Read Kissi Condii lisai 147 Bible Online

Condii lisai 147 - Kissi bible

Condii lisai 147

¹Biiloo co le Mɛlɛka. O naŋ bɔɔ mì vana lisa Hala naa o condon nin, o bɛnda bɔɔ mì vana lisa ndu ɲɛkɛndɛi.

²Mɛlɛka co Yerusalɛm mingi tangul, o co vanaa va o biyɔɔ nin Israɛl-la bɔɔŋiaa.

³O co vanaa ndáà tambu kɔltan nda dandaa dɔvɔɔ, mo va boolɔnnda ndalan cɛwcɛwvo.

⁴O co loeon cɔmndo, o ke ikɛ́-kɛ̀ diolan.

⁵Mɛlɛka naa co o bɔɔ, o nɔ kpaayaa taw, kɔlkalu ndɔɔ nɔ lamɛɛlu le.

⁶Mɛlɛka mala vanaa tuisin tootoo-a ni, mà cɛn. Kɛɛ tuisio o tuisi vanaa yɔŋ vɔɔnda ni, mà tiiya lɛŋ dí.

⁷La solul Mɛlɛka condun malaa balikan, la lisa Hala naa a bondomaa.

⁸Ndu kumbu piɔɔ-volia o halataalaa coo ni, mò toosiaa piɔɔ le lɛŋnden pɔɔliaa, mò tosa mì billo vil o pembon coo.

⁹O co cɔlua baloo keo. Te yiaan ma nɛi pɛ basabasakoendea cuawva, ma caŋ, o ke nda ɲɛdiaa.

¹⁰O co a yoomuma soo nɔ-an te o dɔawnun ɲaale le, o co a kpaaya le o yeema le.

¹¹Kɛ vanaa Mɛlɛka yeema-a co vanaa nɔ siòòŋii ndɔɛi, má va kɛndɛi ndɔɛi cumndo-a ni.

¹²Niaa vanaa co Yerulɛm-nda, la lisa Mɛlɛka. Niaa vanaa co Siɔn-nda, la sangala Hala niaa.

¹³Kani o luei sɔkɔma co o diola niaalan-ndan yoomuan, mó dɔaw poaa kpow duaa.

¹⁴O co lɛŋnde niaalen kɔlɲuloo yɔngoo, mo va niaa baloo yɔngoo taw.

¹⁵Mɛlɛka co sɔɔn dimio o lɛŋnden coo, n co hiovɔɔ cɔ́-cɔ́.

¹⁶O co piɔɔ mɛmma n'kpungbaa tuisio maa lefun, o co piɔɔ yúúyúúo sɛŋio maa lapul.

¹⁷O co mɛmma n'kpungbama pɔmbɔan mɛlio, ɔ́ɔ̀ vana tiwba mo simul ɲulul ndɔɔ-o?

¹⁸Mɛlɛka soo dɔ́ɔ́ pɛ, kpungban mun n tengan, o cuu pɛ hoeiye, mɛnndan ma del hiovɔɔ.

¹⁹Mɛlɛka cɔm Yakɔb sɔɔn ndɔn, o cɔm Israɛl tɔŋndan a silala ndɔlan.

²⁰O cɔm ndɔ vanaa celen ɲɛ vaa lende lɔ́ɔ́-lɔ́ɔ̀ le, a sina tɔŋnda ndɔlan te. La lisa Mɛlɛka!