Read Kissi Condii lisai 31 Bible Online

Condii lisai 31 - Kissi bible

Condii lisai 31

¹Condii David-e, í fula o condun simlacinɔ vanaa n'condua nin-nde.

²Mɛlɛka, i hin vionnɔnndo nɔm o ba bɛngu, Màá siɛmbula bii ya le! Baŋa ya a sandii nɔmnde.

³Yaŋ nilan o ya lo, mà keleŋa ya baŋa. Va Pow kpova nuu a kpaki nuu haliko mi sɔla cindaa.

⁴Kani nɔm co Pow kpova nuu a fonda kanda ya-o ni. Sim ya laci, ma cɔm ya nɛiyo le diola nɔmndan.

⁵Soli ya o yaŋɔɔle nda hendul-la len nin, kani nɔm co vana kándà ya-o ni.

⁶I mal yoomu nuu nɔm o ba, nɔm baŋa ya-o, nɔm Hala lò o lediom coo-o.

⁷Vanaa co piɔmaa fondoa sooloo-a nɛinun ya bɔɔ. Ya ya, nɔm Mɛlɛka ya laalan ni.

⁸I dɔawnunnin ɲaale mì naŋ kɔl le vanakɛndɛyɛi nɔmnde, kani a ce dɛnɛ palaa nuu, má sina kɔl yulan-yulan co ya nin-ndo.

⁹A mel-la yaamɔɔ nuu o ba le, kɛ má cua ya isisi, mí sɔla hɔ́ɔ́yɛi.

¹⁰Mɛlɛka, tuinun ya iɲíí, kani i co bɔɔ sangaa. Hɔlta nilan, bolola nilan a dembe nuu co bɔɔ o sangaa nin.

¹¹Yoomu nuu dɔwnun yɛɛvɛ a sanga kɔllo, vɔsila nilan la co hiovɔɔ o ŋɔɔcanndo nin. Yoomuan ma cuu ya le haki nuu, paalan la cuulu ya o n'dial.

¹²Yaamɔaa nia co ya yeowlan, vanaa naa n cal latulu-a co ya bɛɛla tɛɛmbuuo. Siòònde bii caaŋaa nia kpede a dɛnɛ nuu, a ce ya pɛ o bɛ́ɛ̀, a ɲaanun.

¹³A pɔɛɛnun ya o yiyannda ndalan nin mɛɛ vana pɔɛɛnun sɔɛi vana vílɛ́iyo yɛ, i siŋnun ɲɛ vana nɔ lɛ mako loo.

¹⁴Congula vannda co ya lan kpede, i co tueyɔɔ, siòònde balu ya nɛɛ-nɛɛ ka. A co keiyo calle kundalan o sɔɛi nii coo, a co ya dúmbóó yiiyo le ya diyɔɔ.

¹⁵Kɛ ya ya, nɔm Mɛlɛka ya tiindan ni, mí va dimio aa: «Nɔm co Hala nuu ni!»

¹⁶Ceen nuu co nɔm o ba tuŋ, baŋa ya yaamɔaa nia a vanaa co ya yɛlen tollo-a o ba.

¹⁷Teengiaa hɔlaa nɔmnda ya coo, ya vana nɔm baalaa. Ciindiaa ya le vanakɛndɛyɛi nɔmnde.

¹⁸Mɛlɛka, i piɛi nɔm pɛ, màá siɛmbula bii ya le. Kɛ màá siɛmbulan la bii vanaa kɔlvesɛiya, mà tol ciee-piɔ́m o meiyo nin!

¹⁹Màá vanaa lacòòvaa siŋnun boboa mì cɔcɔn kindan nda! Vanaa kan pɛɛn, á co sɔɛi a yongaa a á vannda pɛɛsaa-a, à co vana lo o lediom coo a nɔm-ndo yeowlan-nda.

²⁰Mbɔ̀ vanakɛndɛyɛi nɔmnde co i bɔɔ! Vanakɛndɛyɛi n kɛsi teengen le vanaa nɔ siòòŋii nɔmnde-a-e pɛɛn. Vanakɛndɛyɛi n co tosaa vannda kpow o hɔl le vanaa co vionnɔnndo nɔm o ba bɛngu-a-e pɛɛn.

²¹Nɔm pila co nda vionɔɔ nɔm o a bɛngu ni, nɛɛ yaamɔaa ndaa ci nda le-a. A co nda vionɔɔ nɔm o ba bɛngu, nɛɛ vana hol nda sondo le-a.

²²I mel Mɛlɛka balika! I vannun maa kobi nda tiila-o, kɛ o vanakɛndɛyɛi ndɔɛi nin, mó tosa dɛnnda kaamaalan le ya.

²³Kɔl nuu va o sangaa nin mí va dimio aa: «A tow ya mí nɔm levil.» Kɛ yáà tɛɛlɔnndo nɔm, má tuɛi ya diom, tuma ya koŋul nɔm o lani-o pɛɛn.

²⁴Niaa vanaa lo o lediom coo-a kpow, la kaola Mɛlɛka! Kani Mɛlɛa co vanaa laalan ndu-a mandaa, mò va vanaa yongaa sanga bɛndoo tuisio coo.

²⁵Niaa vanaa co Mɛlɛka tiindanndo-a kpow, la sim yili mì la luei yoomuan!