Read Kissi Condii lisai 109 Bible Online

Condii lisai 109 - Kissi bible

Condii lisai 109

¹Condii David-e, í fula o condun simlacinɔ vanaa n'condua nin-nde. Éé Hala, nɔm ya co biiloo ho nuaa ni, mei le,

²kani vanaa lahakia a vanaa yɔŋ vɔɔnda co ya cenelanndo, a co ya sɔɔn lacòòvan dimullo.

³A balu ya a sɔɔn nɛi vana kɔllo-on, a co ya delɔɔ coo fondo fúú.

⁴Ya i co nda kaolaa mì nda nda va ya sɔɔn hɛɛnduuo coo. Kɛ nduyɛ, ya, piɛilen tuŋ ya co ni.

⁵I co nda dɛnɛ kɛndɔɔ tosallo, mì nda va ya dɛnɛ vɔɔndo mingullo. I co nda canyɛi cɔmndo, mì nda va ya nɛyɔnndo tosallo.

⁶A co dimio aa: «La mal ndu vanaa yɔŋ vɔɔnda o ba, la simi vana hɛɛnduaa n'sɔɔ ndu o ba kɛndɔɔ coo.

⁷Telen o kialunnin iyama-o, màá o sɔla yaalaa, mò sɔla vɛlɛ yaalaa le piɛile ndɔlen!

⁸Màá palɛi yoomuɛi ndɔɛi bingi, mì vana celen muungu o fonda ndɔɔ!

⁹Màá cuavaa ndɔa siŋnun vííya, mì laa ndɔ siŋnun vanalanɔ pɔnɔɔ vi-o.

¹⁰Màá cuavaa ndɔa siŋnun vanaa kelan-nda ma va vannda ɲɔɔn piɛiyo, mà mɛi cɛila ndala piɔlɛilan!

¹¹Màá vanaa lakueea cua ɲɛm ndɔn kpow, mì mialla de baala ndɔɔ tɔnɔ!

¹²Màá vana tosal ndu dɛnɛ kɛndɛ le! Màá vana tuínun vííya ndɔa iɲíí le!

¹³Màá polale ndɔlen le cuu, mì diola ndɔlan la ɲum le fɛɛn a fɛɛn!

¹⁴Màá Mɛlɛka loonun hakila fuɲaa ndɔa! Màá hakila kala ndɔlan la malnun haki le!

¹⁵Màá Mɛlɛka va hakila ndalan cɔu lɔ́ɔ́-lɔ́ɔ̀, mò faŋa nda o lɛŋnden coo, mì vana pɔɛɛnun a nda o kɔɔ!

¹⁶Kani vanaa kan tosa dɛnɛ kɛndɛ lɔ́ɔ́-lɔ́ɔ̀ le, kɛ dɛnɛ palaa o tuisi vana co o sangaa nin-ndo coo ni, mò tuisi vɛlɛ ndu vana bala fondoo coo, háá mò dii vana co o sanga kɔllo nin-ndo.

¹⁷Sɔɔn dangan o dimi ni, màá n mingulan ndu pila! O yeema sɔɔn duaan te, màá duaa kɔ ndu levil!

¹⁸Màá o vownun mɛɛniaalan maa volɔɔla cuɛinan, mì la luɛi ndu niŋ maa mamɛn, mì la luɛi ndu o n'dial maa macuɛi!

¹⁹Màá la kuumbu ndu maa lavolɔɔ, mì la va ndu o caŋ lɔ́ɔ́-lɔ́ɔ̀ maa leyáw!»

²⁰Nuaa Mɛlɛka salanin vanaa co ya sɔɔn hɛɛnduuo coo-a ni, a co sɔɔn nin vɔɔnndon dimio-a pɛɛn.

²¹Nɔm yɛ, nɔm Mɛlɛka, Maalii nuu, loonun le diola nɔmndan, mà mala ya. Kɛndɛi nɔmnde co i bɔɔ, mala ya.

²²Dɛnɛ palaa co ya coo, i co o sangaa nin, kɔllo tambu ya nin.

²³I co kɔnndan maa levundu, i co ɲumndo, a co ya tovɔɔ maa sóónɔ.

²⁴Vulan la co ya ɲiiyaa a sumndo, ɲɛdiaa co ya pɛŋnden, i ɲaw.

²⁵I siŋnun vana nda co mamɔɔ-o yaamɔaa nia o hɔl, a co ya tofaa ma va bolle hiiluuo.

²⁶Mala ya, Mɛlɛka Hala nuu, ciindiaa ya a kaola nɔmndo.

²⁷Màá vannda ha sina maa nɔm co ya malaa nuaa ni! Màá nɔm Mɛlɛka tosa kon ni!

²⁸Nda tiw ba mà dɔw dangalan, kɛ nɔm a dɔawnin duaa. Taa cɛn pɛ le cɔwvo, siɛmbulan la biinin nda. Kɛ ya vana baala nɔmndo yɛ, i dɔawnunnin ɲaale.

²⁹Màá yaamɔaa nia tambu labɛɛ, mì siɛmbulan la tol nda maa doma bɛndu!

³⁰I heelunin diomndo kpélén, mì sangala Mɛlɛka. I biilunin ndu vannda taw tɛɛn,

³¹kani o co isisi vana bala fondoo o ba kɛndɔɔ coo le ndu ciindiaa vanaa co ndu yaalaa-a o ba.