Read Kissi Fulaa 5 Bible Online

Fulaa 5 - Kissi bible

Fulaa 5

¹O kon kɔɔli, mí Moise nda Aarɔn a kɔa o Faraɔnnɔɔ lo, má dimul ndu aa: «Mɛlɛka, o co Hala Israɛlla-o dimi aa nɔm mal cuavaa ndɔa mà kɔ tosa kafoo o lɛŋnde veselɛilen nin le ndu biiloo.»

²Mí Faraɔnnɔɔ mulul nda aa: «Nɛ̀ɛ́-nɛ̀ co yɛ Mɛlɛka, o niaa yeema kon mì bii diom ndɔɔ le Israɛlla malɔɔ kɔnndan-ndo? I sina Mɛlɛka kon te, i melnin vɛlɛ Israɛlla kɔlan te.»

³Má dimul ndu aa: «Hala Hebreea cɔmnun naa ni. Lelan, mal naa mì n kɔɛ kɔla palɛi yaa o lɛŋnde veselɛilen nin, mì n kɔ solul Mɛlɛka naa sálàlan, yɔŋii o cii naa a nàà n'kɔnyaa, te kon te a cɔwvo.»

⁴Mí masaa Esipte ɲuna nda aa: «Moise niaa Aarɔn, le yɛɛ niaa co yɛ vannda faŋaa o valta ndalan nin? La kɔ o kpekula niaalan nin.

⁵La sina maa vannda ha kui nin kuiyo pila o lɛŋnden nden nin. Le yɛɛ niaa hin yɛ le nda faŋaa o valta ndalan nin?»

⁶Paale len, mí Faraɔnnɔɔ dimul mɛlɛsoŋnda a Israɛlaa va kundala vanaa baalaa bollen-nda aa:

⁷«La va lɛ Israɛlla foeende yɔngoo le kpilikion lɔu mɛɛ niaa yɔngu nda ndi paandu yɛ le. Nda pila va nin kɔlan ndi nuwviaa.

⁸A bɛnda vɛlɛ mà va kpilikion lɔu maa paandu, la faŋal nda ɲɛ-ɲɛ lecoo le. Kani vanaa siɛlɛiya pila nda co ni, lelan nda co koŋullo ni, mà va dimio aa: ‹N co lakɔ Hala naa sálàlan solul.›

⁹La cɔɔlu nda baalaa kuilul, mì la kindila nda le ndu tosaa. Te vallo kui pɛ nda o ba taw, a co pɔɛɛnɔn a sɔɔn lacòòvan nda co nda dimullo-on.»

¹⁰Mɛɛ mɛlɛsoŋnda a Israɛlaa va kundala vanaa baalaa bollen-nda fula o Faraɔnnɔɔ lo, má kɔ dimul Israɛlla aa: «Masaa handu tɔŋndo maa vana kɔa lɛ mò kɔ kondul niaa foeende le kpilikion lɔu le.

¹¹Niaa pila va nin kɔlan ndi nuwviaa, nɛɛ-nɛɛ niaa salun pɛ ndi, la kɔndu. O kon kɔɔli, mɛɛ mì la suili kpilikion lɔu mɛɛ niaa va mun paandu suilio lɔu yɛ, ɲɛ-ɲɛ faŋan lecoo le.»

¹²O kon, mí Israɛlla sɛŋin o lɛŋnde Esipte len nin kpow le foeende nuwviaa a le ndi kɔndɔɔ mà hin a ndi.

¹³A kon kpow, mɛlɛsoŋnda va nda kɔɔli a kpɛlɛkpɛlɔɔ, má va nda dimullo aa: «La siow baalaa tosa. Lepalaa-lepala, fɔ mì la suili baalaa tosaa mɛɛ niaa tosa ndu paandu telen nda va niaa foeende nuwviallo-o yɛ.»

¹⁴Má va bɛɛ Israɛlaa va kundala vanaa baalaa bollen-nda lɔɔ, à mɛlɛsoŋaa kan ndáà handu Israɛlla coo-a pɛɛn. Má va nda dimullo aa: «Le yɛɛ nɛ la co vaalio kpilikion suili lɔu mɛɛ niaa lɔa mun paandu yɛ le?»

¹⁵Mí vanaa va kan bolle kundala vanaa baalaa coo-a kɔ cɛɛŋun o Faraɔnnɔɔ lo, má dimul ndu aa: «Le yɛɛ n co yɛ naa vanaa baalaa nɔmnda bɛpɛlaa ho nuaa?

¹⁶Vana co lɛ naa ifoeen cuu le. Nduyɛ a co naa dimullo aa naa n lɔ kpilikion, a co vɛlɛ naa soŋɔ̀ɔ́ pila. Hakio vanaa nɔmnda co cuaa a naa nuaa ni dɛ!»

¹⁷Mó mulul nda aa: «Vanaa siɛlɛiya niaa co ni. Toɲaa, vanaa siɛlɛiya niaa co ni. Lelan niaa co dimio ni aa la co lakɔ Mɛlɛka sálàlan solul.

¹⁸La tamala vɔ le muungoo o vallo nin. Vana-vana nuwvial lɛ niaa foeende le. Nduyɛ fɔ mì la suili kpilikion lɔu mɛɛ niáà lɔa mun paandu yɛ.»

¹⁹Mɛɛ Israɛlaa va kundala vanaa baalaa bollen-nda tuei sɔɛi ken, má sina maa a kɔndu dɛnɛ. Kani má dimul nda aa fɔ mà suili kpilikion lɔu mɛɛ ndáà lɔa mun paandu yɛ. Lepalaa-lepala, fɔ mì ndáà cii baala ndáà kilu nda le paale len-ndo kpow.

²⁰Mɛɛ nda fula o Faraɔnnɔɔ lo, má komal Moise nda Aarɔn, a va nin bɛɛ nda cumndo.

²¹Má dimul nda aa: «Màá Mɛlɛka mɛɛndan dɛnɛ niaa tosa hoo-o, mò kilul niaa yamɛi fɔ́! Niaa, la kondul naa dɛnɛ dɛ! Niaa siinguu naa vanaa vɔɔnda Faraɔnnɔɔ nda vanaa ndɔa baalaa o hɔl ni. Mɔɔn cɔwvon niaa sɔɔ nda o ba nuaa ni le naa diwvo.»

²²O kon mí Moise kɔ ɲuna Mɛlɛka aa: «Éé Maalii! Ɔ́ɔ̀ dɛnɛ n kondu hoo vannda ha-o? Le yɛɛ n vem yɛ ya?

²³Kabi ya hun soo Faraɔnnɔɔ o lani o diola nɔmndan, saangiaa o co nin Israɛlla-o co o bɔɔ. Nɔm Maalii yɛ, a muli bɛɛ le nda solio o sanga kon nin te.»