Read Kissi Yɔb 17 Bible Online

Yɔb 17 - Kissi bible

Yɔb 17

¹«Yoomu nuu co dɔɔnanndo, palɛi nii co ɲumndo, Sɛiyo co o kumbiaa le ya.

²Vanaa balu ya-a kpede, vanaa mamaa n'vannda nda co ni. A co ya mamɔɔ háá i co nɔla lɔan te.

³Éé Hala! Vá tiindan nuu nɔm pila o hɔl. Te o co nɔm te, nɛ̀ɛ́ hawnun yɛnin ya?

⁴Kani nɔm Hala, a kinda kɔlta ndalan yɔŋii nda bii bila. Lelan, a melnin nda mà tiw ya ba le?

⁵Nda yɛ, à yɔŋnun maa langbanɔ pilɛ, ó veelu caaŋaa ndɔa le ɲɛdiaa dioo nda ndaa-o. Cuavaa ndɔa va ɲɛdiaa o ndaa cumndo, kɛ a sɔla le.

⁶Vannda co ya cuunduuo o condon nin, a co lɔlɔan tufɔɔ ya o hɔl.

⁷I co lɛ cɔ lapi le, dɛnɛ palaa tuisi ya pundaa o hɔl, dialun nun muungu maa levundu.

⁸Vanaa sandaa nɔ sondo soaa a tambii nii o kɔɔ le, vanaa tɛɛmbuu isɔɔ le-a simul vana nɔ siòòŋii Hala loo.

⁹Vana lo o lediom coo-o sim yili o nɛi ndɔɔ coo, vanaa nɔ bala diandaalan-nda cɔɔlunin yoomuan sɔlaa.

¹⁰Kɛ niaa kpow, la hun-ndɔ, la muungu vɔ. I seelunnin vana kɔlkalu kpeekpei niaa tɛɛn te.

¹¹Palɛi nii cuunun, tuula nilan kpede la tambu. Sɔɔn kɛ́-kɛ̀ va ya o kɔl, n cuu laasian kpede.

¹²Caaŋaa nia co cɔu maa ɲumndan, paalen má co ni. Ɲumndan ma kandu pɛ tolɔɔ, nda dimi aa paalen le co siɔu.

¹³Yɛɛ nɛ ya cúm yɛ́ vɛlɛ? Fonda nuu co nin ciee-piɔ́m ni, o ɲumma man nin ya co lakɔ kpele nuu toosiaa ni.

¹⁴I co sɛi nuu dimullo aa: ‹Nɔm co fuɲa nuu ni›, mì va ɲɛ siovɛiyo yondallo aa: ‹Nɔm co kala nuu a yema nuu ni!›

¹⁵Ɔ̀ɔ́ lɛ niko tiindan nuu? Nɛ̀ɛ́-nɛ̀ co yɛ tiindan ni kon cɔu?

¹⁶N co lakɔ naa ndu latulu ciee-piɔ́m, mì n tol naa ndu o cundoo nin ndon.»