Read Kissi Condii lisai 17 Bible Online

Condii lisai 17 - Kissi bible

Condii lisai 17

¹Piɛile David len. Yandi Mɛlɛka! Tuei piɛile nile sandaalen. Yaŋ nilan o cɛɛŋɔnnda nilan, mà tuei piɛile nilen. I co nɔm piɛi a cɔcɔn lacòòvaa le.

²Nɔm cɔmnin sandii nii ni, tofa ma ce dɛnɛ isakpoyaa.

³Yaasiaa bɛɛ kɔl nuu icɔl, mà soli ndu kɔlɔ, tosa bɛɛ fulakɔɔlio le ya kɔlɔɔ sinaa, a seelunnin ɲɛ-ɲɛ vɔɔn te. Kani ɲɛ ya yiyanndo híw sondo nuu coo le.

⁴I cen tombola o dɛnnda vannda co tosaa lan coo le, sɔɔn fula nɔm o sondo-on ya del kɔɔli ni, mí va mandanndo a nɛila vanaa kɔlvesɛiya.

⁵I co kelaa o nɛila nɔmndan coo ɲɛkɛndɛi, i co siɛla le.

⁶Òó Hala! I co nɔm piɛiyo, kani a co ya mulullo. A yandi, yaŋ nilan mà tuei ya diom.

⁷Cɔm ya vanakɛndɛyɛi nɔmnde, nɔm vana co hoo vanaa vennun nɔm o ba bɛngu-a baŋaa yaamɔaa ndaa o ba-o.

⁸Manda ya maa hɔlte kúlte nɔmnden, vion ya o vunduma kumbannda nɔmndan bɛngu,

⁹yɔŋii vanaa kɔlvesɛyaa co ya saangiaa-a a yaamɔaa co ya tiilaa le ya diyɔɔ-a saalun ya.

¹⁰A nɔ iɲíí o lakɔl te, sɔɔn yongan tuŋ nda co solinndo o lasondo ni.

¹¹A co foofola bɛngula nila diomɔɔ, a cii ya nihau luei o píŋndo nin. A co ya mɛngɛlaa le ya kpuvaa mà yɔl-la lɛŋ

¹²mɛɛ yàlá yiaan ma co nɛiyo-o cal mɛngɛlaa le visio sɛɛsiaa nuaa yɛ, mɛɛ yàlà téndóó mɛngɛla o bɛ̀mɛ́lta ndɔlan nin nuaa yɛ.

¹³Mɛlɛka, cɔn ma ciŋilan yaamɔaa nia, ma yɔl nda lɛŋ. Baŋa ya vanaa kɔlvesɛiya ha o ba a mɔɛi nɔmii cɔwve.

¹⁴Mɛlɛka, baŋa ya vanaa vɔɔnda ha o ba a ba nɔm kpaaya, vanaa ceenda ha, à vɔ̀ngɔ̀ ndaa co o ceendo ho coo-a pɛɛn. Pimi nda a sanga n kɛsi le nda-o, mì poaa ndaa bɛɛ pim sanga kon, mà mel poaa ndaa imamaa sanga kon vɔ́yɔ́ɔ́.

¹⁵Kɛ ya ya, i canin hɔlaa nɔmnda o sandei nin, tuma ya tiandunin-ndo, i tofanin nɔm háá mì pim.