Read Kissi Yɔb 20 Bible Online

Yɔb 20 - Kissi bible

Yɔb 20

¹Mí Sofar fula Naama-o cua sɔɛi, mó dimi aa:

²«Yiyannda nilan la co tosa ni mì mulul nɔm, kani i yulunin lou bivɔnndo le.

³I tuei sɔɔn pum, n co maa yei le ya-on, kɛ kɔlkalu nuu co ya cɔmndo mɛɛ ya co ken muli yɛ.

⁴Mò va maa pɔɛɛnɔnndo n co hee ni? Kabi sindɛ, kabi vanacieo fula o ceendo coo,

⁵le telen bingi kínɛí vana kɔlvesɛiyo tiw dɛnɛ ba ni, kɔlkɛndɛ vana yɔŋ vɔɔndo bendu bu le.

⁶O bandu bɛɛ háá mò kundun halataalaa, bollen le tiiya ndu bɛɛ háá o yumbuyumboo nin,

⁷o co hunɔɔ cuvɔɔ le fɛɛn a fɛɛn, mò siŋnun maa poola ndɔla ndu pila lan. O kon vanaa sina ndu-a ɲunannin aa: ‹Kuɛɛ o co yɛ?›

⁸O hiawnunnin maa lɔma sɔlaa, foofo ndɔ bɛɛ vana ci lɛnin te, o kɔannunnin maa lɔma vana sɔl icɔl-lan.

⁹Hɔlta va ndu tofaa lan la ci lɛnin ndu le, hali o fonda calta ndɔlan la va-o bɛɛ vana ci lɛnin ndu le.

¹⁰O mingulnin vannda bolofaa o hɛlu nda o ba-o kangalan, a baŋnin poaa ndɔa le vanaa bala fondoa ɲɛm ndan mingullo.

¹¹Yoomuan ma va mapiaa ndu o n'dial maa langbanɔ felengi, kɛ yoomuma man ma kɔ hininin nda ndu latulu o cundoo nin[24].

¹²Yeelaa yé-yé dɛnɛ vɔɔndo yeela vana kɔlvesɛiyo o sondo ni. O diɛɛmulen bɛngu o vian ndu ni,

¹³mò va ndu sɔɔsiaa tuŋ, o túfù ndu le, mò mandan ndu o sondo kpíŋ.

¹⁴Kɛ mì ɲɛ kon mangalan ndu o n'pulu, mò siŋnun maa lólò kɛw ndu o dembe.

¹⁵Le hee, o kuisinin ɲɛm pilan o misimisi-on, Hala kalaŋanin mun ndu o dembe.

¹⁶Lólò hɔ̀ɔ̀lɔ́ɔ̀ o va sɔɔsiaa kon ni, lelan diɛɛmule yɛ́lɔ̀ɔ́ le co ndu diyɔɔ ni.

¹⁷O ci lɛnin lɛan mɛɛ ma vannun ndu o ba maa mɛmma pee pɔmbɔ yɛ le, o ci lɛnin vɛlɛ cuɛima nɔnɔan mɛɛ ndóò nɔ man maa mɛmma bal a mɛmma pee bɛndu yɛ le.

¹⁸O co ɲɛm o sɔla-on mingi, o misinin mun te, o di lɛnin ɲɛm ndɔn latɔ́ɔ́tɔ́n tɔnɔ le.

¹⁹Kani o saangiaa vanaa bala fondoa, mó mal nda, mó hialu cɛila ndalan yɔŋii o tangul cɛi celen[25].

²⁰Ɲɛ-ɲɛ pe ndu lehɔl te, lelan, o nɔlanin bolofaa ndɔɔ baŋa hali ɲɛ-pɔmbɔ le.

²¹Ɲɛ-ɲɛ ndóò helun ndu a pulule ndɔlen te, lelan dɛnɛ ndɔ kɛndɔɔ viwnin te ni.

²²Mɛ̀ɛ́-mɛ̀ɛ́ ɲɔɔn va vana kɔlvesɛiyo o ba, buulanndo o buulan ni mì dɛnɛ palaa tol ndu coo.

²³Tuma o va ɲɔɔn nuwviaa le dembe ndɔɔ peiyo-o, Hala tuisi ndu yinnde kɔl ndɔ tuwvo coo, le sia ndu coo, le siŋnun balo ndɔɔ.

²⁴Te o hɛlun pɛ ɲɛm cɔw cɔwnun a cilinnde-on, kɔɛi cɔwnun a daɲan-nde buli ndu.

²⁵Te o sungun pɛ kɔɛi ken o n'dial, mò solin ciliŋii siɛɛmbiɛi tuwve o yemnde nin, siòòŋii piɔ́mnde tol ndu dɔ́ɔ́ coo.

²⁶Ɲumndan ma co ma mandaa le bolofaa ndɔɔ[26], man ma toalnin o ɲɛm ndɔn coo ni. Yinnde vana kíísúú le len le co ndu lomɔɔ, mì yinnde len le lom vɛlɛ ɲɛm lonin o ndu lo cɛi nin-ndon.

²⁷Halataala cɔɔmuunin yɔŋ ndɔ vɔɔndo, mì lɛŋnden le simul ndu.

²⁸Paale kɔltuw Hala-o fulanin-nden, ɲɛm ndɔn basunnin selemenden mì n hiownun maa o mɛmma hunaa nin!

²⁹Kɛ́ Hala mandal vana kɔlvesɛiyo-o co kon ni, dɛnɛ palaa o kɛsul ndu-o pɛɛn.»