Read Kissi Yɔb 36 Bible Online

Yɔb 36 - Kissi bible

Yɔb 36

¹Mí Elihu hiaw laci a sɔɛi, mó dimi aa:

²«Yɔb, cum-ndɔ ɲɛ-pɔmbɔ mì soo, kani ɲɛ co vɔ ya o kɔl le dimio le Hala simndan kɔɔli.

³I hin a sinapɛngu nuu le vanaa co o lɛŋii leville nin-nda, i ke Hala, vana toosiaa ya-o dí.

⁴Kani a toɲa, sɔɔn ya co dimio-on co sɔɔn lacòòvaa le. Vana tiwnun o sinapɛngu ndɔɔ nin-ndo co sɔɛi o nɔm ndo ni.

⁵Vana kpaayaa Hala co ni, o kɛɛ vana-vana le. Vana kpaayaa o co ni, o kelu pɛ isɔɔ vana kpeeŋiaa le.

⁶O mɛì vana kɔlvesɛiyo yoomu le, kɛ ò ke vanaa bala fondoa dí ndaa.

⁷O faŋa vana sandaa hɔlten coo le, ndu suili masaa ni mò kɛsi kpɛŋɔɔ nin, mó kɛsi nda lon le fɛɛn a fɛɛn haliko ma sɔla bɛɛle bɛndu len. Kɛ mà siŋnun vanaa kuundiannda.

⁸Taa va pɛ a biyaa o yɔlɔn, te kon te mà va a biyaa o dɛnɛ palaa nin,

⁹mɛɛ tɛɛmbuu nda tɛɛmbuu-o Hala co nda cɔmndo ni. Tɛɛmbuula ndala nda tɛɛmbuu o yonga ndaa nin-ndan pɛɛn.

¹⁰Ò yondal nda le nda kɔllo kindio, mò dimul nda le dɛnɛ vɔɔndo malɔɔ.

¹¹Taa tuei pɛ mà bii sɔɔn mun, mɛɛ a siownin palɛi ndɛi o dɛnɛ kɛndɔɔ nin, mì vɔsila ndalan la siŋnun vɔsila yeelɛilan.

¹²Taa tui yɛ le, mɛɛ a keinin o nɛi yaa vana ciee-piɔ́m-ndo, a sɔlanin piɔ́mndo le sina lepɛŋ ndaa.

¹³Kɔltuwvo tuŋ co vanaa kɔl vɔɔnda nin ni. Hala va nda bɛɛ yiiyo a yɔlɔn, a veelu le mala sɔla le.

¹⁴O felengiyɛi ndɛi nin nda sɔlà piɔ́mndo ni, maa felengia suundɛiya yoomu ndaa mɛɛlù ni.

¹⁵Kɛ a sangaa Hala baŋa vanaa co o sangaa nin-nda ni, mò tuisi nda dɛnɛ palaa coo le sɔɛi o nda lo.

¹⁶Nɔm bɛɛ, o soli nɔm o pɛŋnden nin[48], mó kuilu nɔm ɲɛ-ɲɛ co ɲɛ kɛndɔɔ. Ɲɔɔn taw n va nɔm o ba, ɲɛm dian kɛndɛ-kɛndɔn kposon va o nɔm ndo ni.

¹⁷Kɛ nihau, yamɛi kilulun vanaa kɔlvesɛiya-e kilulunnin nɔm, mí yamɛi ken a sanga tol nɔm coo-o bii nɔm mɔɔsu.

¹⁸Màá kɔltuwvo viam nɔm Hala simullo le! Ca vɛlɛ sɔɛi he sɔɛi lamamɔɔ le. Yiyan te maa a nɔla Hala piondɔɔ a luɛyɔɔninndo.

¹⁹Bolofaa nɔmndo a sianin nɔmndon tiw le, yoomuma nɔmndan bɛɛ ma nɔla nɔm baŋa o dɛnɛ palaa ho nin te.

²⁰Hándù kɔllo ɲumndan coo le, ɲumma toaw vannda mì ma faŋa nda o lɛŋii ndɛi nin-ndan.

²¹Mandan, muli hɔlla o dɛnɛ vɔɔndo tosaa le, kani lelan dɛnɛ palaa co nɔm coo ni[49].»

²²«Hala tiwnun o kpaaya ndɔɔ nin, nɛɛ nɔla yɛ mò pɛɛku maa ndu?

²³Nɛ̀ɛ́ nɔla yɛ ndu baŋɔɔ le isɔɔ tosa? Nɛ̀ɛ́ dimul-lɛnin ndu aa: ‹A cee dɛnɔɔ ho tosa le›?

²⁴Yiyan mà sangala dɛnnda ndɔlan, la vanndacieea kpede co sangalaa o condon nin-ndan pɛɛn.

²⁵Dɛnnda vana-vana fee co cɔu lan, la vanaciee yoomaa kɛ́-kɛ̀ co mɛɛndanndo levil-tan pɛɛn.

²⁶Hala co o bɔɔ, vanacieo nɔla ken bilaa biyɔɔ le, vana nɔla vɔsila ndɔlan sina le.

²⁷Ndu nan mɛmma yúúyúúan o ndu lo ni, mò siinguu man piɔɔ.

²⁸Mì piɔɔ kon fula coocoo ni, mò tol, mò sia vanndacieea coo.

²⁹Nɛ̀ɛ́-nɛ̀ nɔla yɛ sinaa mɛɛ yumbuyumboo balu coocoo yɛ? Ɔ́ɔ̀ vana sina mɛɛ taŋnden le deŋi mì le del-lo?

³⁰Tofa vɔ mɛɛ ndu Hala pila toosiaa ɲɛ-tengaa bɛndu o co nin-ndo yɛ. Ndu koni pei vɛlɛ mɛmma ihɛllan o soonnda yingilaalan co lebɛngulan nin ni.

³¹Piɔɔ o tuisì kon-ndo yɔngu vanndacieea yoomoo ni, mò ke nda ɲɛdiaa tìw nda ɲɛkɛndɛi-yo.

³²O cua pɛ piɔɔ-volia o ba, o cɔm ndu nɛɛ o yeema mò kɔɛ-a.

³³Ɲɛ voliaa kon cɔm ni maa piɔɔ co kɔɔli, hali visia kundaa, mà sina dɔ́ɔ́ maa piɔɔ co deŋi.»