Read Kissi Condii lisai 18 Bible Online

Condii lisai 18 - Kissi bible

Condii lisai 18

¹Condii David-e, í fula o condun simlacinɔ vanaa n'condua nin-nde. David vana baala Mɛlɛka-o condu ndi tuma Mɛlɛka baŋa ndu yaamɔaa ndɔa kpow o ba-o, kɛ taama-taama Saul o ba.

²I kaola nɔm Mɛlɛka, nɔm co kpaayaa nuu ni.

³Mɛlɛka co pow kpova nuu ni, kpaki nuu a vana baŋaa nuu. Hala co pow kpova nuu ni, nɛɛ ya viannun-nda! Ndu co kɔ̀ɔ̀ cɔw nuu a kpaaya co ya ciindiaa-o ni, ndu co fonda mayoomu ya viannun nin-ndo ni.

⁴I yonda dɔ́ɔ́ pɛ aa: «Biiloo co le Mɛlɛka», o ciindiaa ya yaamɔaa nia o ba.

⁵Piɔ́mndo ndóò cii ya nin kayakaya, mɛmma bɛnduma tɛɛmbuu ɲɔɔn-ndan máà cii ya nin mɛiyia.

⁶Yoei piɔ́mnde ndíì cii ya nin yiwyiw, yala piɔ́mndo va ya o toandaa laci.

⁷O sanga nuu nin, mí ɲuna Mɛlɛka le malaa sɔlaa, mí yonnda kpélén Hala nuu o lani. O lo o cɛi ndɔ lemasaa nin, mó tuɛi ya diom, mí diom nuu tiiya ndu o lani.

⁸Mɛɛ Mɛlɛka tuulu kɔllo, mí lɛŋnden le hiiluŋ, mí le ɲiiya, mí pembon ɲiiya háá o tumndan.

⁹Kumnde va ndu fulaa o tɛɛngun lamilinndon nin, mí yinnden le va ndu sandei o sondo a dɛngulta sɔngɔɲɔnndan lenin.

¹⁰Mó naŋu halataalaa, mó toal lɛŋ o yumbuyumbu bɛndoo coo.

¹¹O va o mɛlɛkanɔ kanda ɲɛm Hala-on-ndo coo, mí mɛlɛkanɔ kon can, mó va kɔlan a kumbanndan pɛɛngaa o hoeiye nin.

¹²Mɛlɛka va o viannan o ɲumma n'kpungban nin maa o cɛi-kola-toandaa nin, mí yumbuyumbu yim-yimndo balu ndu maa mɛmma yingilaa.

¹³Ɲɛ-tengaa bɛndoo va ndu laci, o ɲɛ-tengaa kon yumbuyumboo, loeon delian a dɛngultan la va fulaa ni.

¹⁴Mí Mɛlɛka deŋi o halataala maa letaŋ, mí Ó-Hiow-Ɲɔɔn-Kpow-vo soli diomndo, mí loeon delian a dɛngulta leyinndan la fula.

¹⁵Mó va kɔɔn ndɔn vuuo, mó va yaamɔɔa puusiaa, mí piɔɔ-volia va iŋuanndi-ŋuanndiei, má laasian kɔltan.

¹⁶Mɛlɛka, mɛɛ n tuulu kɔllo, mɛɛ n kɔngɔlan a kɔlfulaa, mí lɛŋnde co o mɛmma ihɛllan bɛngu len le fula ceen, mí nɛɛ cendoo kɛsi tumndo-a fulan ceen vakpa.

¹⁷Mɛlɛka lo coocoo, mó tuisi ba ndɔɔ, mó saa ya, mó soli ya o mɛmma bɛnduan nin.

¹⁸Mó baŋa ya yaamɔaa nia kpaayaa o ba, vanaa nɔ nɛyɔn nuu-a, à hiow ya yoomuan-nda pɛɛn.

¹⁹Ndáà cii ya nin simulu o paale dɛnɛ palaa tol-la coo len coo, kɛ mí Mɛlɛka hun mala ya.

²⁰Mó soli ya o dɛnɛ palaa nin, mó ke ya pɛngio. O kaola ya taw, lelan o ciindiaa ya ni.

²¹Mɛɛ kela ni sandaa co yɛ, lende Mɛlɛka tosal-la ni, mɛɛ bala nilan la dendu yɛ, lende o dɔw ya vɔ̀ngɔ̀ ni.

²²Kani i co kelaa o nɛila Mɛlɛka lan coo, i kue Hala nuu levil te.

²³Tɔŋnda ndɔlan kpow la co ya o hɔl, i melnin silala ndɔlan te.

²⁴I tɛɛmbuu isɔɔ oo isɔɔ Mɛlɛka o hɔl te, i co mandanndo yɔŋii ya tosa yɔŋ vɔɔndo.

²⁵Mɛlɛka tosal-la mɛɛ sandii nii co yɛ, o dɔw ya vɔ̀ngɔ̀ mɛɛ bala nilan la dendu ndu o hɔl-lɛ.

²⁶Mɛlɛka, te vanndo lo pɛ o lediom coo a nɔm, nɔm bɛɛ lo o lediom coo a vana kon. Te vana kela pɛ kela toɲaa a nɔm, nɔm bɛɛ kela kela toɲaa a ndu.

²⁷Te vanndo dendu pɛ a nɔm Mɛlɛka, Nɔm bɛɛ cɔm diondɔɔ nɔmndo a ndu, kɛ te vannda kela pɛ kela tuunduanndo, nɔm bɛɛ a kei ndu baa o mundu.

²⁸Kani nɔm Mɛlɛka ciindiaa vanaa nda co mɔnɛi lueiyo-a ni, mà tuisi vanaa kuundiannda siɛmbulan.

²⁹Mɛlɛka Hala nuu, nɔm co ceen nuu teengiaa ni, nɔm co ɲɛ-tengaa nuu o ɲumndan nin ni.

³⁰Nɔm tosa ni mì del kunda vanaa cɔwva coo, nɔm tosa ni mì tiwba kpaki kobio hiovɔɔ.

³¹Nɛi Hala-o co o tiwnanndo, sɔɛi Mɛlɛka-e co sɔɛi toɲa. Ndu Mɛlɛka co kɔ̀ɔ̀ cɔwvo le vanaa viannun ndu o ba bɛngu-a kpow ni.

³²Kani nɛ̀ɛ́ co yɛ Hala, te o co Mɛlɛka ndu pilɛ kpé le? Nɛ̀ɛ́ co yɛ pow kpovaa, te o co Hala naa le?

³³Hala co ya kpaaya yɔngoo, o co nɛila nilan sɛndio ya laci.

³⁴O co pelun nun mingio maa pelun kial, o co ya simio o pembon coo.

³⁵O co ya cɔwvo pɛɛkoo, mì va kpaasiaa idaɲaa kindɔɔ a ba.

³⁶Mɛlɛka, va kɛndɛ nɔmndo co simio yili, a co ya kandaa maa kɔ̀ɔ̀ cɔw, ma va ya ciindiaa. A co piɛile nilen mulio ma va ya yoomuan lueiyo[3].

³⁷Nɔm Mɛlɛka co tosaa ni mì va kelanndo fɛ́ɛ́-fɛ́ɛ́, i co siɛla mì del te.

³⁸I co kɔlan yaamɔaa nia kɔɔli mì va nda bendallo. I múúngù a makɔɔ le te i cii nda diw kpow le.

³⁹Fɔ mì vɔɔciaa nda, o kon a nɔla lɛ cɔnɔnndo le, a lo ihini lɛ́ɛ́siɛn ya o labɛngunin.

⁴⁰Kani nɔm Mɛlɛka co ya yoomuan lueiyo le cɔwvo ni, nɔm co yaamɔaa nia malɔɔ ya o labɛngunin ni.

⁴¹A co nda tovɔɔ ya laci, i co vanaa nɔ nɛyɔn nuu-a diwvo.

⁴²A co koŋullo, kɛ a co vana malaa sɔla le, a co Mɛlɛka veeloo, kɛ o co nda mulul te.

⁴³I co nda ciimiaa mɛɛ cundu hoeiye kɔandu-o co nuaa yɛ, i co nda nɛwvo mɛɛ vana nɛw loolio o nɛi nuaa yɛ.

⁴⁴Nɔm Mɛlɛka, a co ya baŋaa vanaa nila kalua o ba, o kɛsi ya simlacinɔ vanaa-mangalaa-isɔɔa coo, vanaa yáà sina paandu le-a cal o ba nuu bɛngu.

⁴⁵I soo dɔ́ɔ́ pɛ, a tosa ɲɛ ya dimi-o. Mialla co ya lisaa.

⁴⁶Nda kpow, a fula mayoomu, a co fulaa a ɲiiyaa nɛɛ nda va a viannannda-a.

⁴⁷Mɛlɛka co yoomu. Biiloo co le pow kpova nuu! Biiloo co le Hala vana ciindiaa nuu!

⁴⁸Nɔm Hala cɛl ni mì mingi màá, má kɛsi vanaa súúla celennda ya o labɛngunin,

⁴⁹má baŋa ya yaamɔaa nia o ba. Nɔm tosà ni mì nɔla yaamɔaa nia, má ciindiaa ya vanaa kɔlvesɛiya o ba.

⁵⁰Lelan ya lisanin nɔm vanaa-mangalaa-isɔɔa tɛɛn ni, Mɛlɛka, mì sangala diola nɔmndan o condon nin.

⁵¹Mɛlɛka tosa dɛnnda bɛndulan taw le masa o hɛli-o malaa. O lo lediom coo a vana o pɔla-o, David a cuavaa ndɔa imamaa pɛɛn.