Read Kissi Yɔb 6 Bible Online

Yɔb 6 - Kissi bible

Yɔb 6

¹Mí Yɔb cua sɔɛi, mó dimi aa:

²«Kpòkóó! Te vana óò nɔla pɛ dɛnɛ palaa nuu tuuvo! Te vana óò landu ndu pɛ o kiloo dɛ!

³Mbɔ̀ lusul ndɔɔ ndóò hiawnin bɛɛ sióóŋun co o mɛmma ihɛllan kɔngɔ-on. Lelan ya co sɔɔn dimio mɛ̀ɛ́-mɛ̀ɛ́ ka ni.

⁴Kani kɔɔn Vana-Kpaayaa-Kpow n co n'baŋnanndon ya o n'dial, kɔl nuu co lólò kɔɔn mun sɔɔsiaa. Ɲɛm vueinan Hala-on hinul-la.

⁵Vɛ̀ɛ̀ sofɛlɛ yondoo mɛli pá yeelan bil puiyaa ikɛi? Vɛ̀ɛ̀ nawvo càŋ pá bil o dia-o ikɛi?

⁶Ɲɛdiaa capalakalaa diannun pá te vana vow ndu i hɛl te? Vɛ̀ɛ̀ ɲɛ humbu co o pelte sɔɔlen nin-ndo yeela pá?

⁷Ya yɛ, ɲɛdiaa ya yeema bɛɛ pilan too, ndu siŋnun balo nuu a nàá ho ni.

⁸Àá, te ɲɛ ya co yeemaa-o ndóò tosan pɛ! Màá Hala ke ya ɲɛ ya co cumndo-o!

⁹Màá Hala cɛl le ya pusɔɔ! Màá o siɛndi ba ndɔɔ, mò siow ya tɛ̀i!

¹⁰O kon, i sɔlanin kɔl hinia, mì viow kponyoo o sanga imɔnɔ bɛndoo ho nin, le tùú ya kɛɛ Hala Diandaa diom too.

¹¹Ɔ́ɔ̀ yoomuma co vɔ ya le tiindanndo nɔu-van? A mɛɛlula kelun ndan le ya lan, biuvɔn yɛɛ ya co yɛ vɛlɛ?

¹²Mò va maa yoomuma nian maa yoomuma pow kpova ma co ni? Mò va maa kɔɔle nilen maa idaɲa le co ni?

¹³O co ɲɛ fondoo le mala ya co hoo cumndo-o co le? O co kɔlan te malaa ho kɔɛ ya levil nuaa le?

¹⁴Vana co o sangaa nin-ndo bɛnda mò sɔla ɲííye tuinɔnndo caan ndɔ o ba, hali o va bɛɛ maa o nɔ lɛ siòòŋii Vana-Kpaayaa-Kpow le[6].

¹⁵Puapilɛa niaa hui ya maa mɛmma pee pɔmbɔ, a hui ya mɛɛ mɛmma pee pɔmbɔan ma vela mì ma mɛi pee kɔ́llo o vɛsɛi nuaa yɛ.

¹⁶Telen sialten, mɛmma n'kpungban ma va pɛ tengaa, peela pɔmbɔla la pɛ̀ ca a mɛnndan.

¹⁷Kɛ te vɔɔlen le tiiya dɔ́ɔ́ pɛ la vela, ɲɛ tuw levɔɔ hɔŋul-tan pɛ, la velan sɛ́ɛ́n.

¹⁸Vanaa co kɔlan a nɔ̀nndan-nda bendu nɛiyo, à co heeloo a ba lɛŋnde veselɛilen má va laasianndo.

¹⁹Vanaa fula nɔ̀nndan Tema-a va peela lan tofaa, sɛ́lɛ́ bɛndu cɛn Saba-o bɛɛ va tiindanndo le mɛnndan sɔɔla lenin.

²⁰Kɛ tiindan ndaa siŋnun ɲɛ fondoo, kani mɛɛ nda tiiya lon, mí siɛmbulan la bii nda.

²¹Lende niaa bɛɛ co le ya telenndo ho ni, Mɛɛ niaa ce sangaa ho, mí siòònde bii niaa.

²²Vɛ̀ɛ̀ dimullo ya dimul niaa aa la ke ya ɲɛ pum? Ɲunaa ya ɲuna niaa ni aa la cua ɲɛ o ɲɛm niaan coo le ya yɔngoo

²³haliko mi hɛlun yaamɔɔ nuu pum te kon te mì baŋa yoomu nuu vanaa kɔlvesɛiya o ba?

²⁴La pɛɛkú ya, mì ya i mei. O pɔwla yɛɛ nin ya del-lɛ? La cɔm-ndɔ ya pɔwla lan.

²⁵Sɔɔn sandan tɛɛmbuu pá vana kɔl? Kɛ niaa niaa, o yɛɛ coo niaa co yɛ sɔɔn niaan mún dimio?

²⁶Bàà sɔɔn fula ya sondo-on kínɛí niaa co fooyaa ho ni? O hoeiye nin sɔɔn vana nɔ tiindan too dimì-on kɔannun ni.

²⁷Bàà mì la mal siondei le vííyo biyɔɔ? Vɛ̀ɛ̀ mì kelu vɔngoo le caan niaa pisio?

²⁸Niaa sei! La tofa ya hɔlla ciŋ! Bàà mì dimul niaa còòlan?

²⁹Mbɔ̀ la muungu o niaa pila nin! Sɔɔn lacòòvan va naa tɛɛn te. Mì cɔɔlu niaa dimul, la muungu o niaa pila nin! Sandaa nii co o dɛnɔɔ ho ni.

³⁰Vɛ̀ɛ̀ còòlan la co ya o lediɛɛmu ni? Mò va maa sondo nuu sina lɛ dɛnɛ palaa le?»