Read Kissi Condii lisai 118 Bible Online

Condii lisai 118 - Kissi bible

Condii lisai 118

¹La lisa Mɛlɛka, kani o naŋ, kaola ndɔɔ nɔ lamɛɛlu le.

²Niaa Israɛlla, la miinguu sondo aa: kani kaola ndɔɔ nɔ lamɛɛlu le.

³Niaa yungu Aarɔn-ndo, la miinguu sondo aa: kani kaola ndɔɔ nɔ lamɛɛlu le.

⁴Niaa vanaa nɔ siòòŋii Mɛlɛka-e-a la miinguu sondo aa: kani kaola ndɔɔ nɔ lamɛɛlu le.

⁵I va o sangaa nin, mí koŋul Mɛlɛka o lani, mó mulul-la, mó ke ya pɛngio.

⁶Mɛlɛka co vana co ya malaa-o ni, siòòŋii co ya a ɲɛ-ɲɛ le, yɛɛ vanndacieea nɔla yɛ ya yɔŋ?

⁷Mɛlɛka co ya ikɛi, o co ya malaa, i co yaamɔaa nia cɔu tambei.

⁸Mɛlɛka yɔngɔnndo co fisa a vanacieo tiindanndo.

⁹Mɛlɛka yɔngɔnndo co fisa a vanaa bɛndua tiindanndo.

¹⁰Vanaa sina Hala le-a ndáà cii ya nin bɛlubɛluu, kɛ mí puusiaa nda o diola Mɛlɛka lan.

¹¹Ndáà cii ya nin balɔɔ sɔ́, kɛ mí puusiaa nda o diola Mɛlɛka lan.

¹²Ndáà cii ya nin balɔɔ sɔ́ maa n'lɛ, kɛ ma ɲum maa tɛngɛ leyin, mí puusiaa nda o diola Mɛlɛka lan.

¹³A va ya ɲindɔɔ le ya malɔɔ, kɛ mí Mɛlɛka mala ya.

¹⁴Mɛlɛka co yoomuma nian ni, ndu ya co condei solullo ni, ndu co vana ciindiaa nuu ni.

¹⁵Yondala kɔlkɛndɛlan a yondala ɲaalelan la co tueinɔnndo o cɛila-kolala-toandaala vanaa sandaa nin aa: «Mɛlɛka co dɛnndan tosaa a kpaayaa.

¹⁶O cii ba kpaaya ndɔɔ heelu, o co dɛnnda kpaayalan tosaa.»

¹⁷I vinin te, i lonin yoomu mì cɔm dɛnnda Mɛlɛka tosa lan.

¹⁸O tuisi ya sangaa coo, kɛ o mel-la piɔ́mndo o ba le.

¹⁹La kumbil-la diola luɛyaala co le vanaa sandaa lan, mì luɛi, mì sangala Mɛlɛka.

²⁰La tofa vɔ diola luɛyaala Mɛlɛka lan, lon vanaa sandaa luɛi ni.

²¹I melnin nɔm Mɛlɛka balika, kani a mulul-la, a siŋnun vana ciindiaa nuu.

²²Ya pow vanaa cɔavaa cɛiya viow-vo, i siŋnun pow kilaa cɛiyo.

²³Mɛlɛka o ba kon fula ni, dɛnɛ kaamaa co kon le naa ni.

²⁴Paale Mɛlɛka cɔw ndu len le co len ni, n dɔwnun ɲaale mì n naŋnun kɔl lelan.

²⁵Éé Mɛlɛka! Vana ciindiaa naa! Cɛl mì n sɔla dɛnɛ kɛndɔɔ.

²⁶Duaa co le vana hin o diola Mɛlɛka lan-ndo. N malnun balikaa o Cɛi-Mɛlɛka-o nin.

²⁷Mɛlɛka ndu pilɛ kpé co Hala ni, pangele ndɔɔ co naa diondɔɔ coo, la bayiaa visin lasálàn o fonda-loamaa-lasálàá.

²⁸Nɔm co Hala nuu ni, i melnin nɔm balika, i sangalanin nɔm.

²⁹La lisa Mɛlɛka, kani o naŋ, kani kaola ndɔɔ nɔ lamɛɛlu le.