Read Kissi Yɔb 26 Bible Online

Yɔb 26 - Kissi bible

Yɔb 26

¹Mí Yɔb cua sɔɛi, mó dimi aa:

²«Àá! Nɔm a sina bɔɔ le vana nɔ mayoomu loo malaa, a le ba nɔ mayoomu loo yoomuan mingio!

³A caa bɔɔ vana nɔ kɔlkalu silaa! A caa bɔɔ vannda sinapɛngoo yɔngoo!

⁴Kɛ o nɛ̀ɛ̀ lo n co yɛ sɔɔn mun dimio? Nɛ̀ɛ́ co yɛ sɔɔn mun vowvo nɔm o sondo?

⁵Vanaa co ciee-piɔ́m o mɛmma ihɛllan bɛngu-a, a ɲɛm co lon-ndon kpow n co ɲiiya.

⁶Kani ciee-piɔ́m co kpendekele Hala o hɔl, soon bɛndu nɔ lamɛɛlu loo co o kumbaa ndu o hɔl te.

⁷Ndu pɛngɛla halataala o soon bɛndu nɔ lamɛɛlu loo coo ni, ndu landu vɛlɛ lɛŋnden o ɲɛ fondoo coo ni.

⁸O heelu mɛnndan o yumbuyumboo nin, mɛ̀ɛ́-mɛ̀ɛ́ ma lusul, yumbuyumboo buli le.

⁹Hala kuumbuu yumbuyumboo maa kola o kpɛŋɛ ndɔ lemasaa coo.

¹⁰O kila kando tiilan tíwvo o mɛmma ihɛllan balɔɔ pindo, háá nɛɛ pɛɛngulan la co ɲɛ-tengaa a ɲumndan tɛɛn-nda.

¹¹Te Hala kɔngɔlan pɛ, sungbuma bii halataalaa-n ma ɲiiya, ma dɔwnun kɔndɔfili.

¹²Ò tɛnda mɛmma ihɛllan a kpaaya ndɔɔ, mó pial Ɲɛ yoomaa kɔndɔfillo[35] a kɔlkalu ndɔɔ.

¹³Hoeyii fula ndu o milin-nde i simbulu halataalaa, ba ndɔɔ buli N'yalɛ́i co kiltan-ndo.

¹⁴Dɛnnda o tosa lan, ɲɛ-pɔmbɔ koni co kon ni, hali o la o tosa lan ndan nin bɛɛ, ɲɛ-pɔmbɔ koni naa n tuei tɔ́ɔ́ ni. Nɛ̀ɛ́ bii yɛnin kpaaya bɛndu ótosà dɛnndan-ndo bila?»