Read Kissi Condii lisai 135 Bible Online

Condii lisai 135 - Kissi bible

Condii lisai 135

¹Màá Mɛlɛka va yoomu! La sangala Mɛlɛka, la sangala diola ndɔlan. Niaa vanaa baalaa Mɛlɛka-a, la sangala ndu,

²niaa vanaa co o Cɛi-Hala-o nin-nda, niaa co o bɛ́ɛ̀ Cɛi-Hala naa nin-nda pɛɛn.

³La lisa Mɛlɛka, kani o naŋ, la sangala ndu o condon nin, kani o nɔ kɛndɛi.

⁴Kani o cii Yakɔb hɛli, o cii Israɛl siinguu o ndɔɔ.

⁵A toɲa, i sina maa Mɛlɛka co o bɔɔ, Mɛlɛka naa co o halataalaa kpow coo.

⁶O co dɛnnda o yeema lan kpow tosaa, dɛnndan o halataala a laan o lɛŋnden coo, laan o mɛmma ihɛllan coo, a la co le bɛngu-an.

⁷O co piɔɔ helaa cuaa o lɛŋnden mɛɛlulan, o co taŋndan volio le piɔɔ tuisio. O co hoeyii o va mandaa-e solio.

⁸Ndu Mɛlɛka tosa ni mí poaa tasea a cɔlua tasea sɔla piɔ́mndan Esipte. Kandɔɔ a poaa tasea vanndacieea, kɔ bii a cɔlua piaandua tasea cɔlua kom-nda.

⁹Mó cuu tɔɔmaselelan a dɛnnda kɔndɔfiltan niaa Esiptea tɛɛn, le masaa a vanaa baalaa ndɔa kpow cɔlɔbaa.

¹⁰O lɔɔ vanaa-mangalaa-isɔɔa taw, mó tosa mì masaa kpaayaa ha a sɔla piɔ́mndo:

¹¹Sihon masa Amoriia, Ɔk va masaa Basan-ndo a masaa va Kanaan-nda kpow.

¹²O kon kɔɔli, mó cua lɛŋii ndɛi, mó yɔngu vanaa ndɔa ndi kɛ́ɔ, Israɛlla pɛɛn.

¹³Àá Mɛlɛka, diola nɔmndan la vanin le fɛɛn a fɛɛn. Le vɔsilan a vɔsilan vannda vanin loonɔnndo a nɔm o kɔɔ.

¹⁴Kani Mɛlɛka kialunin vanaa ndɔa iyama, o tuinunnin vanaa ndɔa baalaa iɲíí.

¹⁵A volion a á sianion nda cɔw halaa vanaa-mangalaa-isɔɔa ni, vanndacieea cɔw nda a laba ni.

¹⁶A nɔ sondolan, kɛ a suu le, a nɔ hɔltan, kɛ a ci le.

¹⁷A nɔ nilan, kɛ a tui le, yoomu co nda o milin te.

¹⁸Velanndo nda pila a vanaa cɔw nda-a, lende koni vanaa co nda tiindanndo-a co vɛlɛ ni.

¹⁹Niaa yungu Israɛl-lo, la mel Mɛlɛka balika. Niaa vanaa fula o polale Aarɔn-nden nin-nda, la mel ndu balika.

²⁰Niaa yungu Levii-o, la mel Mɛlɛka balika. Niaa vanaa nɔ siòòŋii Mɛlɛka-e a, la mel ndu balika.

²¹La lisa Mɛlɛka fulaa Siɔn, o co icali Yerusalɛm-ndo pɛɛn. Màá Mɛlɛka va yoomu!