Read Kissi Condii lisai 26 Bible Online

Condii lisai 26 - Kissi bible

Condii lisai 26

¹Condii David-e. Kiolu ya iyama, Mɛlɛka! Kani kela nuu nɔ isɔw le. Nɔm Mɛlɛka ya co tiindanndo ni, i siɛlanin te.

²Mɛlɛka, dɔw ya taasi, ma fɛfɛla ya, tosa fula makɔɔ ma yaasiaa kɔl nuu.

³I co kaola nɔmndo cɔu ya o hɔl, i co kelaa mɛɛ toɲa nɔmndo co yɛ.

⁴I cel naa vanaa co vannda huiyo-a latulu le, i co kela naa vanaa muuluannda le.

⁵Vanaa co dɛnnda vɔɔnndan tosaa-a nɛinun ya, i cel naa vanaa kɔlvesɛiya latulu le.

⁶I co bala nilan pulɔɔ le cɔmndo maa i tɛɛmbuu isɔɔ le, i co fonda-loamaa-lasálà nɔmndo balɔɔ, nɔm Mɛlɛka,

⁷le nɔm balikaa mello, a le dɛnnda kaamaala nɔmndan kpow vannda dimullo.

⁸Òó Mɛlɛka! Cɛi n co nin-ndo hɛnan ya, fonda biilu nɔmndo co-o pɛɛn!

⁹Tósà a ya mɛɛ n tosà a vanaa lahakia yɛ le, sólì ya yoomoo o milin naa vanaa diuvaa n'vannda latulu le,

¹⁰vanaa balan la co kan lanɔɔlɛilan-nda, á bii kan ɲɔɔn le luɛyɔɔninndo-a pɛɛn.

¹¹Kɛ ya ya, kela nuu nɔ isɔw le, lelan, tuinun ya iɲíí ma baŋa ya.

¹²I co isisi yili o sandei nin. I melnin Mɛlɛka balika kundalan kpow o hɔl.