Read Kissi Condii lisai 106 Bible Online

Condii lisai 106 - Kissi bible

Condii lisai 106

¹La lisa Mɛlɛka! La lisa ndu, kani o naŋ, kaola ndɔɔ nɔ lamɛɛlu le!

²Ɔ́ɔ̀ vana tiwnin ba mò cɔm dɛnnda kaamaala Mɛlɛka lan, mò cɔm vɛlɛ biilu ndɔɔ nɛɛ-nɛɛ ka-o?

³Duaa co le vanaa co tɔŋndan biyɔɔ, mà va dɛnɛ sandaa tosaa lɔ́ɔ́-lɔ́ɔ̀-a!

⁴Éé Mɛlɛka! Yiyan naa coo telen n co vanaa nɔmnda kɛndɛi tosallo-o, mala naa telen n co nda ciindiaa-o!

⁵Tosa mì n ce dɛnɛ kɛndɛ vanaa n hɛli-a, mì n sɔla ɲaale vanaa-mangalaa-isɔɔa nɔmnda nɔ-o, mì n lisan a kɛ́ nɔmndo.

⁶N cua hakio maa fuɲaa naa mamaa, n tosa dɛnnda vɔɔnndan, n tosa kɔlvesɛiyo.

⁷Telen fuɲaa naa mamaa va Esipte-o, a luei dɛnnda kaamaala n tosa lan yii le, má pɔɛɛnun dɛnnda kɛndɛla n tosal nda lan, má kindi nilan o mɛmma ihɛllan kɔngɔ, mɛmma ihɛlma makpɛ̀ndɛ̀an pɛɛn.

⁸Kɛ mí Mɛlɛka ciindiaa nda le diola ndɔlan bɛɛlen keo, le kpaaya ndɔ bɛndoo cɔmndo.

⁹Mó deŋul mɛmma ihɛlma makpɛ̀ndɛ̀an, mí ma vela. Mó keeku nda o lɛŋnde va o mɛmndan bɛngu len coo mɛɛ vana kɔa o lɛŋnde veselɛilen coo nuaa yɛ.

¹⁰Mó ciindiaa nda vanáà nɔ nɛyɔnndo a nda-a o ba, mó baŋa nda yaamɔɔa o ba.

¹¹Mí mɛnndan ma kpuluŋan yaamɔaa ndaa coo, o pilɛ bɛɛ fula le.

¹²O kon, má laalan sɔɔn Hala ndóò dimi-on, má sangala ndu a condon.

¹³Kɛ tamala bɛɛ, má pɔɛɛnun ɲɛ o tosal nda-o, a cum ndɛ tuu ndɔɔ le.

¹⁴Mí yeemɛi vɔɔnde bii nda o lɛŋnde veselɛilen nin, mí yiyanndo del nda le Hala tɔɔndanndo o lɛŋnde mɛmma co nin-nden nin.

¹⁵Mí Mɛlɛka ke nda o nda va ndu ɲunaa-o, má dia háá mó kusulan nda.

¹⁶Má tambu kɔltan a Moise nda Aarɔn o dɔ́ɔ́ngɔ́ɔ̀ nin, vanaa va teengen le Mɛlɛka-a pɛɛn.

¹⁷O kon, mí lɛŋnden le kumbin, mí le mial Datan, mí le kumbu vanaa va Abiram kɔɔli-a.

¹⁸Mí yinnden le loam vanaa va nda kɔɔli-a, mí le cuulu vanaa yɔŋ vɔɔŋaa kan mungén.

¹⁹Má toosiaa naw téndóó Horɛb, má muungu piɔm nda cɔw a ciliŋun teengian-ndo sooloo.

²⁰Má mangala biilu Hala ndaa, má tuula nawvo, o dia billo-o.

²¹Má pɔɛɛnun Hala, vana ciindiaa nda-o, o tosa dɛnndan taw o lɛŋnde Esipte len nin-ndo,

²²o tosa dɛnnda kɔndɔfiltan o lɛŋnde Ham-nden nin a la kaamaalan o mɛmma ihɛlma makpɛ̀ndɛ̀an kɔngɔ-o.

²³Mí Mɛlɛka tuu vɛlɛ le nda tɛɛmbuuo, kɛ mí Moise, vana o hɛli-o sim ndu Mɛlɛka o hɔl, mó ɲuna ndu le yiyan ndɔɔ mangalaa.

²⁴O kon, mí lɛŋnde kɛndɛle len le kuisin nda, a laalan sɔɔn Mɛlɛka dimi-on te.

²⁵Má muungu sɔɔn pɔmbɔn dimio o dɔ́ɔ́ngɔ́la ndalan nin, má kɛɛ le sɔɛi Mɛlɛka-e biyɔɔ.

²⁶O kon, mí Mɛlɛka heelu baa, mó mɛnalan nda maa o malnin nda ma kɔ vu o lɛŋnde veselɛilen nin.

²⁷Mó toaw cuavaa ndaa imamaa, má sɛŋin nɛɛ-nɛɛ ka, má kɔ vu vanaa-mangalaa-isɔɔa tɛɛn.

²⁸Má mulin piɔmndo Baal-Peɔr sooloo[38], má dia visin nda va vanvílɛ́iya lalalan solullo-on.

²⁹Má tɛɛmbuu Mɛlɛka kɔllo a dɛnnda vɔɔnnda nda va lan tosaa lan, mí nàà halimaa toal nda coo.

³⁰Kɛ mí Pineas can le sɔɛi kalɛi toosiaa, mí nàà halimaa kalaa cuu.

³¹Mí Mɛlɛka ca maa dɛnɛ sandaa va kon le ndu, a le lambilaa hun vialunnin fɛɛn-ndan ni.

³²Má tɛɛmbuu Mɛlɛka kɔllo o mɛnndan Meriba kɔngɔ, mí Moise sɔla sangalan taw le nda,

³³má saangiaa Moise taw-taw, mó muungu sɔɔn diɔmndon dimio.

³⁴Mí Mɛlɛka dimul nda le vanaa va Kanaan-nda diwvo, kɛ, má kɛɛ.

³⁵Má muulian nda vanaa sina Hala le-a, má muungu namula vanaa kan tosaa.

³⁶Má muungu piɔmaa ndaa sooloo, mí dɛnɛ kon siŋnun yaŋɔɔlen le nda.

³⁷Má soli poaa ndaa a cuavaa laandua ndaa sálà o halaa fondoa lo.

³⁸Má soli kooma vanaa tɛɛmbuu isɔɔ le-a sálà, koma poaa ndaa a ma cuavaa ndaa laandua pɛɛn, a nda solul piɔmaa va o lɛŋnde Kanaan-nden nin-nda sálàlan-nda. Mí lɛŋnde len le luɛi o màálan bɛngu a kooma ndan.

³⁹Mí nda pila nɔɔlian a dɛnnda nda va lan tosaa lan, má luɛi suunda-bilaa-n'piɔmndo.

⁴⁰Le hee, mí Mɛlɛka tambu kɔllo a vanaa ndɔa, mí kɛ́ ndɔɔ kuisin ndu.

⁴¹Mó mal nda vanaa-mangalaa-isɔɔa o ba, mí yaamɔaa ndaa siŋnun vanaa bɛndua ndaa.

⁴²Má saangiaa nda, má toal nda coo.

⁴³Telennda bɔɔ-bɔɔ, Mɛlɛka va nda baŋaa, kɛ, a va nilan kindio o tuula ndalan nin, ma va hiovɔɔ laci a dɛnnda hakilan tosaa.

⁴⁴Kɛ mí Mɛlɛka tuɛi cɛɛŋɔnnda ndalan diom, mó ca sanga nda va nin-ndo,

⁴⁵mó yiyan le kpema ndóò yiilu nda-o. Le tùú o kaola nda taw-vo, mó mangala tuu ndóò tuu kon-ndo,

⁴⁶mí vanaa nda va o ba o biyɔɔ nin-nda kpow tuinun nda iɲíí.

⁴⁷Éé Mɛlɛka Hala naa, ciindiaa naa, soli naa vanaa-mangalaa-isɔɔa tɛɛn, mà cuungiaa naa nɛɛ pilɛ, haliko mi n sangala diola nɔmnda diandaa lan, mì n biilu nɔm, mì n sangala nɔm.

⁴⁸Màá la va Mɛlɛka Hala Israɛlla balikaa mello lɔ́ɔ́-lɔ́ɔ̀! Mí vannda kpow muli aa: «Màá i tosan lende.» La lisa Mɛlɛka!