Read Kissi Yɔb 40 Bible Online

Yɔb 40 - Kissi bible

Yɔb 40

¹Mí Mɛlɛka cua sɔɛi, mó dimul Yɔb aa:

²«Nɔm co hoo sɛɛngianndo a Vana-Kpaayaa-Kpow-vo, vɛ̀ɛ̀ a nɔla pá mà kɔɔsa a ndu? Mɛɛ mulul-la niko, nɔm vana co hoo cɛɛŋɔnndo a ya o sondo-o.»

³O kon, mí Yɔb mulul Mɛlɛka aa:

⁴«Tofa vɔ, i co ɲɛ-ɲɛ le, vɛ̀ɛ̀ ya mulul-lɛnin nɔm? I handun-ndɔ baa o sondo mì meinun.

⁵I soo bɛmbɛ lepilɛ, o mɛɛlu lende, i mulì lɛnin hau le. I soo bɛmbɛ lediin, i hendu lɛnin ɲɛ lecoo le.»

⁶Mí Mɛlɛka mulul Yɔb o hoeyii fùkù-fùkùei nin, mó dimi aa:

⁷«Sim yili! Tosa vanapɔnɔyɛi maa! I co nɔm ɲuuniaa, ma kindi ya kɔl.

⁸A yeema lekɛ́ndɛi mà siinguu yamɛi nii yamɛi fondoei? Ya n yeema mà yaala ni, mà kennun nɔm pila di?

⁹Vɛ̀ɛ̀ yoomuma nɔmndan ma sulan pá a yoomuma ya Hala-an? Diom nɔmndo co pá ma diom ni letaŋndo?

¹⁰Mɛɛ dovin-ndɔ hau dovin lemasaa a biiloo, cuɛinun naŋɔɔ lemasaa ma cuɛinun lisaa.

¹¹Saŋ-ndɔ hau kɔltuw nɔmndo, tofa vɔ vanaa yongaa kpow o lepilɔɔ ma tuisi nda siɛmbulan.

¹²Tofa vɔ hau vanaa yongaa kpow ma tundu nda. Ciimiaa vɔ vanaa kɔlvesɛiya o foofo.

¹³Mingi vɔ nda kpow o puuloo bɛngu o lepilɔɔ, ma kinda nda o kaasoo ciee-piɔ́m.

¹⁴A tosa pɛ mun kpede, i lisanin nɔm le sɔɔn mun. Kani yoomuma ba nɔm kɛndɔɔ ma ciindiaanin nɔm.»

¹⁵«Tofa vɔ Visi bɛndu mamɛnndo[54]. Maa nɔm koni ya toosiaa ndu ni, billo o dia ni maa naw.

¹⁶Ndu o caŋ yoomuma ndɔan ma co ni, bɛmɛi ndɔɛi yɛ, o ɲɛsuma co ndu o demboo coo-an nin i co ni.

¹⁷Te o kindi pɛ puilen, vana ca ko aa yɔm sɛɛdre ni, ɲɛsuma co ndu o lɔlulan-ndan ma co makala poŋ.

¹⁸Paala ndɔlan la co maa kookoma n'daɲa, vana ca ko bɛɛ kpɛndɛn ndɔn aa ciliŋun kpɔŋndon ni.

¹⁹O ɲɛm ya Hala cɔw-von nin kpow, o ndu coo ya ciinun kɔl o cɔwva ni. Ya Vana cɔw ndu-o kínɛí o vo ni[55].

²⁰O pembon coo ɲɛdiaa ndɔɔ co ni, nɛɛ visia yondoa kɔa bimbilanndo-a.

²¹O pɔmbima huŋndan bɛngu o kɔa hinilan ni, o kpɛ̀ndɛ̀ma co o pɔlɔnndan bɛngu-an nin o kɔa vionnɔnndo ni.

²²O vunduma mapɔmbian bɛngu vana ca ndu ni, mì bil pei sɔlɔbɔlɔɔ va o pee kɔngɔ-o balu ndu sɔ́.

²³Tindian ma va bɛɛ ɲindɔɔ, o buulan te, ma va bɛɛ hunɔɔ háá ndu o sondoo bɛngu, kɔl fula ndu le.

²⁴O va pɛ lahɔl, nɛ̀ɛ́ nɔla yɛ ndu biyɔɔ? Vɛ̀ɛ̀ o yaŋɔɔlen vana nɔla ndu biyɔɔ le milinndo bulio ni?»

²⁵«Vɛ̀ɛ̀ vana cua pá N'Yalɛ́iyo o dolinnde? Vana yii ndu pá diɛɛmulen a yoolen?

²⁶Vɛ̀ɛ̀ vana vow ndu pá tɛngɛlen o milin? Vana buli ndu pá yaaloo a ciliŋii tundannde?

²⁷A yiyan maa o lambannin nɔm ɲɔɔloo mò dimul nɔm sɔɔn yeelɛiyon?

²⁸Vɛ̀ɛ̀ la yii pá kpemaa niaa ndu latulu mò siŋnun cɛ nɔmndo le fɛɛn a fɛɛn?

²⁹Vɛ̀ɛ̀ a pisul pá a ndu maa yow? A baanin ndu yoolen mì cuavaa nɔmaa laandua pisul a ndu?

³⁰Vɛ̀ɛ̀ vanaa yɔɔyaa cɛlannin pá le ndu pisio? Vɛ̀ɛ̀ a piɔwnin ndu yulaa tɛɛn?

³¹Vɛ̀ɛ̀ a baŋnin pá ndu kɔɔn o yáwvo coo? A bulinin ndu bollen a ciliŋii vana cuku suwva-e?

³²Yɔɔ vɔ baa ma pilan ndu! Le fɛɛn a fɛɛn nin a co va ken iyanndo, a tosa lɛnin ken lɔ́ɔ́-lɔ́ɔ̀ le.»