Read Kissi Condii lisai 30 Bible Online

Condii lisai 30 - Kissi bible

Condii lisai 30

¹Condii David soli o kafo-kumbia Cɛi-Hala-o coo-e

²Mɛlɛka, i yeema mì cɔm bɔɔbɔɔyɛi nɔmnde, kani a soli ya ciee-piɔ́m. A cɛl mì yaamɔaa nia dɔwnun ɲaale a ya o kɔɔ le.

³Mɛlɛka Hala nuu, i ɲuna nɔm le ya malaa, má singi ya.

⁴Nɔm soli ya ciee-piɔ́m ni, Mɛlɛka. Yáà bii nin nɛiyo le kɔlan o sɛiyo nin, kɛ má mingi ya yoomu.

⁵La solul Mɛlɛka condon, niaa vanaa lo o lediom coo a ndu-a. La lisa ndu mì la cɔm diondɔɔ ndɔɔ.

⁶Le telen bingi koni o tuulu kɔl ni, kɛ vanakɛndɛyɛii ndɔɛi ndi nɔ lamɛɛlu le. Caŋndan la soo bɛɛ icɔl, idii vannda deŋi a kɔlkɛndɔɔ.

⁷Telen ya vannun a kɔlɲuloo-o, nuaa yáà yiyan ni aa: «I del-lɛnin lɔ́ɔ́-lɔ́ɔ̀ le.»

⁸Nɔm Mɛlɛka, a kɛndɛi nɔmnde, mí nɔm óò simi ya o fonda sɔvɛɔ. Kɛ má vin ya hɔlaa nɔmnda, mí yɔŋnun yulan-yulan.

⁹Mɛlɛka, nɔm ya co koŋullo ho o lani ni, nɔm ya co tɛɛlɔnndo nuaa ni, Maalii nuu.

¹⁰Te i vi pɛ, mì kɔɛ ciee-piɔ́m, ɔ́ɔ̀ tɔnɔ n sɔlanin a ya-o? Vanndo siŋnun nin pɛ cundoo, vɛ̀ɛ̀ o tiw yɛnin vɛlɛ ba mò sangala nɔm?

¹¹Lelan, tuei ya diom, Mɛlɛka, ma tuinun ya iɲíí. A yandi Mɛlɛka, mala ya.

¹²A mingi cɛɛŋɔnnda ya va lan condon a kponyoo, a soli ya volɔɔla biisilan lekɔɔ, má vow ya volɔɔla kafolan.

¹³Lelan, i solulnin nɔm condon a kɔl nuu kpede, i meinin sondo le. Mɛlɛka Hala nuu, i lisanin nɔm lɔ́ɔ́-lɔ́ɔ̀.