Read Kissi Condii lisai 32 Bible Online

Condii lisai 32 - Kissi bible

Condii lisai 32

¹Condii fula o condun David-on nin-nde. Dɛnɛ kɛndɔɔ co le vana kon, vana Hala mal haki le tɛɛmbuula ndɔlan-ndo, vana o mal haki le hakila ndɔlan-ndo.

²Dɛnɛ kɛndɔɔ co le vana kon, vana Mɛlɛka co lɛ tɛɛmbuu ndɔ cɔm coo loo, o nɔ yiyan lakafa o kɔl too.

³Mɛɛ ya va kɛɔ sɔlɔlanndo faw, lende koni paalan la va kɔlan a cuuloo ya o n'dial ni, i va niinoo somisominndo kpɛŋ.

⁴Idii a icɔl ba nɔmndo va ya kindilaa, yoomuan ma va vesanndo ya o n'dial mɛɛ valo levɔɔ veesiaa ɲɔɔ nuaa yɛ.

⁵O kon kɔɔli, mí sɔlɔlan haki nuu, i vin tɛɛmbuu nuu le. Mí dimi aa: «I co hakila nilan sɔlalan Mɛlɛka o hɔl». Ɛ̀ɛ̀ nduyɛ, má mal-la haki le tɛɛmbuula nilan.

⁶Lelan, o bɛnda mì vana-vana lo o lediom coo piɛi nɔm a telen bɛnda-o. Mɛmma bɛnduan ma hun nin bɛɛ, ma mɔwviaa lɛ ndu le.

⁷Nɔm co nɛɛ nia viannannda ni, nɔm co ya kandaa a buulannda nilan ni. I solinin condon le baŋa n baŋa ya-o.

⁸Mɛlɛka dimul-la aa: «I pɛɛkunin nɔm, mì cɔm nɔm nɛi n bɛnda le kelaa coo-o. I silanin nɔm, mì landu hɔlla nɔm coo.

⁹Va diɔm maa so, te kon te maa milɛɛ le, o kon, ɲɛ-ɲɛ komalnin nɔm te. Soo nda mulɛɔ nda, kalafolan nda vòw nda o lasondo ni le nda biyɔɔ a kpeŋan te.»

¹⁰Dɛnɛ palaa co le vanaa kɔlvesɛiya-o co o bɔɔ, kɛ Mɛlɛka co vanaa co ndu tiindanndo-a kɛndɛi tosallo.

¹¹Niaa vanaa sandaa, la naŋ kɔl mì la dɔwnun ɲaale o Mɛlɛka nin! Niaa vanaa dendu kɔltan-nda kpow, la yonda mì la dɔwnun ɲaale!