Read Kissi Yɔb 4 Bible Online

Yɔb 4 - Kissi bible

Yɔb 4

¹Mí Elifas fula Teman-ndo soaa, mó dimi aa:

²«Vana soo pɛ o nɔm ndo, a yulunin pá? Kɛ nɛɛ nɔla yɛ meiyo a hee?

³Tofa vɔ, nɔm va hoo vannda taw silaa-o, nɔm va hoo vanaa yoomuan ma cuu-a yoomuan lueiyo-o,

⁴nɔm va hoo vanaa va le delɔɔ-a mingio o nɛi-yo, nɔm va hoo vanaa vulan la va ɲiiyaa-a vulan kindio-o,

⁵nɔm kon sangaa komal nuaa ni, má vu n'dial. Tofa vɔ mɛɛ i komal nɔm pila má laasian kɔllo yɛ!

⁶Laalan nɔmndo co macoaa kɔlkɛsiaa nɔmndo le? Vɛ̀ɛ̀ tiindan nɔmndo le co dɛnɛ sakpoyɛi le?

⁷Keela vɔ kɔllo. Vɛ̀ɛ̀ vana tɛɛmbuu isɔɔ loo dɔawnun pá yɛɛvɛ? Vɛ̀ɛ̀ vanaa sandaa dɔkpɔlan pá nuaa?

⁸Ya, i dɔw sɔɛi pilɛ taasi: Vanaa váà dɛnɛ vɔɔndo-a, vanaa saŋ pɛ kɔlvesɛiyo-a, nda koaw kɔmnde ɲɛm nda saŋ mún-ndon ni.

⁹Vanaa vaa lende, hoeyii Hala-e dɔaw nda yɛɛvɛ ni, hoeyii fula Hala o milin-nde loam nda ni.

¹⁰Kuuliaa nda kuuliaa maa n'yàlà-o a pɛɛliaa nda pɛɛliaa maa n'tambili-o co ɲum pɔ́lì. Hala cii nda ciŋndon yimi.

¹¹Yàlàá nɔla mò vi te o sɔla visi o bii le, mì cuavaa yàlà laandoo a sɛŋin.

¹²Yoongoo pum komal-la sɔ́lɔ̀n, nile nilen le tuei ɲiimu-ɲiimoo pum,

¹³telen lɔma sɔlaan ma kela icɔl-lo, tuma diallon vu vanndacieea lɔ́ngùlɔn-ndo,

¹⁴mí siòònde bii ya taw, mí paalan la ɲiiya ya o n'dial nákà-nàkà.

¹⁵Hoeiye pum va ya hɔlla hullo, mí yiinde can ya lekɔɔ káyà.

¹⁶Mí cannun vanndo o hɔl, kɛ i sina ndu hɔlla le. Vundule ndɔlen le va isisi ya o hɔl, mí ɲɔɔ mei kpili, mí tuɛi diomndo pum dimio aa:

¹⁷‹Vanacieo nɔla pá mò sandu Hala o hɔl? O nɔla pá mò va o diandaa Vana cɔw ndu-o o hɔl?

¹⁸Te Hala laalan a vanaa ndɔa baalaa le, te o co pɛ dɛnnda tambɛilan saalɔnndo o mɛlɛkaa ndɔa tɛɛn,

¹⁹vɛ̀ɛ̀ o laalan yɛnin vanacieaa co haa icali o cɛila cɔwnun a bɔ́wvo lan nin-nda? Vɛ̀ɛ̀ o laalan yɛnin vanaa calta ndalan la kilan haa o cundoo nin-nda, à vana pusu haa cɔ́-cɔ́ maa dɛlu-a?

²⁰Kandɔɔ idii, nanu a icɔl à cuu cuinɔn. Vana dow ndi bɛɛ taasi le mà cuu mungén.

²¹Yoole yoomu ndaa va o baa len le sungun. A sɔlanin piɔ́mndo le kɔlkalu lepɛŋndo.›»