Read Kissi Condii lisai 141 Bible Online

Condii lisai 141 - Kissi bible

Condii lisai 141

¹Condii fula o condun David-on nin-nde. Éé Mɛlɛka! I co nɔm veeloo, hun cɔ́-cɔ́ ma mala ya, a yandi, tuei ya diom telen ya co nɔm veeloo-o.

²Màá piɛile nilen le hel o nɔm ndo sakpo mɛɛ kumii ansan i hel nuaa yɛ, mì bala ya co heeloo lan la siŋnun maa sálà solin a paale delaalen-ndo!

³Mɛlɛka, kanda sondo nuu, mà manda cɔcɔn nun.

⁴Cɛ̀l mì dɛnɛ vɔɔndo bii ya kɔllo, mì tosa dɛnnda vɔɔnndan naa vanaa yɔŋ vɔɔnda latulu le. I yeema mì tosa o nda yeema-o le.

⁵Vana bii sɔɛi Hala-i-yo tiwba mò lɔɔ ya, vana lo o lediom coo-o tiwba mò mingi ya o nɛi, dɛnnda icanyala ya nɔla kɛɛ le lan la co lan ni. Kɛɛ yɔŋ vɔɔn vanaa vɔɔnnda tiwba piɛile nilen simullo lɔ́ɔ́-lɔ́ɔ̀ le.

⁶Telen nda viawnin simlacia ndaa o powta kpovalan coo-o yaamɔaa nia canin ni maa toɲaa ya va dimio ni.

⁷Mɛɛ leŋnden le tɛnda o vaa nuaa yɛ, lende koni ciee-piɔ́m kumbinin sondoo, mò mel paala ndalaa sɛŋin nɛɛ-nɛɛ ka lan ni.

⁸Kɛɛ i co nɔm tofaa Mɛlɛka, Maalii nuu, o nɔm ndo ya hin vionnɔnndo nuaa ni, mal-la mì vi le.

⁹Kanda ya le yaŋɔɔla nda hendul-la lan a le mɛngɛlala vanaa yɔŋ vɔɔnda co ya-o.

¹⁰Màá vanaa yɔŋ vɔɔŋaa kan a haw o yaŋɔɔla nda pila hɛɛnduu lan ndan, mì ya koni i kɔ hiownun yɛngɛsɛɛ!