Read Kissi Condii lisai 108 Bible Online

Condii lisai 108 - Kissi bible

Condii lisai 108

¹Condei. Condii fula o condun David-on nin-nde.

²Éé Hala nuu, i nɔ kɔlkɛsiaa, i yeema mì solul nɔm condon, mì lisa nɔm a kɔl nuu kpede.

³Niaa baŋaa a bondomaa, la cɔn, i yeema mì lɔɔ ɲɛ-caa a telen paale siaalen.

⁴Éé Mɛlɛka! I lisanin nɔm vannda tɛɛn, i solulnin nɔm condon vanaa-mangalaa-isɔɔa o hɔl,

⁵kani kaola nɔmndo hiow halataalaa, sandii nɔmnde tiiya háá o halataala.

⁶Kpòkóó Hala! Cɔm bɔɔbɔɔyɛi nɔmii hiow halataalaa-e a biilu nɔmndo o lɛŋnden kpow coo!

⁷Ciindiaa naa a kpaaya nɔmndo, mà mulul naa, haliko mi n sɔla baŋaa, naa vanaa kaola nɔmnda.

⁸Hala co sɔɛi o Fonda Diandaa-Diandaa ndɔɔ aa: «I tiwnin ba, i co hunɔɔ Sikɛm piɔw, mì tuu bóllo Sukɔt a pɛltan.

⁹Ya nɔ Kalaad a lɛŋnde Masasee len ni. Mɔsil nuu co tàndá Efraim-ndo ni, Yuda co tinda lemasa nuu ni.

¹⁰Kpɛɛnɛi ya pulun nin-nde co Moab ni. Edɔm ya kɛsi pelon ni. I yonda yonda cɔwvo le lɛŋnde Filistii len cɔlɔbaa.»

¹¹Nɛ̀ɛ́ yaa yɛnin ya o kobi co hoo o kpakio nin-ndo nin? Ɔ́ɔ̀ vana liilanin ya Edɔm-ndo?

¹²Fɔ nɔm Hala. Nduyɛ, a cii naa malɔɔ, n co lɛ lakɔ naa niaa o cɔwvo le.

¹³Hun mala naa yaamɔɔa cɔlɔba, kani mala vanacieo mala vana-o co ɲɛ-ɲɛ le.

¹⁴Kɛɛ ti Hala va pɛ naa ikɛi, n nɔla yaamɔaa naa, kani o pesipesinin nda.