Read Kissi Condii lisai 102 Bible Online

Condii lisai 102 - Kissi bible

Condii lisai 102

¹Piɛile vana dɛnɛ palaa nɔ lɛ mayoomu loo piɛi len. Mó cɔm Mɛlɛka cɛɛŋɔnnda ndɔlan lenin aa:

²Éé Mɛlɛka! Tuei piɛile nilen, màá cɛɛŋɔnnda nilan la tiiyaa nɔm o lani!

³Vin ya hɔlaa nɔmnda telen ya co o sangaa nin-ndo le. Tuie ya diom ɲɛkɛndɛi! Mulul-la cɔ́-cɔ́ telen ya co nɔm piɛiyo-o.

⁴Kani palɛi nii co hiownɔnndo maa ikum, paala nilan la co ŋɔu mɛɛ yinnde bɛndulen le loam vana nuaa yɛ.

⁵Kɔllo vesa ya mɛɛ bil nda kelu-o vesa nuaa yɛ. I pɔɛɛnun le ɲɛdiaa nuu dioo.

⁶Mɛɛ ya lo yondaa tei, mí ɲaw, mí muungu paalan kposon.

⁷I co macoaa maa hu co o lɛŋnde veselɛilen nin-ndo, mɛɛ kpukulukpoo calnun o cɛila vana co nin te lan tɛɛn nuaa yɛ.

⁸I co tiwba lɔan te, i co macoaa mɛɛ yowvo lonnun ndu pilɛ o cɛiyo tullo nuaa yɛ.

⁹Yaamɔaa nia co ya yeowlan lɔ́ɔ́-lɔ́ɔ̀, a co ya mamɔɔ, a co mɛɛnianndan o diola nilan.

¹⁰Cundoo siŋnun ɲɛdiaa nuu, te i va pɛ kolɔɔ, i mel mɛmɛma nian.

¹¹Le mɛɛ nɔm óò tambu kɔllo taw a ya yɛ, má pisi ya isisi, má viaw ya levil pɔ́.

¹²Palɛi nii co hiownɔnndo maa vundule icɔl, i co vesaa maa bil.

¹³Kɛ nɔm Mɛlɛka, a co masaa le fɛɛn-fɛɛn, a co Hala le lɔ́ɔ́-lɔ́ɔ̀.

¹⁴Ɲííye biinin nɔm a vannda Siɔn, kani telenndo co hoo ni, le nda kɛndɛi tosallo, a toɲa, telenndo tiiya.

¹⁵Powtan ndan vanaa baalaa nɔmnda kaola ni, ɲííye bii nda a cɛila bémbélan ndan.

¹⁶Vanaa-mangalaa-isɔɔa kpow vonin nɔm Mɛlɛka, mì masaa co o lɛŋnden coo-a kpow a ke biilu nɔmndo bɛɛlen.

¹⁷Telen Mɛlɛka minginin Siɔn tangul-lo, o fulanin ceen mò cɔmnun o biilu ndɔɔ nin.

¹⁸O tuɛinin piɛile vanaa ikɔɔa, o kɛɛnin o nda co ndu ɲunaa-o le.

¹⁹Màá dɛnɛ kon sɛvan le lambila koma hunnin-ndan, o kon mì vanaa koma vialunnin violɔn sɛnɛiyo-a biilu Mɛlɛka!

²⁰Mɛlɛka lo o Fonda-Diandaa ndɔɔ, mó naŋun le tofaa. O lo o halataala, mó mɛɛndan lɛŋnden

²¹le cɛɛŋɔnnda vanaa co o biyɔɔ nin-nda tueyɔɔ, le vanaa kayakayan o yoei piɔ́mnde-a tiimbuuo.

²²Vannda solinin Mɛlɛka tɔ́ɔ́ Siɔn, mà sangala ndu Yerusalɛm,

²³telen vannda a masɛi kpede cuungiannin-ndo, telen nda cuungiannin le ndu biiloo-o pɛɛn.

²⁴I va tɛɛn kpafii o ceen nuu nin, mó soli ya yoomuan, mó bingi yoomu nuu.

²⁵O kon, mí yonda aa: «Éé Hala nuu, kialu palɛi nii yoomuɛi tɛɛn te, nɔm Hala fɛɛn-fɛɛndo!»

²⁶Nɔm cɔw lɔ́ɔ́ kon lɛŋnden ni, mí bala nɔmndan la cɔaw vɛlɛ halataala.

²⁷Kon kpede ɲumnin, kɛ nɔm nɔm, a vanin le fɛɛn a fɛɛn. Lɛŋnden a halataalaa siɔŋnin maa yuulu, mà mangala ndi mɛɛ vana mangala volɔɔ cuɛinanndo nuaa yɛ. Lɛŋnden a halataalaa malnin fondaa.

²⁸Kɛ nɔm nɔm, a mangalannin te, yoomu nɔmndo nɔ lamɛɛlu le.

²⁹Hɔ́aa vanaa baalaa nɔmnda sɔlanin caltan, a nɔnin cuavaa ndaa mamaa hɔlten coo lɔ́ɔ́-lɔ́ɔ̀.