Read Kissi Yɔb 15 Bible Online

Yɔb 15 - Kissi bible

Yɔb 15

¹Mí Elifas fula Teman-ndo cua sɔɛi, mó dimi aa:

²«Vana kɔlkaloo muli pá sɔɛi o diɔmnde nin? O dɔawnun pá balo a hoeiye?

³Bàà a sɔɔn taaninndon n co cɛwnɔnndo ni? Vɛ̀ɛ̀ a sɔɔn fondon n co kindikindinndo ni?

⁴A co laalanndo laasiaa a tombola nɔmndo ho. A co siòòŋii Hala-e tɛɛmbuuo a sɔɔn nɔmndon.

⁵Yɔŋ vɔɔn nɔmndo co nɔm viomɔɔ sɔɔn mun diomio ni, sɔɔn vanaa kɔlkalu vɔɔnda n co dimio ni.

⁶O co ya le, sondo nɔm nɔm pilaa yaala nɔm ni. Cɔcɔn nɔmndo vɔvi nɔm ni.

⁷Bàà nɔm co Adam ni, vanaciee tase cɔwnun-ndo? Vɛ̀ɛ̀ nɔm óò velun nin tuma pá mí pembon cɔawnun?

⁸Bàà sɔɔn viannaŋun Hala-on nɔm yaŋnun ni? Vɛ̀ɛ̀ le nɔm pilɛ kpé kɔlkaloo co ni?

⁹Yɛɛ n sinà yɛ, o naa n sínà loo? Yɛɛ nɔm bii yɛ bila, o naa n nɔla bila biyɔɔ loo?

¹⁰Vannda co naa tɛɛn a yulunnde, vanaa yuuvɛi-yuuvɛiya, Á hiow fuɲa nɔm viovɔɔ yoomu polon-nda pɛɛn.

¹¹Mɛɛ a laalan maa kɔlkalu nɔmndo hiow a ɲɔɔlu Hala co hoo nɔm keiyo a sɔɔn naan yeelɛiyon-ndo?

¹²Le yɛɛ n co yɛ mulio a kɔltuwvo nuaa? Le yɛɛ n co yɛ naa ɲùùlan-ndan?

¹³Bàà Hala n co mululɔnndo a nɛyɔn nɔmndo ni? A ndu n co sɔɔn mùn solinndo o sondo ni?

¹⁴Yɛɛ vanacieo co yɛ le cɔnnɔnndo o diandaa? Yɛɛ hɔ́ɔ́ fula vanalanɔɔ o ipulu-o co yɛ le cɔnnɔnndo o sandaa?

¹⁵Hala laalan mɛlɛkaa ndɔa le, halataalaa dindu ndu o hɔl te,

¹⁶vɛ̀ɛ̀ o laalan yɛnin vanacieo, ó laasian hoo mó fula o báánin-ndo? Ó co hoo dɛnɛ sandaa lepɛŋndo kolɔɔ maa mamɛn-ndo!

¹⁷Ya, i co nɔm isɔɔ tɛɛsial, lelan yaŋ ya nilan. I co nɔm ɲɛ ya ce-o cɔm.

¹⁸Pɛɛkù vanaa kɔlkalua yɔngù-o, o nda bɛɛ sɔla fuɲaa ndaa mamaa o ba-o, a co vannda ndu pɛɛkoo, a co ɲɛ-ɲɛ vionɔɔ le.

¹⁹Nda daama Hala ndóò ke lɛŋnden ni, tuma kon, mial oo mial ndóò luei-yɔ nda tɛɛn te:

²⁰O dɛnɛ palaa nin vana kɔlvesɛiyo co lepalaa-lepala o ceen ndɔɔ nin. Vɔsila vana yɔŋ vɔɔndo la nɔ pɛɛngulan.

²¹Ɲɛm vueinanndon co sɔɛi ndu o lani. Tuma o vànnùn o kɔlɲuloo nin-ndo, vana tɛɛmbua kuel ndu.

²²O laalan-ndɛ maa o nɔlanin ɲumndan hiɔlɔn te. Piɔ́mndo co ndu mɛngɛlaa o mɔɛi cɔwve bɛngu.

²³Duàá o n'cɔcɔ o mɛɛlunin ni. O nɔla lɛ sikaa a ken te: tambii ndɔɛi bendu lɛ le[17].

²⁴Palɛi dɛnɛ palai co hunɔ̀ɔ̀-e pei ndu cá a siòònde. Kɔl yulan-yulanndo a kɔl laasi-laasio tol ndu coo maa vanaa cɔvaa masanɔ bɛɛndian le cɔwvo-o.

²⁵Kani o heelu baa mó ciŋilan Hala, o tiŋ Vana-Kpaayaa-Kpow.

²⁶Mó va Hala kuello a lebol kpɛ́ɛ́nɛ̀nɛ̀, kani o va kɔ̀ɔ̀ cɔw ndɔ celulaa tiindanndo

²⁷Hɔlla va ndu a ningilaa ɲɛkɛndɛi. Diallon va ndu n peelaa cá-cá.

²⁸Mó kɔ cal o kobila va latambɛilan-ndan nin, mó kɔ luɛi o cɛila vana ve lɛ nin te lan nin, cɛila va nin le koombiaa lan pɛɛn.

²⁹O síŋnùn ndɛnin vana bolofaa le, ɲɛ-sɔlaa ndɔɔ viw lɛnin ndu o ba le. O nɔ lɛnin mayoomu o lɛŋnden coo le.

³⁰O helunnin ɲumndan lɔ́ɔ́-lɔ́ɔ̀ le[18]. O vanin maa yɔm yinnden le cii tɛyun ndɔn loomɔɔ-o, Hoeyii Hala-e viwanin ndu o lepilɔɔ polon.

³¹O tiindan pɛ kafala ndɔlan, mɛɛ ndu pila palan, kani mɛɛ kafala ndɔlan la co yɛ koni o sɔlanin sala ndɔɔ ni.

³²Ken tosannin lɔ́ɔ́ pá mí palɛi ndɔɛi cuu. Tɛyun pui lɛnin te.

³³O siŋunnin maa rɛsɛn tum rɛsɛŋun ndɔn co cɛɛlɔnndo n'puiyon-ndo, te kon te maa oliviee tum peengela ndɔlan la co cɛɛlɔnndo-o.

³⁴Lende i co ni, yungu vana yɔŋ vɔɔndo kui lɔ́ɔ́-lɔ́ɔ̀ le, yinnden le loamnin cɛila-kolala-toandaala vanaa laasiannda kpow.

³⁵Vana tuunun pɛ dɛnɛ vɔɔndo o kɔl, ndu kom dɛnɛ palaa. Ɲɛ co fula o dembe ndɔɔ nin-ndo huinin ndu pila.»