Read Kissi Yɔb 28 Bible Online

Yɔb 28 - Kissi bible

Yɔb 28

¹Mí Yɔb cua vɛlɛ sɔɛi, mó dimi aa: «Fonda nda kala volion lɛŋ-ndo co, fonda nda kala sianion-ndo co vɛlɛ.

²Cilinnde ndi-ndi, o puuloo nin nda kala ndi ni, daɲan yɛ mun, powtan nda teengiaa ni.

³Vanaa co powta báà kàlàlan nuwviaa-a co tolɔɔ o lɛŋnden bɛngu dí, a co kɔlan a ɲɛ-tengaa lon le powta lan nuwviaa.

⁴A tow soon bɛndoo lándán a calta vanndacieea, o fonda vanndacieea nɔla keiyo loo, lon nda landun ni, mà va hiŋnɔnndo vanndacieea levil polon.

⁵Lɛŋnden, lecoo ɲɛdiaa fùlà ni, kɛ o lɛŋnde len bɛngu, vana ca ko aa yinnden le co ɲɔɔ kalaŋaa ni.

⁶O powta lan nin vana komal pow safir ni. O cundu ndɔɔ nin vana komal sianin múngón ni.

⁷Yovaa dia vision-nda sina nɛi ndɔɔ le, hɔlte duàá le séélùn ndu le.

⁸Visia biyaa pila pelei o nɛi kon coo le, yàlàá kei-yɔ lon lɔ́ɔ́-lɔ́ɔ̀ le.

⁹Kɛ mì vanacieo ndu ciŋilan pow kàlà-kálàá, mò kala pembei a tum ndɔɔ kpow, mò muli ndi paasi.

¹⁰Te o tɛɛndiaa pɛ powta kàlà-kálàlan, hɔlte ndɔlen le ce ɲɛm sɔvɛn co lenin-ndon.

¹¹Mò kanda mɛmma co hiovɔɔ-an, o kon, o soli niko ɲɛm viannanndon ceen deŋ.

¹²Kɛ kuɛɛ nɛ kɔlkaloo saalùn yɛ? Kuɛɛ dɛnɛ sinaa kila yɛ caltan?

¹³Vanacieo sina lɔ́ɔ́-lɔ́ɔ̀ vɔngu kɔlkaloo le, kɔlkaloo nɔ calta ndɔ o lɛŋnden coo vanndacieea tɛɛn te.

¹⁴Soon nɔ lamɛɛlu loo co dimio aa: ‹O co o ya lo nanu le›, mì mɛmma ihɛllan bɛɛ ma va dimio aa: ‹O co o ya o ba nanu le.›

¹⁵Vana sɔla ndu a sianin diandaa válán-ndon te, vana pindu ndu a n'voli le, mɛ̀ɛ́-mɛ̀ɛ́ n va bɛɛ.

¹⁶Vana tuu ndu a sianion Ofir le, vana tuu bɛɛ ndu a pow onikse le, te kon te a pow safir.

¹⁷Vana tuu kɔlkaloo a sianion, te kon te a tofanndo[37] le, vana singa ndu hali a sianin sɔvɛ-sɔvɛɔn te, n va bɛɛ kpángàá ca.

¹⁸Vana singa ndu a koon ŋɛlɛngi-ŋɛlɛngion te, vana singa ndu a kristal te. Kɔlkaloo hiow yɔɔvala báà kalalan polon!

¹⁹Hali pow topas nda fula Kus-o, o sim ndu o hɔl a naŋɔɔ le. O siiman a sianin diandan te.

²⁰Kuɛɛ nɛ kɔlkaloo ndu fula yɛ niko kpeekpei? Kuɛɛ calta dɛnɛ sinaa la co yɛ?

²¹Vanaa yoomaa del ndu hɔlten te, yovaa co balɔɔ coocoo-a bɛɛ a co ndu cɔ le.

²²Piɔ́mndo a Ciee-piɔ́m co dimio aa: ‹Lende ni, tɔ́ɔ́ ndɔɔ del naa o lani.›

²³Hala kínɛí sina nɛi kɔlkaloo cɛn coo-o ni, ndu sina fonda o co-o ni.

²⁴Kani o co cɔu háá o lɛŋnden mɛɛlulan, o co ɲɛm co o halataalaa bɛngu-on mɛɛndanndo.

²⁵Tuma o va lusul hoeiye tuuvo-o, lɔ́ɔ́ o va mɛnndan tuuvo-o,

²⁶telen o va piɔɔ pɛɛngulan hendullo-o, boondii o toosiaa nɛiyo le piɔɔ deŋia-e,

²⁷tuma kon o ce kɔlkaloo ni, mó sina súú ndɔɔ, mó dɔaw ndu taasi, mó sina tɔnɔ ndɔɔ.

²⁸O kon kɔɔli, mó dimul vanacieo aa: ‹Siòòŋii Mɛlɛka-e nɔu, kon co kɔlkaloo ni! Dɛnɛ vɔɔndo kpakpalaa, dɛnɛ sinaa co kon ni!›»