Read Kissi Fulaa 4 Bible Online

Fulaa 4 - Kissi bible

Fulaa 4

¹Mɛɛ Hala soo lende, mí Moise mulul ndu aa: «Kɛ a laalannin ya le, a yeŋnin bɛɛ lani o sɔɛi nii le. Kani a co ya dimul aa: ‹Còòlan fúú, Mɛlɛka cɔmnun nɔm te.›»

²Mí Mɛlɛka ɲuna ndu aa: «Yɛɛ nɛ co yɛ hoo nɔm o ba?» Mí Moise muli aa: «Tindaa.»

³Mí Mɛlɛka dimul ndu aa: «Vúú vɔ ndu lɛŋ.» Mó vuu ndu lɛŋ. Mí tinda kon mangalan kɛwvo. Mí Moise ɲaanun ndu.

⁴Kɛ mí Mɛlɛka dimul ndu aa: «Siɛndi baa mà saa ndu puilen, mà cua ndu.» Mó Siɛndi baa, mó bii ndu. Mɛɛ o cua ndu, mó siŋnun vɛlɛ tindaa ndu o ba.

⁵Mí Mɛlɛka dimul ndu aa: «Hee n tosanin ni mì Israɛlla sina maa Hala fuɲaa ndaa mamaa Abraham, Isaak a Yakɔb cɔmnun nɔm lekɛ́ndɛi ni.»

⁶Mí Mɛlɛka dimul vɛlɛ ndu aa: «Handun-ndɔ baa o takpa.» Mó handu. Kɛ mɛɛ o faŋa, mó ca ndu o humbu fo-fo maa fengbɔ, nàà siaŋaa va ndu o tivaa sɔ́.

⁷Mí Mɛlɛka dimul ndu aa: «Mingi baa handɔn o takpa.» Mó mingi handɔɔ. Mɛɛ o faŋa, mó ca mí baa muungu o kɛndɛ ningili maa falun ndɔn tɔ̀un.

⁸Mí Mɛlɛka dimul ndu vɛlɛ aa: «Taa tosa pɛ kaamaa tasoo mì cuavaa Israɛlla bii sɔɛi nɔmnde le, a tosa kaamaa diinndɔɔ. O kon nin, a biinin nɔm diom.

⁹Kɛ taa cii pɛ kaamaala tiɔnnda lan tosa mà kɛɛ le sɔɛi nɔmnde laalanndo, a kɔndu mɛmma pee bɛndoo Nil, a cuiŋi man o kɔngɔ. O kon, mɛmma n kɔandunin man o peo Nil nin-ndan ma mangalannin koovan o kɔngɔ.»

¹⁰Mí Moise dimul Mɛlɛka aa: «Hee kendu dɛ Maalii! Kani o co vana nɔla isɔɔ a mayoomu o luŋ te ya co le. Kabi paandu i cee isɔɔ le, nɔm pila sina maa kabi n kandu sɔɛi o ya lo, i nɔla sɔɛi taw le.»

¹¹Mí Mɛlɛka ɲuna ndu aa: «Nɛ̀ɛ́-nɛ̀ yɔngù yɛ vanacieo sondoo le sɔɛi? Nɛ̀ɛ́-nɛ̀ nɔlà yɛ mò siinguu ndu bobonɔɔ, te kon te vana nila baŋulɛiyo? Nɛ̀ɛ́-nɛ̀ nɔlà yɛ mò kumbi ndu hɔltan le cɔu, te kon te mò suumiaa ndu? O co ya Mɛlɛka le?

¹²Nɔm kɔ ma kɔaa tuŋ. I vanin nɔm ikɛi telen n vanin sɔɛi-yo, mì cɔm nɔm ɲɛ n bɛnda le dimio-o.»

¹³Mí Moise dimul Mɛlɛka aa: «A yandi Maalii, viom vana celen n yeemanin le viomɔɔ-o.»

¹⁴Mí Mɛlɛka tuulu kɔl a ndu, mó dimul ndu aa: «Aarɔn bɛ nɔm leviinɔ co macoaa lon te? I sina maa ndu caa sɔɛi taw. O co nin bɛɛ hunɔɔ nɔm diomɔɔ. Lɔ́ɔ́ o canin nɔm-ndo, o naŋnin kɔl taw.

¹⁵O kon, a soo o ndu lo, a cɔm ndu sɔɛi-sɔɛi o bɛnda le dimio. Telen niaa vanin kon sɔɛi-yo, ya pila vanin niaa ikɛi, mì cɔm niaa ɲɛ niaa bɛnda le tosaa-o.

¹⁶Ndu Aarɔn cuanin fonda nɔmndo le sɔɛi o Israɛlla lo ni. Ndu vanin sondo nɔmndo ni, mì nɔm va maa Hala le ndu sɔɔn o bɛnda le vannda tɛɛngullo-on dimullo.

¹⁷Bii tinda co hoo nɔm o ba-o. A ndu n vanin dɛnnda kaamaalan tosaa ni.»

¹⁸Mí Moise faŋan ndon, mó muungu o Yetro lefu ndɔ lo, mó dimul ndu aa: «I co muungu o lɛŋnde Esipte len nin, mì kɔ kpɛngbɛla puapilɛa niaa, le sinaa taa co vɔ pɛ yoomu.» Mí Yetro mulul ndu aa: «Màá kɔ va kɛndɛ!»

¹⁹Moise va vɔ Madian ndon, mí Mɛlɛka dimul ndu aa: «Cɔn ma muungu Esipte, kani vanáà yeema le nɔm diyɔɔ-a kpow a cuu vu.»

²⁰Mí Moise cua laa ndɔ a poaa ndɔa, mó heelu nda o sofɛlɛ ndɔɔ coo le muungoo Esipte. Mɛɛ o va kɔlan, mó cua tinda Hala-o o ba.

²¹Mí Mɛlɛka dimul ndu aa: «Taa muungu pɛ Esipte, kaamaala ya yɔngu nɔm kpaayaa le tosaa lan kpow, a bɛnda ma tosa lan Faraɔnnɔɔ o hɔl. Kɛ i kindinin Faraɔnnɔ kalaa nilan háá mò kɛɛ le Israɛlla malɔɔ kɔlan.

²²O kon, a dimul ndu aa: ‹Mɛlɛka dimi aa: po ni tasoo, ndu co Israɛl ni.

²³I dimul nɔm le ya ndu mello mò kɔ tosal-la baalaa, kɛ má kɛɛ le ndu malɔɔ. Lelan, i co tosa mì po nɔm tasoo sɔla piɔ́mndo.›»

²⁴Tuma nda va muungoo Esipte-o, mí Mɛlɛka tisa Moise coo le ndu diyɔɔ nɛɛ nda kei malɔ-a.

²⁵O kon, mí Sefora laa ndɔ cua pow luɛyaa tɛm-tɛmndo, mó dii po ndɔɔ tooma, mó piilian Moise pɔnɔ ndɔ bɛngulan a yáw o kelu kon o dialii kolaniŋii po ndɔɔ-e, mó dimul ndu aa: «Pɔnɔ makongoo n co le ya ni.»

²⁶O kon, mí Mɛlɛka mal Moise. Mí Sefora veelu pɔnɔ ndɔ aa: «Pɔnɔ makongoo» le tooma kon.

²⁷O kon kɔɔli, mí Mɛlɛka dimul Aarɔn aa: «Cɔn ma kɔ diom Moise o lɛŋnde veselɛilen nin.» Mí Aarɔn can, mó kɔa Moise diomɔɔ. Mó kɔ komal ndu o pembii Hala-e[9]. Mɛɛ o ce ndu mó kɔman ndu vɔkuu.

²⁸Mí Moise downun ndu kona, mó cɔm ndu la vaa lon. Mó dimul ndu sɔɔn Mɛlɛka vem ndu le kɔlan dimio Esipte-on kpow a sɔɔn kɔndɔfilin o yɔngu ndu kpaayaa le tosaa-on.

²⁹O kon mí Moise kɔa nda Aarɔn, má kɔ cuungiaa kaasoŋaa kɔlkalua Israɛlla.

³⁰Mí Aarɔn downun nda kona, mó dimul nda sɔɔn Mɛlɛka dimul Moise-on kpow, mó tosa vɛlɛ kaamaala lan nda a Israɛlaa tɔ̀a kpow o hɔl.

³¹Má laalan kpow, má sina pɛngu maa Mɛlɛka ce mɔnɛi nda co nin-nde, mó hun le nda baŋaa. O kon mí nda kpow baŋ vulan, má hini Mɛlɛka o labɛngunin.