Read Kissi Yɔb 38 Bible Online

Yɔb 38 - Kissi bible

Yɔb 38

¹Mí Mɛlɛka mulul Yɔb o hoeyii fùkù-fùkùei nin, mó ɲuna ndu aa:

²«Nɛ̀ɛ́-nɛ̀ n co yɛ, nɔm co hoo tuula nilan sɛɛngiaa a tombola fondo sinapɛngu co nin too?

³Sim yili! Tosa vanapɔnɔyɛi! I co nɔm ɲuuniaa, ma kindi ya kɔl.»

⁴«Kuɛɛ nɛ n va yɛ, telen yáà kandu lɛŋnden kilaa-o? Taa kendu pɛ kɔl, mɛɛ dimul-la.

⁵Nɛ̀ɛ́-nɛ̀ kilul-lɛ lɛŋnden pɛɛngulan? Nɛ̀ɛ́ cua yɛ yoolen mò toandu le len tuuvo?

⁶O yɛɛ nin ya sɔɔ yɛ lɛŋnden tumndo? Nɛ̀ɛ́-nɛ̀ handu yɛ pow tase và o sɔngio-o?

⁷Tuma kon loeon idiiyon va condon a ɲaaloo ni, mí mɛlɛkaa Hala-a va kponyoo viovɔɔ.

⁸Nɛ̀ɛ́ kinda yɛ mɛmma ihɛllan diolan kɔɔli lɔ́ɔ́ ma va fulaa o lɛŋnden bɛngu-o?

⁹Mí cuɛi man a yumbuyumboo, mí simbul man o mɔ́m bɛndu-bɛndoo nin.

¹⁰Mí hendu man pɛɛngulan, mí hendu man kanda kàlà-kálàá le hiŋnɔn dɛlɛkɛkɛ ma va-o.

¹¹Mí dimul man aa: ‹Nanu n bɛnda ma mɛɛlu ni, hiaw lɛ nanu coo le. Tindima nɔmma yongama man bɛɛ ma bɛnda mì ma mɛɛlu nanu.›

¹²Kabi n velun, paale pilɛ bɛɛ a dimúl nin paalen le siɔu? A cɔm nin ɲɛ-tengaa fonda o bɛnda mò sim,

¹³mò tiw o lɛŋnden coo-o, haliko mo hiilu vanaa kɔlvesɛiya-o?

¹⁴A paale siaalen, lɛŋnden le mangalan, le siŋnun maa bɔ́w nda hol tampɔnndo nin-ndo[51].

¹⁵Kɛ ɲɛ-tengaa vanaa kɔlvesɛiya ɲumnun, ba va helɔɔ le lɔɔ-o yom kpɔsu.

¹⁶A tiiya nin pá nɛɛ mɛmma ihɛllan ma cɛn tum-nda? A kela nin o soon yingilaa nɔ lamɛɛlu loo nin?

¹⁷Diola co le luɛyɔɔ ciee-piɔ́m ndan la cɔmnun nin nɔm? Vɛ̀ɛ̀ a ce nin pá diola vunduma piɔ́mndan?

¹⁸A dɔw nin pá taasi mɛɛ kpɛ́ lɛŋnden le co lebɔɔ yɛ? Dimul-lɔ ya taa sina pɛ sɔɔn mun.

¹⁹Ɔ́ɔ̀ nɛiyo le kɔlan o calta ɲɛ-tengaa? Ɲumndan yɛ, kuɛɛ nɛ ma co yɛ icali?

²⁰Vɛ̀ɛ̀ a nɔla pá ma nuwviaa man nɛɛ ma co-a? Vɛ̀ɛ̀ a sina pá nɛilan le kɔlan o calta ndɔlan?

²¹A kɛɛ sɔɔn mun kpede sina le, kani nɔm óò va nin, o co lɛ hau le n co le.

²²A kɔɛ nin má kɔ tofa nɛɛ mɛmma n'kpungban ma co mamandaa-a? A ce nin nɛɛ loeon delian co n'mandaa-a,

²³n ya co mandaa le telennda dɛnɛ palaalan, le paale cɔlɔbaalen a le paale cɔwlen-ndon?

²⁴Nɛi kuɛɛ nɛ ɲɛ-tengaa fula yɛ mò tiw sɔ́? Nɛi kuɛɛ hoeyii fula a ba paalen le can-ndo-e kei yɛ mì i hɔŋ o lɛŋnden kpede coo?

²⁵Nɛ̀ɛ́ busa yɛ nɛiyo le piɔɔ hoeyii bɛndoo siaa? Nɛ̀ɛ́ sɛɛ yɛ nɛiyo le piɔɔ-volia a taŋnden keiyo?

²⁶Nɛ̀ɛ́ tuisi yɛ piɔɔ o lɛŋnde vanaciee co nin te len coo,

²⁷le lɛŋnde ɲɛ vil coo le len yɔwviaa mì billo vil lecoo, mò pui ɲɛkɛndɛi?

²⁸Piɔɔ nɔ pá fuɲaa? mɔmndo yɛ, nɛ̀ɛ́-nɛ̀ velu yɛ ndu?

²⁹Ɔ́ɔ̀ kala velu mɛmma n kpungban-ndo? Nɛ̀ɛ́-nɛ̀ velu yɛ piɔɔ yúúyúúo?

³⁰Ɲɔɔ hiw pɛ ɲulullo, mɛnndan ma kendu maa pow, mɛmma biiŋuanndan ma yiinun kpungbɛi.

³¹A nɔla pá mɔmtombolaa yii nɛɛ pilɛ, mà tiimbuu yoole yii nanga-nsiiyo[52] len?

³²Vɛ̀ɛ̀ a nɔla pá ma soli loeon o telen bɛnda-o, mà cɔm mɔmtombolaa nɔ diolan aa Kɔ́lɔ́vúloo-o a cuavaa ndɔa nɛiyo?

³³A sina pá tɔŋnda hendulun halataalaa-o? Vɛ̀ɛ̀ nɔm handu tɔŋ lɛŋnden le co biyɔɔ-o ni?

³⁴Nɔm ca ko aa a deŋi dɔ́ɔ́ pɛ o yumbuyumboo lo, mɛnndan ma tol nɔm coo volo-volo?

³⁵Kɔla piɔɔ-volia kɔa lan, vɛ̀ɛ̀ nɔm viam ndu ni? Vɛ̀ɛ̀ nuaa o dimul nɔm ni aa i co o viomɔɔ nɔmndo bɛngu?

³⁶Nɛ̀ɛ́ yɔngu yɛ yow nɔ diolan Ibis-o kɔlkaloo? Nɛ̀ɛ́ ke yɛ kongillo dɛnɛ sinaa?

³⁷Nɛ̀ɛ́ nɔ yɛ dɛnɛ sinaa le yumbuyumboo cɔmndo tɛ́kpɛ́-tɛ́kpɛ́, a le mɛmma co o halataala-an kpow cuuŋuuo

³⁸haliko mi lɛŋnden le kengela kekew, mì puuloo liimian kpungban?»

³⁹«Mò va maa nɔm biilul yàlà laandoo ɲɛmahilu o dia-o ni? A nɔla pá yàlàà cuawva pimi mà soli nda hiluan,

⁴⁰telen nda va ihini o bɛ̀mɛ́lta ndalan, te kon te mà va cumullo o bɔɔ nin-ndo?

⁴¹Nɛ̀ɛ́ toosial-lɛ basabasakoendoo ɲɛ ndɔ diaa? Te cuavaa ndɔa va pɛ caŋndo Hala o lani, a yoomuma lepɛŋndan le tùú nda nɔ lɛ ɲɛdiaa loo, nɛ̀ɛ́-nɛ̀ toosiaa yɛ ɲɛdiaa ndaa?»