Read Kissi Yɔb 11 Bible Online

Yɔb 11 - Kissi bible

Yɔb 11

¹O kon, mí Sofar fula Naama-o cua sɔɛi, mó dimul Yɔb aa:

²«Vɛ̀ɛ̀ sɔɔn sondo yeelɛin vaa nuaa n bumba pa mulio sɔla? Vana caa isɔɔ sɔla pá dio le tombola ndɔɔ?

³Bàà sondo nɔm yeelɛiyo kuunanin caanda sɔɛi ni? Vɛ̀ɛ̀ mì nɔm lo caanda mamɔɔ, nɔm vana tuisi nɔm lasiɛmbu le?

⁴A dimi aa: ‹Kela nuu dendu. I nɔ sɔŋ nɔm Hala o hɔl te.›

⁵Àá, te Hala ndóò cɛl pɛ le seile len timbio! Te ndóò kumbi pɛ sondoo, mì ndóò soo,

⁶mì ndóò cɔm nɔm sɔɔn viannaŋun Kɔlkalon, sɔɔn hiow mún sinapɛngu vanndacieea-on pɛɛn, nɔm pila va sina maa Hala pɔɛɛnun hakila nɔmndan lapum.

⁷A nɔ o kɔl maa a nɔla yiyannda Hala lan kpede sinaa? A co yiyanndo maa a nɔla ma saalun peelɔn Hala nɔ Kpaayaa-Kpow-vo-o?

⁸Peelɔn ndɔɔ co o helaa coocoo maa halataalaa. Vɛɛ nɛ n yɔŋ yɛnin? O hiow ciee-piɔ́m yingilaa. Yɛɛ n sina yɛnin lenin?

⁹Peelɔn ndɔɔ hiow lɛŋnden bandei, o hiow vɛlɛ mɛmma ihɛllan pɛngɛlanndo.

¹⁰Te ndu Hala va pɛ hiownɔnndo, mò kei vanndo biyɔɔ le ndu malɔɔ o kaasoo, mò kɔɛ a ndu o fonda ndɔ kialaa n'yamaa, nɛɛ nɔla yɛnin mò simul ndu?

¹¹Kani o sinà vanaa fondoa, o sanga bɛɛ mɛɛndan te mò ce dɛnɛ vɔɔndo[14].

¹²Kɛ diɔm sondo vesɛiyo ndu kindu kɔl te tuŋ. Te o kiandunin pɛ kɔl, mɛɛ sofɛlɛ yondoo siŋnunnin cɔlu cieeninndo[15].

¹³Kɛ nɔm, mingi kɔl nɔmndo o Hala lo sanaa, tɛilul ndu balan mà piɛi ndu.

¹⁴Te bala nɔmndan la co pɛ lanɔɔlɛilan a dɛnɛ vɔɔndo, mɛɛ pulu lan ma kpakpala dɛnɛ vɔɔn kon, cɛ̀l mì dɛnɛ sandaa lepɛŋndo cal o nɔm ndo cɛinin lɔ́ɔ́-lɔ́ɔ̀ le.

¹⁵O kon, a heelunin hɔlla, kani a nɔnin sɔŋ te. A simnin yili, siòòŋii biinin nɔm te.

¹⁶A pɔɛɛnunnin sanga nɔmndo, o hiawnunnin mɛɛ mɛnndan má hiaw o peelo nuaa yɛ.

¹⁷Ceen nɔmndo tenganin mɛɛ ɲɔɔ tenga a paale kalalen nuaa yɛ, mì ɲumndan ma dendu mɛɛ ɲɛ-tengaa idiiyo diandu nuaa yɛ.

¹⁸A sɔlanin vɛlɛ kɔlkɛsiaa, kani tiindanndo vanin le nɔm. Hali siɛmbulan la bii nɔm bɛɛ nuaa, kɛ a hininnin, mà lɔlnun fɛ́ɛ́.

¹⁹Tuma n vannunnin pɛngio-o, vana-vana tɔɔndannin le nɔm kpeeŋiaa le. Vannda taw a kindinnin le nɔm hɛnanndo.

²⁰Vanaa kɔlvesɛiya nda, hɔlta ndalan la sanganin a malaa nuwviaa, kɛ a sɔlanin mala le, tiindan nda mɛɛlaa koni vanin le kɔllo malnɔnndo ni.»