Read Kissi Yɔb 31 Bible Online

Yɔb 31 - Kissi bible

Yɔb 31

¹«Náà n cii nin cɛlan naa hɔlta nilan, yáà bɛnda lɛ mì yáà tofa cua laandoo tofa iyeema le.

²Kani ɔ́ɔ̀ tɔnɔ yáà sɔlanin Hala o ba fulaa coo-coo-o? Ɔ́ɔ̀ kɛ́ Ó-Hiow-Kpaayaa-Kpow-vo ndóò kenin ya fulaa coocoo-o?

³Dɛnɛ palaa co le vanaa sendu le-a, sangaa co le vanaa tosaa dɛnnda vɔɔnda.

⁴Vɛ̀ɛ̀ Hala co cɔ mɛɛ ya co kelaa yɛ le baa? Hali foofola ya co keiyo lan, o co lan cɔmndo tɛ́kpɛ́-tɛ́kpɛ́.

⁵Te i kela pɛ o sɔɔn lacòòvan nin, te i kindin pɛ le dɛnɛ sendu loo tosaa,

⁶mɛɛ Hala tùú vɔ ya hau o ɲɛ ndɔ tuvaa nɔ lakafa loo coo, o sinanin maa i tɛɛmbuu isɔɔ le.

⁷Te lepilɛ bɛɛ i pɔw pɛ mí mal nɛiyo, te kɔl nuu del pɛ yeemɛi nii n'dialle kɔɔli[45], te i vow nin pɛ balan o dɛnɛ nɔɔlɛiyo nin,

⁸màá i saŋ, mì vana celen de tɔnɔ kon, màá vannda suingi tɛyun nun!

⁹Te i fula pɛ vanalanɔɔ pum lehɔl, te i sim nin pɛ mɛngɛlaa o dio pilaa,

¹⁰màá laa nuu cul caaŋaa celen, mì vanpiaandua celen a sina ndu vanalanɔ!

¹¹Kani te i tosa pɛ dɛnnda lan, mɛɛ dɛnnda kɔlvesɛilan la co lan ni, dɛnnda vɔɔnnda vanaa kialaa n'yamaa yaala vana co lan la co lan ni.

¹²Tɛɛmbuu ni kon ndóò vanin maa yinnde loam háá ciee-piɔ́m-nden. Yinnde léè nɔlanin mì léè tɛɛmbuu ɲɛ ni sɔlaa kpede len.

¹³Te o va pɛ aa mí vanaa nia baalaa, à piaandua a à laandua, a cɛɛŋun ya o lani, mí kɛɛ le dí ndaa sinaa,

¹⁴vɛ̀ɛ̀ ya yɔŋ yɛnin tuma Hala cannin-ndo? Te o ɲuna pɛ ken, vɛ̀ɛ̀ ya mulul-lɛnin ndu?

¹⁵Vɛ̀ɛ̀ o co Hala toosiaa ya kala nuu o dembe-o le toosiaa vɛlɛ nda le? O co Hala pilɛ kon te toosiaa naa kalaa naa o ladembe le?

¹⁶Te o va pɛ maa mí tuŋ vanaa bala fondoa ɲɛm nda yeema-on, te kon te, mí kɛɛ le vanalanɔ pɔnɔ ndɔ vi-o ɲɛ ke,

¹⁷te i de pɛ ɲɛdiaa nuu a sɔngbɔɔndo[46], mí ke vííyo ɲɛ-ɲɛ le,

¹⁸nduyɛ, i va vɔ felengi, mí kandu víí kon mandaa, maa fuɲa ndɔ koni ya yɔŋnun ni, kala nuu o dembe pɔ́ ya kandu vanalanɔ pɔnɔ ndɔ vi-o simndan laci ni,

¹⁹te i ce pɛ vana bala fondoo a fɛlio, mí ca vana ikɔɔ nɔ kola kuumbuan too,

²⁰mí kɛɛ nda kolala nda lɔ a yiiŋii saa nia lan yɔngu le ɲɛ lafuuo vaa nda coo haliko ma mel-la balikaa,

²¹Te i heelu pɛ baa mí lɔaa vííyo, le tùú ya sina maa vanaa kialaa n'yamaa co ya hunɔɔ dio ke nɛɛ kialaa n'yamaa-o,

²²màá ba ni kalaa kendin o congoo, mì ba lɔɔ nuu bɛɛ kendin o dunndo!

²³Kani siòònde co ya a dɛnɛ palaa fula Hala o ba-o. Nduyɛ yáà nɔlanin ndu simul te.

²⁴Te i tiindan pɛ sianion, mí dimul mun aa: ‹Nɔm co tiindan nuu ni.›

²⁵Te i dɔwnun pɛ ɲaale le bolofaa ni bɛndoo, a le mɛɛ ɲɛ-sɔlaa ya nɔ-o co taw yɛ,

²⁶te i tofa pɛ paalen o fulaa, mí nua paangei o diondɔɔ kɛndɛ-bɛndoo,

²⁷te kɔl nuu luɛi pɛ ɲɛm mun iyeema hali o vionnɔnndo nin, te ba nuu a sondoo nuu biilu pɛ mun,

²⁸mɛɛ kon bɛɛ co dɛnɛ pilɛ, o vana kialaa n'yamaa yaala vana coo-o, kani Hala co coocoo-o ya mulul kɔɔ lende ni.

²⁹Vɛ̀ɛ̀ i dɔwnun pá ɲaale le dɛnɛ palaa komal yaamɔɔ nuu-o? Vɛ̀ɛ̀ i huulu pá a kponyoo le sanga komal ndu-o,

³⁰yáà cɛl hoo mí yáà dimi sɔɛi haki loo? Vɛ̀ɛ̀ ya mɛna yɛnin vanndo, mì dimul Hala le ndu diyɔɔ?

³¹Ɔ́ɔ̀ vanaa va o cɛi-kola-toandaa nuu nin, má kɛɛ vision dio, má pum-nda?

³²Mial oo mial ndóò lɔl o bɛ́ɛ̀ le, dio nuu va o kumbiaa lɔ́ɔ́-lɔ́ɔ̀ le vanaa co o kelaa nin-nda.

³³Vɛ̀ɛ̀ i ven pá tɛɛmbuula nilan maa vanndacieea pum? Vɛ̀ɛ̀ i mandan pá yɔŋ ni vɔɔndo o kɔl,

³⁴Siòòŋii bii ya le fulaa sɛ́lɔ́ɔ́ o hɔl te, siòòŋii bii ya a nɛyɔn vannda mì meinun mì calnin o ya lo cɛinin te.

³⁵Kpòkóó! Te yáà nɔ pɛ vana yaŋnun ya-o kɛi dɛ! Yáà nɔla mì yáà dimi diomnde mɛɛlaalen, mí Vana-Kpaayaa-Kpow ndóò mulul-la niko. O kon, sɛbɛ biilaa sei yaamɔɔ nuu sɛva-o,

³⁶mì bii dɔ́ɔ́ sɛbɛ kon o congú, mì baanun ndu o itendu maa mɔsil lemasaa,

³⁷mì downun ndu Hala kona a dɛnnda nilan kpow o kɔɔ, mì kɔɛ ndu ikɛi a hɔlaa helaa maa cua lemasa.

³⁸Te yondola nilan la koŋul pɛ a ya o sondo, mí tɛɛndiaala co lɛŋ-ndan la soli mɛmɛan,

³⁹te i de pɛ tɔnɔ lelɛŋndo, o ya dow vɔngu loo, te kon te, mí tɛɛmbuu vanaa lelɛŋaa kan kɔl,

⁴⁰màá yɔɔn vɔɔnndon fula o foofola yáà koaw ɔrse lan, mì bil vɔɔndo vil o fondala yáà koaw maalon-ndan!» Sɔɔn Yɔb soo-on yɔŋnun mún ni.