Read Kissi Condii lisai 34 Bible Online

Condii lisai 34 - Kissi bible

Condii lisai 34

¹Condii David-e. Telen o tosa sɔɔn maa vana seemɛi Abimelɛk o hɔl, mí Abimelɛk toaw ndu mó kɔannun-ndo.

²Telen oo telen, i vanin Mɛlɛka balikaa mello, lisa ndɔɔ vanin ya o sondo lɔ́ɔ́-lɔ́ɔ̀.

³Màá kɔl nuu kuundian o Mɛlɛka nin! Màá vanaa bala fondoa tuei mà dɔwnun ɲaale!

⁴La n lisan Mɛlɛka naa niaa latulu. N sangalan diola ndɔlan diom pilɛ!

⁵I nuwviaa Mɛlɛka, mó mulul-la, mó baŋa ya a dɛnnda nila isiòònndan kpow.

⁶Vanaa co tofaa o ndu lo co naŋɔɔ a ɲaaloo, siɛmbula mingi lɛnin nda hɔlla yifidii le.

⁷Vana bala fondoo koŋul pɛ, Mɛlɛka tuei ndu diom, o soli ndu o buulannda ndɔlan kpow nin.

⁸Mɛlɛkanɔ Hala-o co isisi vanaa nɔ siòòŋii Mɛlɛka-e-a ikɛi, ndu baŋa nda o dɛnɛ vɔɔndo hɔl-ndɔ ni.

⁹La tofa vɔ mì la ce mɛɛ Mɛlɛka naŋ yɛ. Dɛnɛ kɛndɔɔ co le vana vennun Mɛlɛka o ba bɛngu-o!

¹⁰Niaa vanaa diandaa[6] la ke Mɛlɛka bɛɛlen, kani vanaa co ndu bɛɛlen keo-va, ɲɛ-ɲɛ co nda lepɛŋ te.

¹¹Yàlàá téndéa nɔla mà va a pɛŋnden, yiaan ma nɔla mì ma nɛi nda, kɛ ɲɛ-ɲɛ bii vanaa co Mɛlɛka nuwviaa-a lepɛŋ te.

¹²Poaa nia, la hun mì la yaŋ ya nilan, mì pɛɛku niaa a siòòŋii Mɛlɛka-e nɔu o kɔɔ.

¹³Vana yeema pɛ le yoomoo tueyɔɔ yeela, le yoomu vilɛiyo a le dɛnɛ kɛndɔɔ sɔlaa,

¹⁴mɛɛ o manda diɛɛmule ndɔlen a sɔɔn vɔɔnndon, mò manda cɔcɔn ndɔn a sɔɔn lacòòvan.

¹⁵Kpakpala dɛnɛ vɔɔndo, ma tosa dɛnɛ kɛndɔɔ, nuwviaa kɔlɲuloo, ma kela ndu kɔɔli.

¹⁶Hɔlta Mɛlɛka lan la co vanaa sandaa coo, nila ndɔlan la co veelula ndalan tueyɔɔ.

¹⁷Mɛlɛka co vanaa tosaa dɛnɛ vɔɔnda mululɔnndo, le diola ndalan ɲumio o lɛŋnden coo.

¹⁸Vanaa sandaa koŋul pɛ, Mɛlɛka tuei nda diom, ò soli nda o buulannda ndalan kpow nin.

¹⁹Mɛlɛka co vanaa co o sanga kɔllo nin-nda ikɛi, o co vanaa co a kɔlta tambɛilan-nda ciindiaa.

²⁰Dɛnnda palaalan taw la komal vana sandaa ni, kɛ mì Mɛlɛka baŋa ndu o lan kpow nin,

²¹mò manda palaa ndɔlan kpow, o pilɛ bɛɛ yòm te[7].

²²Dɛnɛ palaa díì vana kɔlvesɛiyo ni, sangaa toal vanaa tol vana sanda yɛlen-nda coo ni.

²³Mɛlɛka ciindiàà yoomula vanaa baalaa ndɔa, vanaa viannun ndu o ba bɛngu-a sɔlanin yaala le.