Read Kissi Condii lisai 22 Bible Online

Condii lisai 22 - Kissi bible

Condii lisai 22

¹Condii David-e, í fula o condun simlacinɔ vanaa n'condua nin-nde. A ɲɛ-caa nɔ diolan aa «Kial idiiyo»-o vana soli ndi ni.

²Hala nuu! Hala nuu! Le yɛɛ n mal-lɛ ya? Le yɛɛ n lonnun yɛ lándán, a co ya ciindiaa le? Le yɛɛ a co somisominnda nilan tueyɔɔ le?

³Kpòkóó Hala nuu! Ipala, i co koŋullo coocoo, kɛ a co ya mulul te. Icɔl vɛlɛ, i mei sondo le, i co somisominndo tuŋ!

⁴Nɔm yɛ, nɔm co O-Diandaa ni, a co icali o lisala Israɛlla nin.

⁵Nɔm fuɲaa naa mamaa ndáà laalan ni, nɔm ndáà laalan ni, nɔm yɛ má va nda baŋaa.

⁶A va nɔm cɛɛŋɔnndo o lani, má va baŋaa sɔlaa. Nɔm ndáà tiindan ni, lelan siɛmbula tul nda le.

⁷Ya yɛ, maa dɛlu ya coni, i co maa vanaciee le. Vannda co ya bɛɛlan tɛɛmbuuo a co ya pɛɛsaa.

⁸Vanaa co ya cɔu-va kpow a co ya mamɔɔ, a co cɔcɔn a bolle hiiloo aa:

⁹«O sɔɔ dɛnɛ ndɔɔ Mɛlɛka o ba, Mɛlɛka baŋa niko ndu, mò ciindiaa ndu, kani O kaola ndu.»

¹⁰Mɛlɛka, nɔm soli ya kala nuu o dembe ni, má kɛsi ya nila ɲulu kala nuu o ibuŋ.

¹¹Yáà violɔn-ndo dɔ́ɔ́, má sɔaa ya nɔm o ba, kabi kala nuu o ipulu, nɔm co Hala nuu ni.

¹²Kɔa ya levil te, kani dɛnɛ palaa co nin ya kpɛɛlun, nduyɛ, i nɔ vana malaa le.

¹³Yaamɔaa nia tiila ya maa navaa tovaa sɛ́lɛ́, a balu ya maa navaa ibɛmɛa Basan.

¹⁴A kumbil-la sondolan kpangaɲan, maa yàlàá co kuuliaa a sɛɛsiaa-a.

¹⁵I co saŋnɔnndo maa mamɛn, paalan la faŋan ya o boondon. Kɔllo siŋnun ya maa dukpa, o co ya tengaa nin.

¹⁶Yoomuma nian ma vesan maa bɔ́w, diɛɛmulen le vesa ya o sondo sɛ́ɛ́n, a handu ya o sɛiyo sondoo.

¹⁷Kani tunnda tiila ya. Kunda vanaa yɔŋ vɔɔnda balu ya sɔ́ a buuluu ya balan a pelon.

¹⁸I nɔla mì cɔm paala nilan kpow. Vanaa kan co ya mɛɛndanndo tólóó-tólóó.

¹⁹A co volɔɔla nilan piɔvanndo nda pilaa tɛɛn, a co sionnden malɔɔ le vana co doma ni bɛndoo cua-o sinaa[4].

²⁰Kɛ nɔm Mɛlɛka, kɔa ya levil te! Nɔm co yoomuma nian-ndo, sɔɔnguu cɔ́-cɔ́ mà mala ya.

²¹Baŋa yoomu nuu o mɔɛi cɔwve bɛngu, mà soli ya tunnda ha o n'yɛmbɛ.

²²Soli ya yàlàá o lasondo, mà baŋa ya o leela cìíya ha tɛɛn! Se kɛ a cii ya nihau bɛɛ mulul!

²³I pialnin diola nɔmndan puapilɛa nia tɛɛn, i lisanin nɔm vannda taw tɛɛn.

²⁴Niaa nɔ siòòŋii Mɛlɛka-e-ya, la lisa ndu! Niaa vanaa fula o polale Yakɔb len nin-nda kpow, la biilu ndu! Niaa fula Israɛl o ipulu-a kpede, la ɲiiya Mɛlɛka o hɔl!

²⁵Kani Mɛlɛka pɛɛsa vana co o sangaa nin-ndo o dɛnɛ palaa ndɔɔ nin te. O vìn vana kon hɔlaa ndɔa le. Vana kon cɛɛŋun pɛ dɔ́ɔ́ ndu o lani le ndu malaa, o tuei ndu diom.

²⁶Nɔm co tosaa ni mì va diola nɔmndan lisaa vannda taw tɛɛn, i peelunin ciɛ́ɔn ya cua-on vanaa nɔ siòòŋii nɔmnde-a kpow o hɔl.

²⁷Vanaa bala fondoa dianin mà pim, vanaa co Mɛlɛka nuwviaa-a sangalanin ndu. Màá la viow yoomu!

²⁸Vanaa co o lɛŋnden mɛɛlulan-nda kpow a loonunnin a Mɛlɛka o kɔɔ, mà muungu ndu o ibuŋ. Yungula vanaa-mangalaa-isɔɔa kpow la baŋnin vulan ndu o labɛngunin.

²⁹Kani Mɛlɛka nɔ masalen o ba ni, ndu o ba bɛngu vanaa-mangalaa-isɔɔa kpow a co ni.

³⁰Vanaa kpaayaa o lɛŋnden coo kpow a dianin mà baŋ vulan ndu o labɛngunin. Vanaa co kɔlan ciee-piɔ́m-nda kpede, a nɔla lɛ lou yoomu le-a, a baŋnin vulan ndu o labɛngunin.

³¹Cuavaa ndaa o nda kɔɔli a tosalnin ndu Mɛlɛka baalaa, mì vannda dimul nda sɔɔn ndɔn.

³²A cɔmnin a vialunnin-nda sandii ndɔɛi, kani o tosa dɛnnda bɛndu.