Read Kissi Yɔb 8 Bible Online

Yɔb 8 - Kissi bible

Yɔb 8

¹Mí Bildad fula Suha-o cua sɔɛi, mó ɲuna Yɔb aa:

²«Lɔ́ɔ́ kuɛɛ n mei yɛnin sɔɔn kólóman mun dimio? Tuma kuɛɛ sɔɔn co mun maa hoeyii fùkù-fùkù-on pɛngi yɛnin fulaa nɔm o sondo?

³Vɛ̀ɛ̀ Hala cɛ̀l pá le dɛnɛ sandaa tundɔɔ? Vana-Kpaayaa-Kpow mangalà pá dɛnɛ connun sakpo-o?

⁴Te dɛnɛ hakio cuavaa nɔmnda tosa a ndu ni, mɛɛ dɛnɛ vɔɔn ndaa tuisi hee nda coo ni.

⁵Kɛ nɔm Yɔb, taa nuwviaa pɛ Hala, taa tɛɛlun pɛ Vana-Kpaayaa-Kpow,

⁶taa dendu pɛ kɔllo, mà sandu, o landunin hɔlla nɔm coo, mò mingi dɛnɛ sandaa nɔmndo o fonda ndɔɔ.

⁷Ɲɛ n sɔlanin siɔdii laci-o hiawnin polon a o nɔm óò sɔla paandu-o.

⁸Ɲuuniaa vɔ hau van bɛndua lɔ́ɔ́ kon, mà loonun taasila fuɲaa ndaa mamaa.

⁹Kani naa naa, ciɛi koni naa n velun ni, n sina sɔɔn masindɔn te. Mɛɛ vundulen le hiawnun nuaa yɛ, lende palɛi nɛi co o ceendo coo ni.

¹⁰Kɛ nda nɔla mà kindi nɔm kɔl, mà pɛɛku nɔm dɛnnda nda sina o yuuvɛi ndɛi nin-ndan.

¹¹Kuɛɛ cɔ́ɔ́cɔ́ɔ̀an ma vul-lɛ, te o co o dalaa nin te? Vana saalun pá démbédalàá o kɔngɔ, te o co o mɛnndan nin te?

¹²O vannun bɛɛ o kiyɛi-kiyɛi, mì vana kilu vɔ ndu le, te mɛnndan ma vela pɛ, ndu fɔlɔn vesa bil oo bil tase ni.

¹³Lende dɛnɛ vanaa pɔɛɛnun Hala-a co ni, lende kɔlkɛsiaa vana vo Hala loo laasian ni.

¹⁴Tiindan ndɔɔ nɛi yom te. Maa yala sontɛndɛ ɲɛ o kɛsi kɔllo coo-o co ni.

¹⁵O co tiindanndo cɛi ndɔɔ coo, kɛ cɛi kon simul te, O kɔman cɛi kon, kɛ o kindu le.

¹⁶Vanaa kan a co macoaa maa yɔm co o paalen bɛngu kɛ mí tándoo vannun o piaa lenin ca-o, ò lɛvun ndɔn pɛngɛlan o nakɔɔ coo-o,

¹⁷ó tuisi puundun ndɔn lɛŋ di o powtan tɛɛn-ndo pɛɛn. O powta bandílálan tɛɛn pɔ́ puundun ndɔn nan baloo ni.

¹⁸Kɛ te vana sungu ndu pɛ o fonda o va-o, fonda kon pɔɛɛnun ndu, o viinun aa: ‹Kabi bɛɛ i sina nɔm te few.›

¹⁹Kámáá a ce! Vanaa vo kan Hala le-a, nuaa ceen nda kɛndɔɔ mɛɛlu ni, o cuu pɛ siɔ kpede, yɔm celen vil vɛlɛ o fonda pilɛ kon.

²⁰Kɛì-kɛì! Hala kɛɛ vana dɛnɛ sandaa le, vanaa dɛnɛ vɔɔnda o mala le ni.

²¹O peinin sondo nɔmndo a mamɔɔ, mò pei cɔcɔn nɔmndo a yoondiaala kɔlkɛndɛlan.

²²Siɛmbulan la co yaamɔaa nɔmnda biyɔɔ, mì cɛila-kolala-toandaala vanaa vɔɔnda la lo pɛ́.»