Read Kissi Condii lisai 132 Bible Online

Condii lisai 132 - Kissi bible

Condii lisai 132

¹Condii vannda keì soli nɛi-tɛɛn o kɔlan-nde. «Mɛlɛka, yiyan a David o kɔɔ, mà loonun sangala o sanga lan kpow.

²Kani ndu yii kpemaa o Mɛlɛka lo ni, mó cua ciɛ́i o Ó-Hiow-Ɲɔɔn-Kpow-vo lo, Hala Yakɔb-o pɛɛn aa:

³‹I luei lɛnin o ya lo cɛinin, mì kɔ hini o kpele nuu coo le.

⁴I kumbu lɛnin hɔlla mì lɔl te, i yifa lɛnin hɔlta koongula nilan mì yinda le,

⁵fɔ mì saalun fondaa le Mɛlɛka, nɛɛ calaa le Ó-Hiow-Ɲɔɔn-Kpow-vo, Hala Yakɔb-o pɛɛn!›

⁶Naa n tueyɔɔ maa kesu kpemaa co Efrata, mí kɔ saalun ndu Yaar, o yondoo nin.

⁷N luɛinun o Calta Mɛlɛka lan nin, mì n kɔ baŋnun vulan ndu o hɔl, nɛɛ o kɛsì pelon-nda.

⁸Mɛlɛka Hala nuu, cɔn niko mà hin o fonda nɔm pɛngiaa nin, hun a kesu kpemaa nɛɛ kpaaya nɔmndo co-a.

⁹Màá vanaa-solia-lasálàà nɔmnda cuɛinun cindaa maa lavolɔɔ, mì vanaa lo o lediom coo a nɔm-nda yonda a ɲaaloo!

¹⁰Le tùú n kaola David, vana baala nɔmndo-o, kɛɛ masa n pɔla-o le.

¹¹Mí Mɛlɛka mɛnalan David, mó yiilu ndu kpema ndu Mɛlɛka ndóò tɛɛmbuunin too aa: ‹I kɛsinin vana pilɛ fulaa o polale nɔmnden nin o kpɛŋɛ lemasaa coo o fonda nɔmndo.

¹²Te poaa nɔmnda bii pɛ kpema nuu a silala ya co nda pɛɛkoo lan, poaa ndaa bɛɛ calnin o kpɛŋɛ lemasa nɔmndo nin le fɛɛn a fɛɛn.

¹³Kani Siɔn Mɛlɛka hɛli ni, lon o yeema le caltan kilaa ni.

¹⁴O dimi aa: Nanu ya vanin pɛngio lɔ́ɔ́-lɔ́ɔ̀ ni, nanu ya vanin masalen tosaa ni, i yeema mì cal Siɔn.

¹⁵I peinin kobio ho a baloo, vanaa bala fondoa co lenin-nda vanin ɲɛdiaa pumndo.

¹⁶I cuɛinin vanaa-solia-lasálàá co lenin-nda cindaa, vanaa ndɔa lo o lediom coo-a yondanin a ɲaaloo.

¹⁷I tosanin mì masa kpaayaa hun violun o polale David len nin. I bɛɛndiaanin vanndo le muungoo o fonda vana ya pɔla-o, vana kon vanin maa fitina co biyɔɔ-o.

¹⁸I tuisinin yaamɔaa ndɔa siɛmbulan, kɛɛ ndu ndu, mɔsil lemasaa vanin ndu deŋio o lebol.›»