Read Kissi Yɔb 34 Bible Online

Yɔb 34 - Kissi bible

Yɔb 34

¹Mí Elihu dimi aa:

²«Niaa vanaa kɔlkalua sei, la tuei-yɔ sɔɔn nun! Niaa vanaa dɛnɛ sinaa, la yaŋ ya nilan!

³Kani mɛɛ sondoo tuɛi ɲɛdiaa yeela yɛ, lende koni nilan la bii sɔɔn bila ni.

⁴Le hee, n hɛlin dɛnɛ sandaa, mì n sinan dɛnɛ kɛndɔɔ naa pila tɛɛn.

⁵Yɔb dimi aa: ‹I sandu, mì Hala puu ya dí nuu o ba.

⁶Kɛ a sandii nii ken kpede, maa vana lacòòvaa nda co ya cɔu ni. I tɛɛmbuu isɔɔ oo isɔɔ le, kɛ yɔŋul ya sɔla-o singunin te.›

⁷Ɔ́ɔ̀ vana co maa Yɔb-o, o yeowlan la co o sondo maa mɛmma kolaa-o?

⁸Nda vanaa tosaa dɛnnda vɔɔnda kela ni, nda vanaa kɔlvesɛiya diam nɛiyo ni.

⁹Kani nuaa o dimi ni aa: ‹Tɔnɔ oo tɔnɔ co o kindinndo le Hala hɛnanndo nin te.›

¹⁰Lelan, la yaŋ ya nilan, niaa vanaa kɔlkalua. Hala nɔla pá mò tosa dɛnɛ kɔlvesɛiyo? Ndu Vana-Kpaayaa tosà pá dɛnɛ sendu loo?

¹¹Mɛɛ vanacieo tosa dɛnndan yɛ, lende o sala ndu ni, mɛɛ vana-vana kela yɛ, lende o mingul ndu ni.

¹²Ì co toɲa, Hala tosa dɛnɛ kɔlvesɛi le, Vana-Kpaayaa tundu dɛnɛ sandaa le.

¹³Nɛ̀ɛ́ siinguu yɛ ndu vana bɛndoo o lɛŋnden coo? Nɛ̀ɛ́ sɔɔ yɛ ceendo kpow ndu o ba?

¹⁴Te ndóò va pɛ aa le ndu pila koni o co cɛwcɛwvo ni, te ndóò hɛlu pɛ yoomu ndɔɔ a kɔl ndɔ co vanacieo nin-ndo,

¹⁵vanndacieea kpede va cuvɔɔ o lepilɔɔ, mì vanacieo ndóò muungu o cundoo nin.

¹⁶Taa nɔ pɛ sinapɛngoo, mɛɛ yaŋ nilan o sɔɛi he, yaŋ nilan o diom co ya fulaa o sondo-o.

¹⁷Vɛ̀ɛ̀ vana nɔ nɛyɔn dɛnɛ sandaa-o nɔla pá masalen tosaa? Bàà ma tɔɔndan le Vana Sandaa, O co Vana-Kpaayaa-o yaalaa?

¹⁸O faŋan pɛ o ndu Hala kɔɔli, nɛ̀ɛ́ dimùl-lɛ masaa aa: A kindu kɔl te? Nɛ̀ɛ́ dimùl-lɛ cuavaa lemasaa aa: Vanaa kɔlvesɛiya niaa co ni?

¹⁹Hala bii vanaa bɛndua le mɛɛ nda co vanaa bɛndua yɛ le. O hendu hiyan vana bolofaa a vana bala fondoo tɛɛn te. Kani nda kpow, ndu cɔw nda a ba ni.

²⁰O telen pɔmbɔ bɛngu, tuma di-tɛɛndo[47] kpafii, piɔ́mndo hinul-nda. Vanaa-vanaa cɛn pɛ le ndu simullo, o hiŋ nda, o cii nda o lepilɔɔ kpede. Hali masa tosa masalen a paa-kala-o pala ndu ɲumi le.

²¹Kani Hala nɔ hɔlten o kela vanacieo coo, o co foofola ndɔlan kpede mɛɛndianndo.

²²Ɲumma man ma co le, vundule piɔ́mnde len le co le, nɛɛ vanaa dɛnɛ vɔɔnda nɔla vionnɔnndo-a.

²³Hala nɔ mako le kela vanacieo yaasiaa le yamɛi ndɔɛi kiolɔɔ le.

²⁴Mò yimi vanaa kpaayaa o mɛngɛla bɛɛ nda le, o kon, o mingi vanaa celen o fonda ndaa.

²⁵Kani o sina kelala ndalan. Icɔl o kpuva nda ni, mò pesi nda.

²⁶Kpendekele o lɔaa nda ni, maa vanaa kɔlta vesɛi.

²⁷Kani vanaa kan a faŋan ndu o ibuŋ, má mal nɛila ndɔlan kpow.

²⁸A cɛŋi vana nɔ kpaaya loo, mí diom ndɔɔ hel háá mó komal Hala, mó tuɛi vɛlɛ cɛɛŋɔnnda vanaa bala fondoa.

²⁹Te o meinun pɛ, nɛ̀ɛ́ yaala yɛnin ndu le ken? Te o ven pɛ hɔlaa ndɔa, nɛ̀ɛ́ nɔla yɛ mò tofa ndu kangalan? O nɔ hɔlten lɛŋnde a vanaa co icali lenin-nda coo,

³⁰yɔŋii vana vɔɔndo siŋnun masaa, mò siŋnun yaŋɔɔlen le vannda.

³¹Te o va pɛ mì vanndo dimul Hala aa: ‹I cii sanga kelun le ya-o, i tosa lɛnin dɛnɛ vɔɔn te.

³²Cɔm ya hakila ya pɔɛɛnun ndan, te i tosa pɛ dɛnɛ sandaa lepɛŋndo, tɔkpɔnndo co hoo ni, i tosa lɛnin te.›

³³Ɔ́ɔ̀ yiyan nɔmndo a ken o kɔɔ, nɔm co hoo ndu yaalaa-o? Vɛ̀ɛ̀ Hala bɛnda pá mò saangiaa vana vaa lende? Muli niko, kani nɔm soaa vannda ni, o co ya le. Lelan, dimi yiyan nɔmndo.

³⁴Vana-vana co vana taasio a vana sinaa dɛnɔɔ, a cɛlnin ya kɔɔli mà dimi aa:

³⁵‹Sɔɛi Yɔb soaa ni, kɛ o nɔ sinapɛngu le, taasi co o sɔɔn ndɔn nin te.

³⁶Màá o hiow laci a kɔlɔɔ fulaa le sondo ndɔ bɛndoo, kani maa vanaa tosaa dɛnnda vɔɔnda o soaa ni.

³⁷O handu haki kàlà-kálàá handɔɔ o hakila ndɔla paandulan coo: O co hiovɔɔ laci a Hala simullo. O luei sikaa naa tɛɛn a sondo ndɔɔ, o ciŋilan Hala ciŋilanndo pila.›»