Read Kissi Condii lisai 143 Bible Online

Condii lisai 143 - Kissi bible

Condii lisai 143

¹Condii fula o condun David-on nin-nde. Mɛlɛka, yaŋnun piɛile nilen, yaŋ nilan o cɛɛŋɔnnda nilan. Mɛlɛka lo o lediom coo-o a Mɛlɛka sandaa n co ni, lelan, mulul-la!

²Vana baala nɔmndo ya co ni, kialu ya iyama le, kani vana-vana sendu nɔm o hɔl te.

³Yaamɔɔ co ya kɔɔli, o kpuva ya le ya nɛwvo. O co ya yɔɔ ciee-piɔ́m maa vanaa vi lɔ́ɔ́ kon-nda.

⁴Diallon vi ya, i tiw lɛ ba mì tosa ɲɛ-ɲɛ le.

⁵I co yiyanndo a sindɛ o kɔɔ, i co loonɔnndo a dɛnnda n tosa lan kpow o kɔɔ, i co kɔllo keela o dɛnnda n tosa a laba lan coo.

⁶I co balan heeloo o nɔm ndo, má cè ya nɔm o hɔl maa lɛŋnde kolɔɔ bii len.

⁷Kpòkóó Mɛlɛka! Mulul-la cɔ́-cɔ́, diallon vi ya kpow. Faŋal-la hɔlaa nɔmnda le, yɔŋii ya siŋnun maa vana co tolɔɔ o soondo nin-ndo.

⁸Le sɛ dɔ́ɔ́ pɛ idii, a cɔm ya kaola nɔmndo, kani nɔm ya tiindan ni. Cɔm ya nɛila ya kela coo lan, kani i muungu nɔm o ibuŋ.

⁹Baŋa ya yaamɔaa nia kpow o ba Mɛlɛka, kani o nɔm ndo ya hin vionnɔnndo nuaa ni.

¹⁰Pɛɛku ya ɲɛ n yeema mì tosa-o, kani nɔm co Hala nuu ni. Màá yiyan kɛndɛ nɔmndo yɔɔ ya o lɛŋnde tɛlɛlɛ len coo!

¹¹Mɛlɛka, yiyan le diola nɔmndan, ma kanda yoomu nuu. Nɔm vana lo o lediom coo-o, soli ya o mɔnɛi he nin.

¹²Le kaola nɔmndo, a kindanin yaamɔaa nia sondolan, mà cii vanaa co yoomu nuu simullo-a kpow tɛɛmbuu.