Read Kissi Yɔb 7 Bible Online

Yɔb 7 - Kissi bible

Yɔb 7

¹«O co macoaa telen lepɔtɔllo le vanacieo co tosaa o lɛŋnden coo le? Vɛ̀ɛ̀ palɛi ndɔɛi co hiovɔ̀ɔ́ maa palɛi vana co baalaa le salaa sɔlaa-o le?

²Mɛɛ yeemɛi bii cɛɔ le pɛngio o vunduan nuaa yɛ, mɛɛ vana co baalaa le salaa-o cum sala ndɔɔ nuaa yɛ,

³lende ya co paangun imɔnɔn cumndo ni. Ɲumma sangan ko ma co nin kɛ́ nuu ni.

⁴I hini dɔ́ɔ́ pɛ, i ɲunan aa: ‹Ko telen kuɛɛ paalen le sia yɛnin? Ɲumndan ma yala cuvɔɔ le. Lende ya lɔl somisomindo ni háá mì paalen le sɛ[7].

⁵Càá luɛi ya o diallon nin, mí kɔɔle nilen kpede le siŋnun kɛltan, yáw nuu buuluu mí kusuan ma luɛi ya.

⁶Palɛi nii co keleŋaa cuunɔnndo hiovɔɔ bɛɛ mɛɛ bolo vana lɔaa kolaa keleŋa hiovɔɔ nuaa yɛ. Yoomu nuu dɔɔnan, i nɔ lɛ kɔlkɛsiaa le.

⁷Éé Hala! Loonun maa hoeiye sii yoomu nuu co ni. Loonun vɛlɛ maa hɔlte nilen le ci lɛnin dɛnɛ kɛndɔɔ le.

⁸Hɔlte va ya tofaa len le ci lɛnin ya le, Hɔlta nɔmndan la nuwviaa nin ya, kɛ ya, i ve lɛnin te.

⁹Mɛɛ yumbuyumboo puusian, mò mɔɲamɔɲa nuaa yɛ, lende vana toal ciee-piɔ́m ni, vana muungu lɛ le.

¹⁰Vana tol pɛ ciee-piɔ́m, ndu muungu lɛ o ndu lo cɛinin te, cɛi ndɔɔ sina lɛ ndu le.

¹¹Le hee, i nɔla lɛnin meiyo le. Kɔl nuu co o sangaa nin, lelan fɔ mì soo. Yoomu nuu vaaliaa, lelan fɔ mì cɛɛŋun.

¹²Le yɛɛ nɛ n handu yɛ kpalilla le ya cumullo? Mò va maa mɛmma ihɛllan ya co ni? Mò va maa Ɲɛ yoomaa kɔndɔfili co o mɛmma ihɛllan nin-ndo ya co ni?›

¹³Te i dimi pɛ aa: ‹Kpele nuu ɲɔɔlunin ya, fonda ni hinia dɔɔniaanin somisomin nuu›,

¹⁴a vueinun ya o lɔma sɔlaan nin, a mingi ya yulan-yulan o vunduma ya ca-an nin.

¹⁵Te nɔm óò siow ya pɛ tɛ̀i, ken ndíì hiaw ya hɛnan. Piɔ́mndo ya hiow nin yeema a lou cuvɔɔ ho isisi háá mì paalan la fulan ya ceen.

¹⁶I mamnun-ndɔ ciki-ciki! I lonin yoomu le fɛɛn a fɛɛn te! Lelan, mal-la lende kínɛí, kani palɛi nii co cuunɔnndo.

¹⁷Yɛɛ nɛ vanacieo co yɛ, mí nɔm va ndu cɔu ho maa ɲɛ sɔvɛ bɛndu? Le yɛɛ ndu kɔllo handɔɔ coo?

¹⁸Le yɛɛ nɛ n co yɛ hɔlla mulio o ndu lo idii a icɔl? Le yɛɛ n co yɛ ndu kɔlɔɔ solio tuma-tuma?

¹⁹Lɔ́ɔ́ kuɛɛ n pɛngi yɛnin ya mɛɛndanndo ho, ma mal-la mì mel lelɔlu nɛ?

²⁰Mò va maa hakio ya cua ni? Yɛɛ ya tosal-lɛ nɔm, nɔm vana nɔ hoo vanndacieea fɛfɛlaa-o? Le kɔlɔ yɛɛ n hɛli yɛ ya le ya saangiaa? Vɛ̀ɛ̀ volɔɔ lusulaa ya siŋnun le nɔm ni?

²¹Vɛ̀ɛ̀ a nɔla mà biwnun tɛɛmbuula nilan te? Vɛ̀ɛ̀ a tiwba ma mal-la haki le pɔwla nilan te? Má cè ya nihau hinilan o cundoo nin! A nuwviaanin ya, kɛ i ve lɛnin te.»