Read Kissi Yɔb 42 Bible Online

Yɔb 42 - Kissi bible

Yɔb 42

¹Mí Yɔb mulul Mɛlɛka aa:

²«I sinà maa a tiwba mà tosa dɛnɛ súú-súù ka, maa ɲɛ-ɲɛ pala nɔm le tuula nɔmndan peeloo le.

³Maa mɛɛ nɔm pila dimi yɛ aa: ‹Nɛ̀ɛ́ nɔla yɛ tuula nɔmndan puusiaa a sondo yeelɛiyo? O sɔɛi hiow ya-e nin ya vow sondoo ni. I ve ndi sina nuaa le.›

⁴Má dimul-la vɛlɛ aa: ‹Yaŋ nilan mì ɲuna nɔm, mà kindi ya kɔl.

⁵Diolan kínɛí yáà tuɛi nɔm ni, kɛ o laan, i ce nɔm ciŋ.

⁶Lelan, diom oo diom yáà dimi a nɔm o kɔɔ, i ce nihau maa i nɔ dí le. A ce ya lɛŋ o cundoo nin a o pultan nin sakpo.›»

⁷Telen Hala cii Yɔb sɔɔn mun dimul-lo, mó dimul Elifas fula Teman-ndo aa: «I tambu kɔl a nɔm a á caaŋaa nɔmaa ŋiɔnda, kani la dimi sɔɛi nii a toɲa maa vana ni baalaa Yɔb le.

⁸La nuwviaa niko navaa tovaa nda ŋɔmmɛw a saa kóndóa nda ŋɔmmɛw, mì la kɔ komal vana ni baalaa Yɔb. Mì la soli cɔlua kan sálà loamaa le tɛɛmbuu niaa tɛɛmbuu-o. O kon, mì vana ni baalaa Yɔb piɛi, mó ɲuna hakio malɔɔ le niaa. I cɛlnin piɛile ndɔle len a kɔlkɛndɔɔ mì mal sanga yáà tuu le niaa tuisio coo le diɔmii niɛi-yo, kani la dimi sɔɛi nii a toɲaa maa vana ni baalaa Yɔb le.»

⁹Mí Elifas fula Teman-ndo, Bildad fula Suha-o a Sofar fula Naama-o a kɔa, má tosa mɛɛ Mɛlɛka dimul nda le tosaa yɛ, mí ndu Mɛlɛka cɛl piɛile Yɔb piɛi ndu len a kɔlkɛndɔɔ.

¹⁰Yɔb ciiyo Hala piɛiyo le caaŋaa ndɔa, mí Mɛlɛka mingi ndu mɛɛ o va paandu yɛ. Mó ke Yɔb ɲɛm sɔlan bɛmbɛ lediin hiovɔɔ o n'paandon coo.

¹¹O kon, mí puapilɛa ndɔa, a laandua, a piaandua a vanaa ndáà siinian-nda kpede a kui dɔ́ɔ́ o Yɔb lo. Má dia ɲɛdiaa nda ndaa latulu, mí nda kpede cɔm ndu maa a kaola ndu. Má ɲɔɔlu ndu le dɛnɛ palaa kɛ́-kɛ̀ kei ndu coo, dɛnɛ palaa Mɛlɛka pila tuisi ndu coo-o pɛɛn. Mí vana-vana ke ndu volii humbei ipilɛ a kelɛi isianiei ipilɛ.

¹²Mí Mɛlɛka dɔaw ceen tɔ̀ Yɔb-o duaa hiovɔɔ ceen ndɔ tasoo coo. Mó sɔla saa vaalan tɔ́ a lahiɔɔlu (14 000), ɲɔɔmɛɛa vàála ŋɔmpum (6 000), nawva vàála tiɔn (2 000) a sofɛlɛa laandua vàá pilɛ (1 000).

¹³Mó sɔla vɛlɛ poaa a ŋɔmmɛw a hɔ́aa laandua a yaa.

¹⁴Mó ke cua ndɔ laandu tasoo diolan aa Yemima (kon co dimio ni aa «Poonpoondo»), o diinndɔɔ aa Kesia (kon co dimio ni aa «Peenge yɔm kanɛl»), o yàándɔɔ diolan aa Kerɛn-Hapuk (kon co dimio ni aa «Lee cuɛima cun kɛndɔɔ»).

¹⁵O lɛŋnde len nin kpede, vanaa seelun vanalanɔ ndóò naŋ hɔlla maa cuavaa Yɔb-a-o le, mí fuɲa nda ke nda kɛ́ɔ ba pilɛ nda yemaa ndaa latulu.

¹⁶Mó cii vɛlɛ yoomu vɔsilan kɛmɛ a belehiɔɔlu. Mó ca cuavaa ndɔa, cuavaa ndɔa imamaa háá o lambi hiɔlundɔɔ.

¹⁷O kon, mó yuuva kudɛɛ-kudɛɛ malan o vu.