Read Kissi Condii lisai 21 Bible Online

Condii lisai 21 - Kissi bible

Condii lisai 21

¹Condii David-e, í fula o condun simlacinɔ vanaa n'condua nin-nde.

²Mɛlɛka, Masaa dɔwnun ɲaale le kpaaya nɔmndo, o naŋ kɔl le baŋa n baŋa ndu-o.

³Kani a ke ndu ɲɛ kɔl ndɔɔ ndóò yeema-o, a kɛɛ le ndu ɲɛ o va nɔm piɛiyo-o yɔngoo le.

⁴A co hunɔɔ ndu o hɔl a duaalan taw, a co mɔsil lemasa n'sianio handɔɔ ndu o lebol.

⁵O ɲuna nɔm le yoomoo sɔlaa, má yɔngu ndu ndu, má bɛndi palɛi ndɔɛi taw, o viawnin si háá mò viow si!

⁶Le tùú n baŋa ndu-o, kpaaya ndɔɔ co o bɔɔ, a yɔngu ndu naŋɔɔ a vanasɔvɛyɛi.

⁷A co ndu siinguuo vana duaa le lɔ́ɔ́-lɔ́ɔ̀, o pei ndu ɲaaloo o kɔl le co n co ndu o hɔl-lo.

⁸Masaa kɛsi kɔllo Mɛlɛka coo, nduyɛ, le vanakɛndɛyɛi Hala-Hiow-Ɲɔɔn-Kpow-vo-e, o siɛlanin te.

⁹Ba nɔmndo toalnin yaamɔaa nɔmnda kpow coo, ba kɛndɛ nɔmndo tisanin vanaa nɔmndo-a coo.

¹⁰Paale n fulanin nda o hɔl-ten, a loamnin nda mɛɛ ɲɔɔ ŋɔa o tóndóó nin nuaa yɛ. Mɛlɛka mialnin nda a kɔltuwvo, yinnden le loamnin nda.

¹¹A tɛɛmbuunin cuavaa ndaa o lɛŋnden coo, mà tɛɛmbuu yɛyii ndɛi o vanndacieea tɛɛn.

¹²Hali a yeema bɛɛ le nɔm dɛnɛ vɔɔndo tosallo, mà tuu tuula vɔɔnndan le nɔm cɔlɔbaa, a nɔlanin nɔm te.

¹³Kani a vuunin nda a kɔɔn nɔmndon, mì nda pila sɔɔndian.

¹⁴Cɔn Mɛlɛka! Cɔn a kpaaya nɔmndo! N lisanin nɔm o condon nin, mì n sangala kpaaya nɔmndo.