Read Kissi Condii lisai 103 Bible Online

Condii lisai 103 - Kissi bible

Condii lisai 103

¹Condii fula o condun David-on nin-nde. Éé kɔl nuu, mel Mɛlɛka balika! I yeema mì mel Hala diandaa balika a kɔl nuu kpow.

²A toɲa, i yeema mì mel Mɛlɛka balika a kɔl nuu kpow. I pɔɛɛnunnin dɛnnda kɛndɛla ndɔlan te, o pilɛ bɛɛ.

³Ndu mal-la haki le hakila nilan kpow ni, mó singi nààla nilan kpede.

⁴Ndu soli ya ciee-piɔ́m ni, mó kuumbuu ya kaolaa coo a ɲííye.

⁵O pei yoomu nuu a dɛnnda kɛndɛlan, mó mingi ya felengi. I co macoaa maa kovɛ co cɔnɔnndo coo-o.

⁶Mɛlɛka co dɛnɛ sandaa tosaa, o co yaman vanaa nda co delɔɔ coo-a kiolɔɔ.

⁷O cɔm Moise tuula ndɔlan, mó tosa dɛnnda kaamaalan Israɛlla o hɔl.

⁸Mɛlɛka nɔ ɲííye a kɛndɛi taw, o yala kɔl fula le, kaola ndɔɔ co o bɔɔ.

⁹O suu naa lɔ́ɔ́-lɔ́ɔ̀ le, o mandan yiyan vɔɔn o kɔl le fɛɛn a fɛɛn te.

¹⁰O co naa biyɔɔ mɛɛ hakila naalan la co yɛ le, o co naa sangaa tuisi coo mɛɛ tɛɛmbuula naalan la co yɛ le.

¹¹Kani mɛɛ halataalaa co coocoo nuaa lándán a lɛŋnden yɛ, lende koni kaola o nɔ le vanaa nɔ siòòŋii ndɔɛi-ya-o co o bɔɔ ni.

¹²Mɛɛ tiŋndo co nɛɛ paalen le can-nda a nɛɛ le del-la tɛɛn nuaa yɛ, lende koni o mal naa fondaa tɛɛn a tɛɛmbuula naalan ni.

¹³Mɛɛ fuɲaa kaola cuavaa ndɔa nuaa yɛ, lende koni Mɛlɛka kaola vanaa nɔ siòòŋii ndɔɛi-ya ni.

¹⁴Mɛlɛka sinà mɛɛ o toosiaa naa yɛ, o sinà maa a puuloo ɲɛ-pɔmbɔ daama naa n cownun ni.

¹⁵Yoomu vanndacieea co macoaa maa bil, maa bil co yondoo nin-ndo o yandu ni:

¹⁶kɛ te hoeiye hɔŋ dɔ́ɔ́ pɛ, o lonnun pɛ, vana sinà lɛ bɛɛ fonda o va-o le.

¹⁷Nduyɛ kabi sindɛ, háá le fɛɛn a fɛɛn vɛlɛ, Mɛlɛka vanin vanaa nɔ siòòŋii ndɔɛi-ya kaolaa. Taa bii pɛ kpema ndɔɔ, mà yiyan, mà bii silala ndɔlan. O tosalnin vɛlɛ cuavaa ndaa mamaa dɛnɛ sandaa.

¹⁹Mɛlɛka co o kpɛŋɛ lemasa ndɔɔ nin o halataala, o co masalen tosaa o lɛŋnden kpow coo.

²⁰Niaa mɛlɛkaa ndɔa, la mel Mɛlɛka balika. Niaa o soaa dɔ́ɔ́, mì la tosa hɛnan ndɔɔ a yoomuma niaan kpow-va pɛɛn.

²¹La mel Mɛlɛka balika, niaa vanaa baalaa ndɔa co hɛnan ndɔɔ tosaa-a.

²²Niaa vanaa o cɔw mì la co o fondala co o masale ndɔlen bɛngu-a kpede, la mel ndu balika! Ya vɛlɛ bɛɛ, i yeema mì mel Mɛlɛka balika a kɔl nuu kpow.