Read Kissi Condii lisai 112 Bible Online

Condii lisai 112 - Kissi bible

Condii lisai 112

¹La lisa Mɛlɛka. Dɛnɛ kɛndɔɔ co le vana nɔ siòòŋii Mɛlɛka-e-o, o dɔawnun ɲaale taw o tɔŋnda ndɔlan biyɔɔ nin-ndo!

²Cuavaa ndɔa sɔlanin kpaayaa o lɛŋnden coo, kani Mɛlɛka dɔawnin vanaa dendu kɔltan-nda duaa.

³Bolofaa a dɛnɛ kɛndɔɔ vanin o vana kon-ndo cɛinin, dɛnɛ sandaa ndɔɔ vanin le fɛɛn a fɛɛn.

⁴Hali o ɲumndan nin, ɲɛ-tengaa vanin le vanaa dendu kɔltan-nda, le vanaa nɔ kɛndɛi ma kaola caanda a ɲííye-a.

⁵Vana sɔvɛɔ nɔ ɲííye, a kɔlkɛndɔɔ o dɔnda vana ɲɔɔ ni, mò bii tɔŋndan o dɛnnda ndɔlan nin.

⁶Vana bii pɛ sɔɛi Hala-e, ndu delnin lɔ́ɔ́-lɔ́ɔ̀ le, vannda vanin loonɔnndo a ndu o kɔɔ lɔ́ɔ́-lɔ́ɔ̀.

⁷Siòòŋii ve ndu a sɔɔn vɔɔn te. O nɔ kɔlkɛsiaa, o tiindan Mɛlɛka.

⁸O simnin kpeekpei, siòòŋii biinin ndu le, o canin yaamɔaa ndɔa ndu tambei o hɔl.

⁹Mò ke vanaa bala fondoa ɲɔɔn taw, dɛnɛ sandaa ndɔɔ vanin le fɛɛn a fɛɛn. O nɔnin kpaayaa, mì vannda ke ndu bɛɛlen.

¹⁰Vanaa yɔŋ vɔɔnda canin ndu mà tambu kɔltan, a vanin ciŋndon somisomio mà vi diallon. A toɲa, yeemɛi vanaa yɔŋ vɔɔnda siŋnunnin ɲɛ fondoo.