Read Kissi Yɔb 37 Bible Online

Yɔb 37 - Kissi bible

Yɔb 37

¹«Lelan kɔllo co ya lɔɔ ni, mò va ɲiiyaa ya nin.

²La yaŋ-ndɔ nilan, la yaŋ nilan mì la tuei mɛɛ diom Hala-o co deŋio yɛ, mì la tuei kuuliaala co ndu fulaa o sondo lan!

³O co lan pɛngɛlaa o halataalaa nin kpede. O co ɲɛ voliaa saŋɔɔ háá o lɛŋnden mɛɛlulan.

⁴O kon kɔɔli, diom Hala-o pɛɛliaa, diom ndɔɔ deŋi kpáàkàkà a kpaayaa. Kon tueinun dɔ́ɔ́ pɛ, piɔɔ voli ŋuanndi!

⁵A toɲa, Hala kuuliaa pɛ, dɛnnda kaamaalan la tosan, o tosa sɔɔn bɛndun naa n bii bila loon.

⁶Kani ndu dimì ni mì mɛmma n'kpungban ma deli o lɛŋnden coo, ndu koni dimì vɛlɛ ni mì piɔɔ sia, hali piɔɔ hoeyii fùkù-fùkoo.

⁷Lende o lɛngɛla kpekula vanndacieea ni, haliko ma sina dɛnnda Hala co tosaa lan[50].

⁸Visia yondoa co nɛɛ viannannda nuwviaa, a co hinilan o bɛ̀mɛ́lta ndalan nin.

⁹Hoeyii fùkù-fùkùi hɔŋnde, a ba too i can ni, hoeyii miisisii bii vana-e yɛ, a ba luaŋ-ndo ndi-ndi can ni.

¹⁰Hala hul pɛ fúù, mɛnndan ma yiwnun kpungban, mɛmma va pélé-pélé-an ma kendu poŋ.

¹¹Ndu pei ɲɛ ɲuloo o yumbuyumboo nin coocoo ni, mò sɛŋi ndu ba-ba fee a piɔɔ-volia.

¹²Mò hiŋ yumbuyumboo mɛɛ o yeema yɛ, haliko mo tosa yeemɛi ndɔɛi o ceendo coo.

¹³Lende Hala tosa ni, te o yeema pɛ le vana sangaa tuisio coo. Lende o tosa vɛlɛ ni te o yema pɛ le vana dɛnɛ kɛndɔɔ tosallo.

¹⁴Yɔb, yaŋ nilan yékén o sɔɔn mun kpow! Cɔn ma mɛɛndan dɛnnda kaamaala Hala lan.

¹⁵Vɛ̀ɛ̀ a sina pá mɛɛ Hala co ɲɛm mun kpede vomɔɔ yɛ? A sina pá mɛɛ o soli piɔɔ-volia o yumbuyumboo nin yɛ?

¹⁶Vɛ̀ɛ̀ a sina pá mɛɛ yumbuyumboo looku landɔnndo coocoo o del te yɛ? Le kaamaa kon tosaa, fɔ vana nɔ kɔlkalu peelanndo-o.

¹⁷Nɔm nɔ hoo ɲɛ cuɛinan yɔngu hangullo-o, te hoeyii fula a ba too-e hinul pɛ lɛŋnden,

¹⁸vɛ̀ɛ̀ a nɔla mà tondu halataalaa maa Hala, mò kendu maa ciliŋii kálà-kálà?

¹⁹Cɔm naa ɲɛ naa n bɛnda le ndu Hala dimullo-o. N nɔ ɲɛ-ɲɛ naa n cɔm ndu le. O ɲumndan nin naa n co ni.

²⁰Mò va maa te soo pɛ fɔ mì vana tɛɛngul ndu? Bàà mɛɛ mì vana dimul ndu maa vanndo soo?

²¹O laan nin, n co lɛ ɲɛ-tengaa kei o yumbuyumboo nin-ndo cɔ le, kani yumbuyumboo ven paalen, mí hoeiye hɔŋ mí i basu ndu selemenden.

²²Ɲɛ-tengaa nɔ yinɔɔ maa isiani-o fula muɲɛɛ a ba luaŋ-ndo. Ɲɛ-tengaa kpúlúnkùmaa balu Hala sɔ́.

²³N nɔlanin tiiyaa o Vana-Kpaayaa-Kpow lo le. O co o bɔɔ o yoomuma ndɔan nin a o sandii ndɔɛi nin, o mel vanaa sandaa o sangaa nin te.

²⁴Lelan, vanndacieea bɛnda mà nɔ siòòŋii ndɔɛi. Kɛ o nɔ vanaa cennun nda pila vanaa kɔlkalua-a lehɔl coo le.»