⁰Pikin nda tɔl le Calta Mɛlɛka lan tondɔɔ-on a pikin nda tɔl le kunga bɛ́ɛ̀ ndɔɔ tondɔɔ-on kpow va n'cɔavan a daɲan.

²¹Ɲɛ-sɔlaa luɛi o Calta Mɛlɛka lan tangullo nin-ndo yɔŋnun hoo ni, Calta Mɛlɛka la powta yɛ́ndɛ́la kpema diandaa la va nin-ndan pɛɛn, ɲɛ-sɔlaa Moise dimul polale Levii len le cɔmndo-o. Itamar, po Aarɔn-ndo sim nda laci le bolofaa kon cɔmndo ni.

²²Mí Bɛtsalɛl, po Uri-o, po imama Hur-o, fulaa o polale Yuda len nin, tosa ɲɛ-ɲɛ Mɛlɛka cɔm Moise le tosaa.

²³Vana ndɔ malaa yɔŋnun Oholiab ni, po Ahisamak-o, fulaa o polale Dan-nden nin. Oholiab ndóò caa ɲɔɔn tuuvo a kolaa lɔu, ndóò lɔa kɛila nda yin a kaan-ndan, kɛila siaŋala sɔɔtɔtɔlan, kɛila siaŋala vólotótolan a kɛila kola keesoo ni.

²⁴Sianin nda luei o tangullo nin a o ɲɛm-laandun cɛi-kola-toandaa cɔwva nin-ndon, n nda cɔm Mɛlɛka-on va kilolan kɛmɛ leŋɔmaa a belaŋɔmmɛw a laŋɔmmɛw a kalamulan kɛmɛ leyáá. A ɲɛ tuvaa nda va ɲɔɔn tuuvo o cɛi-kola-toandaa diandaa nin-ndo nda tuu mun ni.

²⁵Volin yɔngun telen ndáà va sɛ́lɛ́ Israɛlla sɛvaa-on va kilolan vàála yaa a tɔ́ a laŋɔmmɛw a kalamulan kɛmɛ leŋɔmmɛw a beleŋuɛɛnu. A ɲɛ tuvaa va o Cɛi-Diandaa nin-ndo nda tuu mun ni.

²⁶Vana piɔw pɛ ɲɛ-sɔlaa kon le kunda vanpiaandua vaala kɛmɛ leŋɔmpum a layàá a kɛmɛ leŋuɛɛnu a beleŋuɛɛnua sɛvan-nda, aa nɔ vɔsilan kandɔɔ bidiin háá hiow o kon coo-a, o nɔla mò va maa o vanaa kan nin, vana-vana yɔngu kalamulan laŋuɛɛnu.

²⁷Má cɔaw fondala kɛsiaa latumnda kɛmɛla Cɛi-Diandaa a fondala sungbuma kola-landaa ma kɛsi tumndan nin-ndan a volin humbon kilolan vàála yaa, mɛɛ le fonda kɛsiaa tumndo o pilɛ cɔvɔɔ, a luei kilolan beleyaa.

²⁸Volin humbun kilola tɔ́ a laŋɔmmɛw a kalamula kɛmɛ leŋɔmmɛw a beleŋuɛɛnula lo latɔ̀lan yɛ, má cɔaw bawla nda holi o sungbuan-ndan, kpɔlɔnndan a bolii masungbuei a mun.

²⁹Mí vannda ndáà yɔngu Mɛlɛka daɲan kilolan vàála tiɔn a kɛmɛ a bidiin a lahiɔɔlu.

³⁰Má cɔaw fondala sungbuan maa bɛnda le tumndan kɛsio nin-ndan o dio cɛi-kola-toandaa-labɔɔŋianndo, fonda-loamaa-lasálà n'daɲaa, kpangbàà n'daɲa ndɔɔ, ɲɛm ndɔn laandon kpow,

³¹fondala kɛsiaa latumnda sungbuma kunga bɛɔ kpow, a sungbuma dio kunga kon, pikin co le Calta Mɛlɛka lan tondɔɔ-on a pikin co le kunga bɛ́ɛ̀ ndɔɔ tondɔɔ-on kpow a daɲan mun.