Read Kissi Condii lisai 105 Bible Online

Condii lisai 105 - Kissi bible

Condii lisai 105

¹La lisa Mɛlɛka mì la lisa diola ndɔlan. La cɔm dɛnnda ndɔlan vanaa-mangalaa-isɔɔa tɛɛn.

²La solul ndu condon mì la lisa ndu a ɲɛm-caan, la cɔm dɛnnda ndɔla kaamaalan kpow.

³La kɛsi kɔltan, kani diola ndɔlan la dendu, niaa vanaa co Mɛlɛka nuwviaa-a, la dɔwnun ɲaale.

⁴La mulul Mɛlɛka vana kpaayaa kpow hɔlla, la va ndu nuwviaa lɔ́ɔ́-lɔ́ɔ̀.

⁵Niaa fula o polale Abraham, vana baala ndɔɔ len nin-nda, niaa poaa Yakɔb, vana o hɛli-o-a, la loonun dɛnnda kaamaala o tosa lan, mì la yiyan dɛnnda kɔndɔfilta ndɔlan a yaman fula ndu o sondo-on.

⁷Ndu co Mɛlɛka Hala naa ni, ó co yaman kiolɔɔ o lɛŋnden kpow coo-o.

⁸O co yiyanndo a kpema fɛɛn-fɛɛn o yiiyo o kɔɔ, sɔɛi o dimi ken le lambilan a lambilan-nde.

⁹Kpema o yiilu Abraham-ndo co kon ni, mɛnalan o mɛnalan Isaak-o.

¹⁰Mó tiindal Yakɔb sɔɛi ken maa tɔŋ, mó yiilul Israɛl kpema fɛɛn-fɛɛndo.

¹¹Mó dimi aa: «I yɔngu nɔm lɛŋnde Kanaan-nden, kɛ́ nɔmndo vanin kon ni, nɔm a polale nɔmnden.»

¹²Nduyɛ, kunda pɔmbɔɔ daama nda va ni, a ve sɛ́lɛ́ le, mialla nda yɔŋnun o lɛŋnde len nin ni.

¹³A cɛn pɛ o lɛŋnden lepum nin, a kɔɛ o fondaa pum, a cɛn pɛ vɛlɛ o masalen lepum nin, a kɔ cal vɛlɛ baa pilɔɔ.

¹⁴Kɛ Hala cɛl mi vana-vana saangiaa nda le, mó deŋul masaa le nda aa:

¹⁵«La pilan vanaa nia ya pɔla-a le, la tósal vanaa-tɛɛngaa-diom Hala-a nia dɛnɛ vɔɔndo le.»

¹⁶Mó tuisi yiaan o lɛŋnden coo, balo ve lɛ le.

¹⁷Mó viam nda vanndo laci, kon yɔŋnun Yosɛf ni, má pisi ndu maa cɛ.

¹⁸Má baa ndu yɔlɔn o n'pelu, má yii ndu bololan a cilinndon,

¹⁹mó lo lende háá mí sɔɛi Mɛlɛka-e i peelun. O kon, mí sɔɛi ndu Mɛlɛka dimi-e i cɔm maa o tɛɛmbuu isɔɔ le.

²⁰Mí masaa viam vannda, má kɔ timbi ndu, mí simlacinɔ vanndacieea ke ndu pɛngio.

²¹Mó handu ndu vana lebollo o ndu lo cɛinin, mó kɛsi ndu ɲɛm ndɔn kpow o labɛngunin

²²le vanaa bɛndua va ndu o ba bɛngu-a pɛɛkoo mɛɛ ndóò hɛnan yɛ a le vanaa kɔlkalua ndɔa dɛnɛ sinaa pɛɛkoo.

²³O kon kɔɔli, mí Israɛl kɔa o lɛŋnde Esipte len nin, mí Yakɔb siŋnun miallo o lɛŋnde Ham-nden nin.

²⁴Mí Mɛlɛka kui vanaa ndɔa, má hiaw yaamɔaa ndaa.

²⁵Mí Mɛlɛka mangala Esiptea yiyanndan, má nɛinun nda, má muungu nda dúmbúlan yiiyo.

²⁶O kon, mí Mɛlɛka viam Moise vana baala ndɔɔ a Aarɔn vana o hɛli-o.

²⁷Má kɔ tosa dɛnnda kaamaala Hala ndóò dimul nda le tosaa Esiptea tɛɛn ndan, má tosa dɛnnda kɔndɔfilta bɛndulan o lɛŋnde Ham-nden nin.

²⁸Mí Mɛlɛka tuisi ɲumma n'kpungban, mí lɛŋnden le luɛi o ɲumndan nin, sɔɛi ndɔɛi del lɛŋ te.

²⁹Mó mangala mɛmndan koovan, mí suwva vu.

³⁰Mí ŋɔɔŋɔɔnda pia o lɛŋnde ndalen nin, má luɛi o masaa ndaa lo cɛilan nin.

³¹Mí Hala soaa, mí yɔ́lɔa a muiya tiw o lɛŋnde len nin kpow.

³²Mí Mɛlɛka tuisi nda loeon delian coo maa piɔɔ, mí yinnden le tiw o lɛŋnde ndalen coo kpow.

³³Mó tɛɛmbuu nakɔla n'rɛsɛnnda ndalan a voosun ndan, a yɔmii va o lɛŋnde ndalen nin-nde.

³⁴Mó soaa vɛlɛ, mí sóónɔa fula a paalennda, vanáà cii nda cɔm te.

³⁵Má dia tɔlɔɔlan a komɔɔ va o lɛŋnde ndalen nin-ndo kpow.

³⁶O kon kɔɔli, mí Mɛlɛka tosa mí hɔ́aa tasea va o lɛŋnde len nin-nda kpow sɔla piɔ́mndan, a ndáà sɔla o felengiyɛi ndɛi nin-nda pɛɛn.

³⁷Mó soli Israɛlla o lɛŋnde len nin a volion a á sianion o laba. O polama ndan nin, vana-vana lo kɔɔli le.

³⁸Mí Esiptea naŋ kɔl le faŋan nda faŋan kon-ndo, kani siòònde i va nda a Israɛlla.

³⁹Mí Mɛlɛka soli yumbuyumboo, mó kumbu ndu nda coo, mó soli vɛlɛ yinnden le nda ɲɔɔ teengiallo icɔl.

⁴⁰Má ɲuna ndu, mó tuisul nda siasoa, má pum bulu fula coocoo-o.

⁴¹Mó kumbi powta kpovalan, mí mɛnndan ma fula, mí ma va hiovɔɔ o lɛŋnde veselɛilen nin maa mɛmma pee.

⁴²Kani mí Hala yiyan a kpema diandaa ndɔɔ o kɔɔ, kpema o yiilu Abraham, vana baala ndɔɔ-o.

⁴³Mó soli vanaa ndɔa o lɛŋnde len nin, mí vanaa o hɛli-a viaw kponyoo.

⁴⁴Mó ke nda lɛŋnde vanaa-mangalaa-isɔɔa, má dia vali nda tosa loo tɔnɔ,

⁴⁵haliko mi ndáà kela o nɛila ndɔlan coo, mì ndáà bii tɔŋnda ndɔlan. La lisa Mɛlɛka!